Lute 2
Lute Mbwaakabeleka mumyuunda ya Bowazi
1 Lino kwakali simukowa wamulumi wa Naomi, muntu mulemu muvubi waluzubo lwa Elimeleki, wakali kutegwa Bowazi. 2 Nkabela Lute Mumowabu wakaambila Naomi kuti, “Anduunke kumyuunda, nkavulule makunka aamaila, mumuunda wayooyo uuyoondifwida luzyalo.” Mpawo Naomi wakamwaambila kuti, “Mbubo, koya mwanaangu.”
3 Aboobo Lute wakaya kumyuunda, uyabuvulula katobela basikutebula aalaale. Mucoolwe cakwe wakasika kucibeela camuunda cakali ca Bowazi siluzubonyina Elimeleki.
4 Lino Bowazi wakasika kuzwa ku Betelehemu, wajuzya basikutebula wati, “Mwami Leza abe aandinywe.” Abalo bakaingula kuti, “Mwami Leza akuleleke!”
5 Bowazi wakabuzya mulangi wabasikutebula kuti, “Ino nguni musimbi ooyu?”
6 Mpawo mulangi wakaingula kuti, “Ooyu musimbi Mumowabu ngonguwe wakaboola aa Naomi kuzwa kucisi ca Mowabu. 7 Wakakumbila kuti, ‘Mvulule akubweza akati kamakunka musule lyabasikutebula!’ Waza cifumo-fumo, wabeleka ciindi coonse mane kusikila lino, taakwe naalyookezya akasyoonto pe.”
8 Lino Bowazi wakaambila Lute kuti, “Swiilila mwanaangu. Utanoovululi mumuunda wamuntu uumbi. Utayi kumbi pe. Kokkala ababelesi bangu basimbi aaba. 9 Kolangide buyo mumuunda oomu mobatebula wamana koya bubatobela. Ndabalailila babelesi bangu kuti kabatakupenzyi. Alimwi kuti naa wafwa nyota, koya kunongo, akunywa maanzi ngibateka babelesi bangu.”
10 Lute naakamvwa boobo wakavuntama wati, “Ani inga wandifwida luzyalo buti oobuya? Kundigwasya boobu mebo ndemweenzu!”
11 Bowazi wakaingula kuti, “Ncobeni ndakalwiidwa makani oonse ngokacitila banyokozyala kuzwa lyakafwa mulumi wako. Ndakamvwa mbookasiya uso abanyoko acisi cokwanu, ambookaza okuno kumusyobo ngootakazi. 12 Mwami Leza akuleleke nkaambo kamilimo yako, ukatambule bulumbu buzwide kuzwa ku Mwami Leza wa Isilayeli, nkaambo waza kulinguwe kuti uzooyubile nkuko.”
13 Lute wakati, “Ncobeni ndajana coolwe kulinduwe, simalelaangu, nkaambo wanduumbulizya akuumuzya moyo wangu, nikuba kuti nsili umwi wababelesi bako.”
14 Nicakasika ciindi cakususula, Bowazi wakamwaambila kuti, “Boola tulide antoomwe, nceeci cinkwa awaini.” Ciindi naakakkala kumbali lyabasikutebula, wakamutambika maila makange, nkabela wakalya, wakkuta wasiya amwi. 15 Lute kanyamukide kale kuya kukuvulula, Bowazi wakalailila babelesi bakwe baalumi kuti, “Avulule koonse-koonse, naaba akati kamisunta yamaila. Mutamukasyi pe. 16 Kamusomona maila amwi, mumusiile abweze. Mutamukalalili pe.”
17 Nkaako Lute wakacili kuvulula oomo mumuunda mane kusikila kumabbililo aazuba. Lute naakauma maila ngaakavulwide, wakajana kuti kwakatizule ntumba. 18 Eelyo wakabweza, wainka kumunzi, watondezya banyinazyala ncaakavulula. Azyalo zilyo nzyaakasiide naakakkuta, wakazitola wabapa. 19 Banyinazyala bakamubuzya kuti, “Wali kuyoovulula kuli sunu? Wali kubelekela kuli? Alumbwe muntu ooyo wakugwasya!”
Lute wakalwiida banyinazyala nkwaakali kubelekela. Wakati, “Nkundali kubelekela nkukwa Bowazi.”
20 Lino Naomi wakaambila mukamwanaakwe kuti, “Mwami Leza aleleke muntu ooyo! Mwami Leza taleki kutondezya luzyalo lwakwe kubaumi abafu.” Alimwi Naomi wakamwaambila kuti, “Ooyo muntu ngwamukowa andiswe, nguutulela.”
21 Lute Mumowabu wakaindilizya akuti, “Alimwi wandaambila kuti, ‘Uleelede kukkala ababelesi bangu, kusikila bakamanizye kutebula.’”
22 Naomi wakaambila Lute mukamwanaakwe kuti, “Iiyi, mwanaangu, ncibotu kuti koinka ababelesi bakwe basimbi, nkaambo mumuunda waumbi inga bakupenzya.” 23 Aboobo Lute wakakkala ababelesi ba Bowazi kavulula mane kusikila nibakamanizya kutebula. Ciindi coonse eeci wakali kukkala abanyinazyala.