Luka 4
Jesu mbwaakatepaulwa
1 Jesu wakapiluka kuzwa kumulonga wa Jolodani kazwide Muuya Uusalala, wakasololedwa a Muuya Uusalala kuya munkanda. 2 Oomo mwalo mwakaakutepaulwa a Siluuni kwamazuba aali makumi one. Coonse ciindi eeco kunyina ancaakali kulya, nkaambo kaako kumamanino wakafwa nzala. 3 Eelyo Siluuni wakati kulinguwe, “Kuti naa koli Mwanaa Leza ncobeni, ambila bbwe eeli kuti libe cinkwa.” 4 Pele Jesu wakamwiingula kuti, “Kulilembedwe kuti, ‘Muntu taponi acinkwa cilikke pe.’”
5 Alimwi Siluuni wakamutola atala aacilundu cilamfu, aawo mukaindi kaniini buyo, wakamutondezya zisi zyoonse zyaanyika. 6 Wakati kulinguwe, “Bulelo boonse oobu ndakupa antoomwe abulemu bwabo, nkaambo boonse bulipedwe kulindime. Ndijisi nguzu zyakubupa kumuntu woonse ngweyanda. 7 Kuti naa yebo wavuntama akundikomba, bulelo oobu boonse ndakupa.”
8 Jesu wakamwiingula kuti, “Kulilembedwe kuti, ‘Uleelede kukomba Mwami Leza wako, walo alikke ngoelede kumanina milimo!’”
9 Eelyo Siluuni wakamutola ku Jelusalemu akutanta atala ansonje yaciluli caŋanda ya Leza. Mpoonya wakati kulinguwe, “Kuti naa koli Mwanaa Leza ncobeni, koliwaala ansi kuzwa aano, 10 nkaambo mu Malembe mulilembedwe kuti, ‘Leza uyoolailila bangelo bakwe nkabela bayookukwaba.’ 11 Alimwi akuti, ‘Bayookukwaba amaanza aabo kuti utacisi cituta cako kubbwe.’”
12 Pele Jesu wakamwiingula kuti, “Mu Malembe kulilembedwe kuti, ‘Utasunki Mwami Leza wako.’”
13 Lino Siluuni naakamana kusunka Jesu munzila zyoonse, wakamusiya kwaciindi ciniini.
Jesu mbwaakatalika mulimo wakwe mu Galilii
14 Eelyo Jesu wakabweeda ku Galilii, nguzu zya Muuya Uusalala zyakali aanguwe. Lino mpuwo yakwe yakamwaika koonse-koonse mucisi eeco. 15 Wakali kwiisya muzikombelo zyabo, alimwi wakalumbaizigwa abantu boonse.
Jesu mbwaakakakwa ku Nazaleta
16 Jesu wakasika ku Nazaleta, ooko nkwaakakomenena, nkabela mu Buzuba bwa Kulyookezya butegwa Sabata wakainka kucikombelo mbubonya mbuli cilengwa cakwe calyoonse. Wakaima kuti abale Malembe, 17 eelyo wakapegwa bbuku lyamusinsimi Izaya. Wakalijula, wakajana cibalo cilembedwe kuti,
18 “Muuya wa Leza ulaalindime,
nkaambo wakandinanika kuti ndikambauke Makani Mabotu kubacete.
Wakandituma kuti ngambilizye kubaange kuti,
balaangununwa, alimwi akuzoobonya boofu, akuvuna badyaminidwe,
19 akwaambilizya kuti, ‘Ooyu ngomwaka Leza ngwatinunune bantu bakwe.’”
20 Nkabela Jesu wakajala bbuku, walipa kuli sikubamba cikombelo, mpoonya wakkala. Bantu boonse bakali mucikombelo bakamulangisisya. 21 Eelyo wakaambila bantu kuti, “Sunu Malembe aaya acitika ncobeni, mbubonya mbuli mbomwaamvwa kaabalwa.”
22 Bantu boonse bakamulumbaizya, alimwi bakagambwa mbwaakakanana cabusongo. Bakaamba kuti, “Sena ooyu muntu teensi ngomwanaa Josefa?”
