Luka 7

Jesu mbwaakaponya mubelesi wasilutwe mupati

¹ Jesu naakamana kwaamba zintu eezi zyoonse kubantu, wakanjila mu Kapenaumu. ² Lino silutwe wabasinkondo umwi wakajisi mubelesi ngwaakali kuyandisisya. Mubelesi ooyo wakali kuciswa calufu. ³ Silutwe ooyo naakamvwa kuti Jesu nkwali, wakatuma bapati ba Bajuda bamwi kuyoomukumbila kuti aboole azooponye mubelesi wakwe. ⁴ Eelyo bapati ba Bajuda nibakasika kuli Jesu, bakamukombelezya kapati, bati, “Bona muntu ooyu uleelede kuti umugwasye, ⁵ nkaambo kakuti uluuyanda musyobo wesu, alimwi nguwakatuyakila cikombelo.”

⁶ Eelyo Jesu wakainka ambabo. Naakasika afwiifwi aŋanda, silutwe wakatuma beenzinyina kuyooamba kuli Jesu kuti, “Mwami, utalikatazyi, nkaambo nseelede kuti unjile muŋanda yangu. ⁷ Ncenciceeco ncindataboolela lwangu ndemwini kulinduwe. Pele amba buyo majwi, mubelesi wangu ulapona. ⁸ Nkaambo ambebo ndimuntu weelede kutobela malailile aabalupati-pati, ambebo ndijisi basilumamba aabo mbelailila. Naa kuti ndaambila umwi kuti, ‘Koya!’ ulainka, aumwi kuti, ‘Koza!’ ulasika, akuti ndati kumubelesi wangu, ‘Cita eeci,’ ulacicita.”

⁹ Jesu naakamvwa majwi aaya, wakagambwa kapati. Eelyo wakacengulukila kunkamu yabantu yakali kumutobela wakiizibya kuti, “Taakwe naba omwe mu Isilayeli uusyoma mbuli yooyu!”

¹⁰ Eelyo bakatumidwe, nibakajoka kuŋanda, bakaakujana mubelesi wakwe wapona kale.

Jesu mbwaakaponya mwana wamukamufu

¹¹ Nibwakaca, Jesu wakaya ku Naini, antoomwe abasikwiiya bakwe. Alimwi ankamu mpati yabantu yakainka awe. ¹² Naakasika afwiifwi amulyango wamunzi, wakaswaana basidilwe kabatembede mufu. Lino ooyu mwaalumi, mufu wakali ngomwana alikke kulibanyina aabo bakali bamukamufu. Bantu banji bamumunzi ooyu bakali aamukaintu wakali aamause aataambiki. ¹³ Eelyo Mwami wakamubedaa nkumbu, naakabona mukamufu ooyu, wakati kulinguwe, “Utalili pe.” ¹⁴ Ndilyonya Jesu wakaswena afwiifwi, waampa bbokesi, eelyo bakatembede muntumba bakaima. Wakati, “Mwaalumi, ndati kulinduwe, buka!” ¹⁵ Mpoonya-mpoonya wakabuka akukkala, watalika kwaambaula. Nkabela Jesu wakamupa kulibanyina.

¹⁶ Lino bantu boonse bakakankamana kapati. Bakatalika kulumbaizya Leza bakati, “Ncobeni musinsimi mupati wasika akati kesu!” alimwi bakati, “Leza waboola kuzoofutula bantu bakwe!”

¹⁷ Lino mpuwo eeyi yakamwaika mucisi coonse ca Judiya, amuzisi zyoonse zizingulukide.

Batumwa bakazwa kuli Joni Mubbapatizi

¹⁸ Lino Joni bakamwaambila zintu zyoonse eezi basikwiiya bakwe. Nkaako wakaita basikwiiya bakwe bobilo, ¹⁹ wabatuma ku Mwami Jesu kuyoobuzya kuti, “Sena nduwe ooyo ulaboola, naa tucilangila umbi?”

²⁰ Aabo bakatumwa nibakaakusika kuli Jesu bakati, “Joni watutuma kuti tuzoobuzye kuti, ‘Sena nduwe uuboola, na tucilangila uubi?’”

²¹ Ciindi eeco nciconya Jesu wakaponya bantu banji-banji, bakali kuciswa abaabo bakali aamalwazi antoomwe abaabo bakanjidwe myuuya mibi, alimwi wakabonya boofu banji. ²² Mpawo Jesu wakaambila batumwa ba Joni kuti, “Kamuya mukamwaambile Joni zyoonse nzimwabona anzimwamvwa, boofu balabona, balema baleenda, basizinsenda balaponyezegwa, basinkematwi balamvwa, bafu balabusigwa, bacete balakambaukilwa Makani Mabotu. ²³ Ulilelekedwe muntu ooyo uutadonaiki mulindime.”

