Luka 22
Mbubakakanza kujaya Jesu
1 Lino lyakali aafwiifwi pobwe lyakulya Cinkwa Citakwe Mimena litegwa Pobwe lya Kwiindilila. 2 Bapaizi basilutwe abamayi ba Mulawo bakali kusola kujana nzila yakujaya Jesu bantu kabatazi, nkaambo kakuyoowa kuti kulaba lupyopyongano.
Judasi mbwaakazumina kumwaaba Jesu
3 Lino Saatani wakanjila muli Judasi wakali kutegwa Isikaliyoti, wakali umwi wabaabo bakali kkumi ababili. 4 Aboobo Judasi wakainka kuti akakanane abapaizi basilutwe abalindizi baŋanda ya Leza mbuli mbwataabe Jesu kulimbabo. 5 Balo bakabotelwa, mpoonya bakazumina kumubbadela mali. 6 Awalo Judasi wakacizumina eeci. Eelyo wakatalika kuyandaula nzila yakwaaba Jesu bantu kabatazi.
Jesu mbwaakalibambila kulya cilalilo ca Pasika
7 Bwakasika buzuba bwapobwe lya Cinkwa Citakwe Mimena, aawo tubelele twa Pobwe lya Kwiindilila nitwakali kujaigwa. 8 Nkabela Jesu wakatuma Pita a Joni akubalailila kuti, “Kamuya mukabambe cilalilo cesu ca Pobwe lya Kwiindilila kuti tulye.”
9 Balo bakamubuzya kuti, “Ino nkuli nkoyanda kuti tukalibambile nkuko?”
10 Jesu wakati, “Amumvwe! Mwaakunjila buyo mumunzi, muyooswaana mwaalumi uuyumwide nongo yamaanzi. Amukamutobele muŋanda mwatikanjile, 11 muŋanda oomo mwatikanjile mukati kuli mukamwini ŋanda, ‘Mboobu mbwaamba Mwiiyi kulinduwe, ino ili kuli ŋanda mwetilide pobwe mebo abasikwiiya bangu?’ 12 Uyoomutondezya ŋanda mpati yamujulu iijisi zintu zyoonse ziyandika, momumo momuyoobamba zintu zyoonse.”
13 Bakainka akuyoojana kuti zyoonse zintu mulinjiyo zili mbubonya mbwaakabalaililide Jesu. Eelyo bakabamba cilalilo ca Pobwe lya Kwiindilila.
Mulalilo wa Mwami
14 Nicakasika ciindi cakulya pobwe lyakwiindilila, Jesu wakakkala mubusena bwakwe atebule, antoomwe abatumwa bakwe bali kkumi ababili. 15 Mpoonya wakati kulimbabo, “Ndali kuyandisya kapati kuti ndilye cilalilo eeci ca Pobwe lya Kwiindilila andinywe nketananjila mumapenzi. 16 Nkaambo ndamwaambila kuti musule aacilalilo eeci nsikooyoolya limbi cimbi kusikila caakucitilwa mubwami bwa Leza.”
17 Mpoonya aawo Jesu wakabweza nkomeki, nkabela naakamana kulumba Leza, wakati, “Amutole nkomeki eeyi mwaabane, 18 nkaambo ndamwaambila kuti kuzwa lino nsikooyoonywa limbi musinza wansansa mane kusikila bukaboole bwami bwa Leza.”
19 Eelyo wakabweza cinkwa, wakalumba, wakacikomona akucipa kulimbabo wati, “Ooyu ngomubili wangu, [wapegwa nkaambo kanu. Kamucita eeci mukuyeeya ndime.” 20 Munzila yomwe buyo nibakamana kulalila, wakabapa nkomeki akwaamba kuti, “Nkomeki eeyi ncecizuminano cipya ca Leza, ciyumizigwa akukunka kwabulowa bwangu akaambo kanu.]
21 “Pele, amulange! Ooyo uundaaba uli aandime atebule eeli ndilyonya! 22 Mwanaa Muntu uyoofwa mbubonya mbuli mbwaakaciyanda Leza, pele akomena mapenzi aayooba kuli uumwaaba!” Muntu ooyo naatakazyalwa buyo.
23 Eelyo basikwiiya bakatalika kulibuzya mulicabo kuti nguni uunga ulacicita eeci.
Mupati kwiinda bamwi mbweelede kuba
24 Lino kwakaba kukazyanya akati kabasikwiiya nkaambo bakali kuyanda kuziba kuti nguni mupati kwiinda akati kabo. 25 Mpawo Jesu wakabaambila kuti, “Bami bamunyika eeyi balela bantu babo akakomo-komo, abalo baleli bayanda kulumbaizigwa akwiitwa kuti ‘Mbeenzinyina abantu.’ 26 Pele tacili boobo kulindinywe pe. Ooyo mupati akati kanu uleelede kuba uulitola aansi kwiinda bamwi boonse, awalo mweendelezi uleelede kuba mubelesi wanu nyoonse. 27 Ino nguni mupati? Sena nguyooyo uukkala aatebule akulya, naa nguyooyo uumubelekela akuleta cakulya? Ncobeni nguyooyo uukkala akulya. Pele mebo kulindinywe ndili mbuli mubelesi wanu.
