Lwiimbo lwa Solomoni 4
Mwaalumi
1 Kaka uleebeka omuyandwi wangu!
Meso aako mbwaamweka nolivumbilide!
Masusu aako kuvula mbuli kuti mbutanga bwampongo,
ziselemuka kuzwa mucilundu ca Giliyadi.
2 Meno aako alatuba buu mbuli
butanga bwambelele bwazwa aakugelwa,
mbuli mbelele zyazwa aakusanzigwa kunyina aakakuka.
3 Tulomo twako tulasalala,
waamba zimvwigwa oovundumene masaya mbuli mapomegileneti nolivumbide.
4 Nsingo yako ilinongomene,
akubulungana mbuli ŋanda ya Devedi,
usakatide malungu mbuli zilwanyo zili zyuulu zyabasilumamba.
5 Nkolo zyako ziliimvwi mbuli tunjeleele tobilo tulya maluba-luba.
6 Ndinookkede abusena bwansende aawo aali tununkilizyo,
kusikila kubucedo, mudima wamwaika.
7 Uleebeka akaka omuyandwi wangu, taakwe amponongwa.
8 Atweende, zwa atala lya Lebanoni,
zwa atala aacilundu ca Amana. Atala acilundu ansonje ya Seni,
ansonje ya Helimoni, aakkala basyuumbwa abasiluwe.
9 Wanditolela moyo mwanaa baama, onabwiinga wangu.
Wanditolela moyo wangu nobilula meso,
akalo kawenge nkosamide kubota.
10 Luyando lwako ndubotu kapati, mwanaa baama,
omooye wangu! Luyando lwako ndubotu kwiinda waini,
atufuta twako tulanunkilila kwiinda tununkilizyo.
11 Milomo yako ilabotelezya mbuli cimbulwe baama,
awalo mulaka wako uli mbuli kuti ulaatuci amukupa.
Zisani zyako zinunkilila nsende zyaku Lebanoni.
12 Mwanaa baama, onabwiinga wangu,
uli mbuli muunda uuyakilidwe, nkasensa katali kabuleya.
13 Zisyango zikomena kabotu kuya,
zikomena mbuli mapomegileneti mumuunda,
akazyala micelo iiyanda ahena, naadi,
14 safuloni, kalamusi, sinamoni amisamu imwi yoonse yatununkilizyo,
mula aloyesi atununkilizyo tubotu toonse.
15 Uli kasensa kali mumuunda,
mukalo wamaanzi aatayuminini aazwa kucilundu ca Lebanoni.
Mukaintu
16 Unga okauwo kakunyika, okauwo kakumusanza ungila mumuunda wangu,
kuti kununkila kwako kumvwigwe. Muyandwi wangu aboole kumuunda wakwe alye micelo yawo mibotu iili mulinguwo.