²⁴ Nibakainka mbaakatumide Joni, Jesu wakatalika kubuzya bantu banji bakabungene makani aa Joni, “Ino ncinzi ncimwakainkide kuyoobona munkanda? Sena ndubu lwakali kuyuuntana? ²⁵ Ino mwakainkide kuyoobona nzi? Sena muntu wakasamide zisani ziteteete? Tee kayi aabo basama zisani ziteteete bakkala cakulibotezya mumaanda aabami. ²⁶ Amundaambile, Mwaali kuyoobona nzi? Musinsimi? Iiyi, ndamwaambila masimpe kuti mupati kwiinda musinsimi. ²⁷ Nkaambo Joni ngonguwe ooyo wakaambwa mumajwi aa Leza kuti, ‘Ndatuma mutumwa wangu, kumbele lyako uuti kakubambile nzila.’ ²⁸ Ndamwaambila kuti noliba lili taakwe nikwakali muntu naba omwe mupati kwiinda Joni, nikuba boobo muniini mubwami bwa Leza mupati kwiinda nguwe.”

²⁹ Bantu boonse antoomwe abasimitelo bakakuswiilila kukambauka kwa Joni, eelyo bakabbapatizigwa alubbapatizo lwakwe. ³⁰ Pele Bafalisi abamaiyi ba Mulawo bakali kukaka ncaakabayanzizye Leza. Ncencico eeco ncibatakabbapatizigwa a Joni.

³¹ “Ino bantu basunu ndibakozyanisye aanzi? Ino bali mbuli nzi? ³² Bali mbuli bana baniini bakkede mucisambalilo kabaitana kuti, ‘Twamuumina ngoma, pele nywebo tamuzyani! Twamwiimbila nyimbo zyabuumba, pele nywebo tamulili!’ ³³ Nkaambo Joni Mubbapatizi wakasika kaliimya kulya, alimwi katanywi waini, pele nywebo mwakamwaamba kuti, ‘Unjidwe muuya mubi!’ ³⁴ Mwanaa Muntu wakaboola kalya akunywa, pele nywebo mwakamwaamba kuti, ‘Amubone sindya, mukolwi, mulongwe wabasimitelo abatabambi milawo ya Mozesi.’ ³⁵ Nkabela busongo bwa Leza bulabonwa muli baabo babutambula!”

Jesu kuŋanda ya Saimoni Mufalisi

³⁶ Nkabela umwi Mufalisi wakatamba Jesu kuti akalye anguwe. Jesu wakainka kuŋanda yamuntu ooyo, waakukkala kulya antoomwe anguwe. ³⁷ Lino kwakali mukaintu umwi wamumunzi oomo, wakali simamambe, naakaziba kuti Jesu wakali muŋanda ya Mufalisi, wakaleta nsazi yakazwide mafuta aansende aanunkilila kabotu. ³⁸ Wakasika, waima munsi aa Jesu kalila, wakatesya matende aa Jesu amisozi. Eelyo wakatalika kumupukuta amasusu, alimwi wakali kumyonta matende aa Jesu akwaananika amafuta aalya.

³⁹ Lino ooyo Mufalisi wakatambide Jesu naakabona boobo, wakalyaambauzya kuti, “Kuti ooyu muntu naali musinsimi ncobeni, naaziba kuti ooyu mukaintu uumuguma uli buti, nkaambo ngusimamambe.”

⁴⁰ Pele Jesu wakati kulinguwe, “Saimoni, ndijisi cintu cakukwaambila.”

Saimoni wakavuwa kuti, “Ino ncintu nzi, O Mwiiyi?”

⁴¹ Jesu wakati kulinguwe, “Kwakali bantu bobilo bakakolotede mali kumuntu umwi. Umwi wakakolotede mali ansiliva aali myaanda yosanwe, nkabela umwi wakakolotede mali aansiliva aali makumi osanwe. ⁴² Nibakakacilwa kumuboozezya mali, ooyo muntu wakabalekelela boonse bobilo zikoloto zyabo. Ino nguuli wabantu aabo uyoomuyandisya muntu wakabalekelela?”

⁴³ Saimoni wakavuwa kuti, “Ndiyeeya kuti ngooyo ngwaakalekelela mali manji.”

Jesu wakati kulinguwe, “Wavuwa kabotu.” ⁴⁴ Lino wakalanga kumukaintu uulya, mpoonya wakati kuli Saimoni, “Wamubona mukaintu ooyu na? Ndanjila muŋanda yako, taakwe noondipa maanzi aakusamba ku matende. Pele mukaintu ooyu watesya matende aangu amisozi yakwe, alimwi waapukuta amasusu aakwe. ⁴⁵ Yebo taakwe noondimyonta ciindi noondijuzya. Mukaintu ooyu kuzwa ciindi naanjila muŋanda, taakwe naaleka kumyonta matende aangu. ⁴⁶ Yebo taakwe noondinanika mafuta kumutwe, pele walo wandinanika kumatende. ⁴⁷ Lino ndakwaambila kuti, nkaambo kaluyando lwakwe lunji, zinyonyoono zyakwe nozivula buti, mukuti wayandisisya, zyalekelelwa. Ooyo uulekelelwa kuce awalo utondezya luyando luce.”

⁴⁸ Mpawo Jesu wakati kumukaintu, “Zinyonyoono zyako zyalekelelwa.” ⁴⁹ Lino aabo bakali kulya antoomwe anguwe atebule bakatalika kwaamba akati kabo kuti, “Ino nguni muntu ooyu uulekelela zinyonyoono zyabantu?”

⁵⁰ Nkabela Jesu wakati kumukaintu, “Lusyomo lwako lwakufutula. Koya muluumuno.”