Lute 3

Lute mbwaakajana Mwaalumi

¹ Buzuba bumwi Naomi banyinazyala Lute wakati, “Mwanaangu ino mbuti kuti ndakujanina ŋanda, kuti zintu zikweendele kabotu? ² Swiilila! Uulya Bowazi, uuli ababelesi mbookali aabo, ngusimukowa. Bona! Sunu masiku unoopupulula maila acuumino cakwe. ³ Samba, unane tufuta, usame kabotu, uunke kucuumino, pele atazibi kuti nkoli mane kusikila akamanizye kulya akunywa. ⁴ Lino aona ubone mpalede, eelyo uvumbule kumaulu aakwe ulale, uyookwaambila ncotikacite.” ⁵ Lute wakaingula kuti, “Coonse ncomwandilailila njoocicita.”

⁶ Eelyo Lute wakainka kucuumino, wacita mbubonya mbuli banyinazyala mbubakamulailila. ⁷ Ciindi Bowazi naakamana kulya akunywa, alimwi kaboteledwe, wakaakulala kumamanino aacilwi camaila. Kalede Lute wakasika cabuumuzi wavumbula maulu aakwe walala. ⁸ Lino akati kamasiku Bowazi wakatilimuka, wasanduka, wajana kuti kuli mukaintu uulede kumaulu aakwe. ⁹ Wakamubuzya kuti, “Nduweni?”

Lute wakamwiingula kuti, “Ndime Lute mubelesi wako. Tee kayi nduwe ooelede kundilela mukuti uli wamukowa.”

¹⁰ Mpawo Bowazi wakati, “Leza akuleleke, mwanaangu, nkaambo ooku kusyomeka kwako kuli ndime nkupati kwiinda nkookajisi kuli banyokozyala, kayi tookayanda balombe bacete nibaba bavubide. ¹¹ Lino utayoowi mwanaangu. Coonse cili buti ncooamba, nzoocicita, nkaambo basimunzima boonse balizi kuti ulizyedwe.

¹² “Lino ndime simukowanyoko kasimpe, pele nkwali simukowa umwi wini-wini. ¹³ Ona masiku aano, lino bwaca buyo, kuti naa ooyo muntu ulazumina kukulela, ncibotu, pele kuti katayandi kucita oobo, Mwami Leza mbwali muumi, nzookulela. Lala, mane buce.”

¹⁴ Aboobo Lute wakalala kumaulu aakwe, mane bwaca, pele wakabuka kakucili kooko. Eelyo Bowazi wakati, “Batazibi kuti kwasikide mukaintu okuno kucuumino.” ¹⁵ Alimwi wakati, “Leta mulembo ngosamide uujate.” Lino wakamweelekela maila manji, wamupa, aboobo Lute wakapiluka kumunzi. ¹⁶ Naakasika kuli banyinazyala, bakamubuzya kuti, “Ino weenda buti, mwanaangu?”

Mpawo Lute wakabaambila zyoonse Bowazi nzyaakamucitila. ¹⁷ Wakati, “Wandipa aaya maila wati, ‘Toelede kupiluka acinkwamaanza kuli banyokozyala pe.’”

¹⁸ Lino Naomi wakati, “Kkala, mwanaangu, mane ukazibe naa makani alaba buti. Nkaambo ooyo mwaalumi takoolyookezya pe, ulaamana makani sunu.”