Luka 5
Jesu mbwaakaita basikwiiya bakwe bataanzi
1 Naakaimvwi ankomwe yalwizi lwa Jenesaleti bantu banji bakamubunganina bakali kuyanda kumvwa majwi aa Leza. 2 Eelyo wakabona mato obilo, kaali munsi alwizi pele basikuzuba bakalizwide mulingawo, bakali kusanzya tunyandi twabo. 3 Wakanjila mubwato bumwi bwakali bwa Saimoni, mpawo wakamukumbila kuti abukwasule mumaanzi aniini buyo kuzwa kunkomwe, eelyo Jesu wakakkala mubwato watalika kwiisya bantu.
4 Naakamana kwiisya wakaambila Saimoni kuti, “Katuya akati kaziba kuti mukawaale tunyandi twanu kutegwa mujaye nswi zinji.”
5 Saimoni wakamwaambila kuti, “O Mwami, twali kuzuba masiku oonse, pele taakwe ancitwajaya pe, pele mukutobela majwi aako ndilawaala tunyandi.” 6 Nibakacita mbuli mbubakalaililwa, bakajaya nswi zinji kapati, mane tunyandi twabo twakatizapuke. 7 Nkaako bakoobola bazubinyina bakali mubwato bumwi kuti baboole bazoobagwasye. Mpoonya bakaboola akuzoobagwasya. Bakazuzya mato oonse obilo answi cakuti mato akali kuyanda kubbila mumaanzi. 8 Saimoni Pita naakabona boobo, wakavuntamina Jesu, akwaamba kuti, “Tantamuka munsi lyangu, O Mwami, nkaambo mebo ndili muntu sizibi!”
9 Saimoni abeenzinyina boonse bakagambwa kapati answi zinji eezyo nzyobakajana, 10 abalo beenzinyina Saimoni, ba Jemusi a Joni, bana ba Zebedii, mbobakalimvwa oobo. Eelyo Jesu wakati kuli Saimoni, “Utayoowi, nkaambo kuzwa sunu uyooba muzubi wabantu.”
11 Bakatola mato aabo kucito, eelyo bakasiya zintu zyoonse batobela Jesu.
Jesu mbwaakaponya sicinsenda
12 Ciindi cimwi Jesu wakali mumunzi umwi. Mumunzi oomo kwakali muntu wakali kuciswa cinsenda mubili woonse. Muntu ooyu naakamubona Jesu, wakamuvuntamina akumukumbila kuti, “O Mwami, kuti naa koyanda ulakonzya kundiponya.”
13 Eelyo Jesu wakatandabika janza lyakwe wamuguma wati, “Iiyi, ndayanda, kopona.” Mpoonya-mpoonya sicinsenda wakaponyezegwa. 14 Mpawo Jesu wakamwaambilisisya canguzu kuti, “Utaambili muntu naba omwe eeci, pele koya ukalitondezye kumupaizi, eelyo ukape cipaizyo cakuponyezegwa, mbubonya mbuli mbwaakalailila Mozesi, kuti cikabe citondezyo kuli boonse kuti wapona ncobeni.”
15 Nikubaboobo mpuwo ya Jesu yakamwaika kapati, alimwi bunji bwabantu bakayoboloka kuza kulinguwe kuti bazoomvwe, akuti bazooponyezegwa kumalwazi aabo. 16 Pele Jesu wakabasiya, wakaya kubusena buliibide kuyookomba.
Jesu mbwaakaponya muntu wakayuminide mubili
17 Buzuba bumwi Jesu naakali kwiisya Bafalisi, abamwi bamayi ba Mulawo, bakalikkede ambali lyakwe, bakali kuzwa kuminzi yoonse yakucisi ca Galilii aca Judiya, alimwi akumunzi wa Jelusalemu. Nkabela nguzu zya Leza zyakuponya zyakali muli Jesu. 18 Lino kwakaza bamwi bantu bakabwezede muntu mulema kalede amacila aakwe. Bakasola kunjila muŋanda kuti bamulazike munsi lya Jesu.
19 Pele bakabula busena bwakunjilila akaambo kakuvula kwabantu. Nkaako bakatanta aciluli caŋanda, bakadonkola cipulo aciluli. Nibakamana, bakalengelezya macila mpaakalede mulwazi kululamika aakali Jesu. 20 Jesu naakabona lusyomo ndubakajisi wakati, “Mweenzuma, zinyonyoono zyako zyalekelelwa.”