23 Mpoonya Jesu wakati kulimbabo, “Iiyi, ncobeni kambyo aaka muyookainduluka kulindime kati, ‘Omusilisi, liponye.’ Alimwe inga mulandaambila kuti, ‘Kozicita amwalo muno mumunzi wokwanu zintu eezyo nzyotwakaambilwa kuti wakazicita mu Kapenaumu.’” 24 Alimwi wakaamba kuti, “Ncobeni ndamwaambila eeci, taakwe musinsimi uutambulwa kwabo. 25 Alimwi amumvwe, mumazuba aa Elija kwakali bamukabafu banji mucisi ca Isilayeli ciindi eeco nikwakali nzala mpati mucisi akaambo kamvula yatakali kuwa kwamyaka yotatwe acisela. 26 Pele Elija taakwe naakatumwa kuli umwi wambabo pe, pele wakatumwa buyo kuli mukamufu wakumunzi wa Zelafati mucisi ca Sidoni. 27 Alimwi kwakali basicinsenda banji-banji mucisi ca Isilayeli mumazuba aamusinsimi Elisya. Taakwe naba omwe wabo wakaponyezegwa, ccita buyo Naamani wakucisi ca Siliya.” 28 Nibakamvwa boobo, bantu boonse mucikombelo bakanyema kapati. 29 Bakanyamuka akukwelaanya Jesu anze aamunzi, bamutola atala acilundu aawo mpowakayakilidwe munzi wabo, kuti bakamutonkele mujeleele. 30 Pele walo wakaandulula akati kabo wainka.
Muntu wakanjidwe muuya mubi
31 Mpawo wakaya ku Kapenaumu, munzi wamucisi ca Galilii, ooko wakaiisya bantu mu Sabata. 32 Boonse bakagambwa kapati kukwiisya kwakwe, nkaambo majwi aakwe akali kuyasa. 33 Mucikombelo kwakali muntu wakanjidwe muuya mubi. Muntu ooyo wakoompolola ajwi pati wakati, 34 “Ino twakucita nzi, yebo Jesu wa Nazaleta? Sena waboola kuzootunyonyoona? Ndilikuzi kuti nduwe Uusalala wa Leza.” 35 Mpoonya Jesu wakakalalila muuya mubi, wati, “Umuna, kozwa mumuntu ooyu!” Eelyo muuya mubi wakamusuntusya muntu ooyo, wakazwa mulinguwe kaatakwe akumucisa pe.
36 Bantu boonse bakagambwa akubuzya kuti “Ino makani nzi aaya? Masimpe ulalailila canguzu a buleli myuuya mibi, ayalo ilamuswiilila ilazwa!” 37 Nkabela mpuwo yakwe yakamwaika koonse-koonse mucisi eeco.
Jesu mbwaakaponya bantu banji
38 Lino Jesu wakazwa mucikombelo, wakanjila muŋanda ya Saimoni. Oomo banyinazyala Saimoni mobakali kucisilwa. Bakali kuciswa mubili kupya kapati. Bakakumbila Jesu kuti abaponye.
39 Mpoonya aawo wakainka wakwiima kumbali aabulo, walailila bulwazi kuti buzwe. Mpoonya-mpoonya bakapona, bakaima babakutaukila.
40 Nilyakasalazya, bantu boonse bakajisi beenzinyina bakali kuciswa malwazi aandeene, bakabaleta kulinguwe, eelyo wakabikka maanza aakwe alimbabo wabaponya. 41 Myuuya mibi ayalo yakagwisigwa mubantu banji-banji, kaiyaboongolola kaiti, “Nduwe Mwanaa Leza!”
Pele walo wakaikalalila, taakiizumizya kuti yaambaule, nkaambo yakali muzi kuti ngo Munanike wa Leza.
Jesu mbwaakakambauka mucisi ca Judiya
42 Nibwakaca, Jesu wakazwa mu Kapenaumu akuya kubusena buliibide. Bantu bakatalika kumuyandaula, nibakamujana bakasola kumukombelezya kuti atainki kumbi. 43 Pele walo wakati kulimbabo, “Mebo ndeelede kuyookambauka Makani Mabotu aabwami bwa Leza kuminzi iimbi ayalo, nkaambo ncencico ncindakazida.” 44 Aboobo wakaakukambauka muzikombelo zyacisi ca Judiya.