21 Lino bamayi ba Mulawo a Bafalisi bakatalika kubuzyanya mulicabo kuti, “Ino nguni ooyu uukanana majwi aakusampaula Leza? Taakwe muntu buyo uukonzya kulekelela zinyonyoono zyabantu, ccita Leza alikke.”
22 Jesu wakalizi zintu nzyibakali kubuzyanya mumyoyo yabo, eelyo wakabaingula wati, “Ino mulibuzya-buzya nzi mumyoyo yanu? 23 Ncicili citete kwaamba kuti, ‘Zinyonyoono zyako zyalekelelwa,’ naa ‘Nyamuka, weende?’ 24 Pele ono kuti muzibe kuti Mwanaa Muntu ulijisi nguzu zyakulekelela zinyonyoono zyabantu aano ansi.” Aboobo Jesu wakaambila mulwazi wati, “Nyamuka, bweza macila, uye kuŋanda yako.”
25 Mpoonya-mpoonya mulwazi wakanyamuka kabalangilide, wabweza macila aakwe, wakainka kuŋanda yakwe kaya bulumbaizya Leza. 26 Bantu boonse bakagambwa kapati akuyoowa, Kumane bakatalika kulumbaizya Leza kabaamba kuti, “Sunu twabona zintu zyeenzu!”
Jesu mbwaakaita Levi
27 Munsi lyakooko Jesu wakazwida anze. Nkabela wakabona umwi simutelo uutegwa Levi kakkede amulimo wakwe. Mpawo Jesu wakati kulinguwe, “Nditobele.” 28 Mpoonya Levi wakanyamuka, wakasiya zibelesyo zyakwe zyoonse wakatobela Jesu.
29 Lino Levi wakacitila Jesu pobwe pati muŋanda yakwe. Kwakali basimitelo banji-banji abamwi bantu mbobakakkede aabo kabalya.
30 Bafalisi bamwi abamayi ba Mulawo bakali munkamu yabo, bakatalika kutongooka kuli basikwiiya ba Jesu bakati, “Ino nkaambo nzi ncomulya akunywa abasimutelo abatakali kubamba milawo ya Mozesi?”
31 Walo Jesu wakabaingula wati, “Teensi baabo baumi bayanda musilisi pe, ccita aabo baciswa. 32 Imebo tiindakaboolela kwiita baabo mbomuyeeya kuti mbalulami, pele ndakazida kwiita basizinyonyoono kuti beempe.”
Mbubakabuzya kuliimya kulya
33 Bamwi bantu bakati kulinguwe, “Basikwiiya ba Joni ziindi zinji-zinji balaliimya kulya alimwi balakomba, abalo basikwiiya ba Bafalisi balacita mbubonya, pele basikwiiya bako tabaciti boobo pe, balalya alimwi balanywa.”
34 Jesu wakati kulimbabo, “Sena muyeeya kuti inga mwakonzya kusinikizya beenzinyina sibwiinga kuleka kulya ciindi walo sibwiinga nacili ambabo? Peepe tamukonzyi! 35 Peepe, nikuba boobo ciyoosika ciindi basinkondonyina nibayoomutola sibwiinga, ndendilyo beenzinyina nibayooliimya kulya mukuusa.”
36 Alimwi Jesu wakabaambila cikozyanyo cimwi cakuti, “Masimpe taakwe muntu uuyaula cigamba kuzwa kucisani cipya akucigambika acisani cakaindi. Kuti naa wacita boobo, inga wanyonyoona eeco cipya, kwamana tacitisumike kuli cakaindi, tazyeendelani. 37 Alimwi taakwe muntu uubika waini mupya munkomo zyazikutu zyakaindi. Kuti naa wacita boobo, ooyu waini mupya asasa ulaandula inkomo zyakaindi, nkabela waini ulasoomokela ansi, azyalo nkomo zilanyonyooka. 38 Aboobo waini mupya uleelede kuti aakwe munkomo mpya. 39 Alimwi taakwe muntu uuyanda kunywa waini mupya amana kunywa waciindi, nkaambo inga waamba kuti, wakaindi ulainda kubota.”