28 “Nywebo mwakkala andime mumasukusyo aangu oonse, 29 mbubonya mbuli Taata mbwaakandipa nguzu zyabwami, mbubonya oobo ambebo mbwendiyoobamba cizuminano cangu andinywe. 30 Muyoolida akunywida atebule lyangu mubwami bwangu, alimwi muyookkala azyuuno zyabwami akubeteka misyobo iili kkumi aibili ya Isilayeli.
Jesu mbwaakacenjezya Pita
31 “Saimoni, Saimoni! Swiilila! Saatani wazumizigwa kuti amusunke nyoonse, mbubonya mbuli mulimi mbwapupulula buungu kuzwa kumaila. 32 Pele ndakukombela, Saimoni, kuti lusyomo lwako lutamani. Eelyo waakupilukila kulindime, ukayumye beenzinyoko.”
33 Pita wakaingula kuti, “Mwami, ndililibambilide kuya kuntolongo ayebo, nikuba kufwa.”
34 Jesu wakati, “Nkwaambile, Pita, mukombwe katanalila sunu, unoonditamide kale ziindi zyotatwe kuti tondizi.”
Cikwama, ankomo, apanga
35 Jesu wakati kulimbabo, “Ciindi ncindakamutuma kamutakwe cikwama, nkomo, andyasyo, sena mwakaakubula cintu?”
Bakati, “Taakwe acomwe ncotwakabula pe.”
36 Eelyo Jesu wakati kulimbabo, “Pele lino ooyo uulaacikwama, niiba nkomo, uleelede kwiibweza akwiitolelezya, awalo uutajisi panga uleelede kuuzya cisani kutegwa aule. 37 Nkaako ndamwaambila kuti, malembe aamba kuti, ‘Wakabalilizigwa abacita zibi,’ aleelede kuti azuzikizigwe mulindime. Nkaambo kakuti eeco cakalembwa akaambo kandime caba aafwiifwi kuti cicitike.”
38 Basikwiiya bakati, “Bona! Mwami, ngaaya mapanga obilo!”
Jesu wakati, “Mbombubo, azulila.”
Jesu mbwaakakomba mumuunda wa Getesamani
39 Jesu wakazwa mumunzi wakainka kucilundu camisamu ya Oliva mbubonya mbuli mbwaakali kucita lyoonse, basikwiiya bakwe bakamutobela. 40 Naakasika kubusena oobo, wakati kulimbabo, “Amukombe kuti mutanjili mumasunko.”
41 Mpoonya wakabasiya, wakainka mpanga muntu ulasisya afusa bbwe, eelyo wakavuntama wakomba. 42 Wakati, “Taata, kuti koyanda ndigwisizya nkomeki eeyi yamapenzi. Nikubaboobo kutabi mbuli mbweyanda pe, akube mbuli kuyanda kwako.”
[ 43 Eelyo mungelo wakaza kulinguwe akumuyumya. 44 Mukupenga kupati kwamumoyo wakakombesya anguzu, mane amubili wakatalika kuzwa nkasaalo yakali kuloka-loka ansi mbuli madosi aabulowa.]
45 Naakanyamuka kuzwa mpaakali kukombela, nkabela wakasika kuli basikwiiya bakwe, wakajana baloona, nkaambo bakalikatede, myoyo yabo yakazwide kuusa kupati. 46 Wakasika kuli mbabo wati, “Nkaambo nzi ncomoona? Amubuke mukombe kuti mutanjili mukusunkwa.”
Jesu mbwaakajatwa
47 Lino Jesu naakacili kwaambaula, mpi yakasika kaisololedwe a Judasi, umwi wabaabo bali kkumi ababili. Judasi wakaswena aafwiifwi a Jesu wamumyonta. 48 Jesu wakati kulinguwe, “Judasi, sena waaba Mwanaa Muntu akumyonta?”
49 Lino aabo basikwiiya bakali aa Jesu nibakabona cakali kuyanda kucitika bakati, “Sena tulwane amapanga Mwami?” 50 Eelyo umwi wabo wakakwezula kutwi kwalulyo kwamuzike wamupaizi mupati.
51 Jesu wakati, “Mbubo! Akumane lino!” Eelyo wakabweza kutwi kwamuntu ooyo akumuponya.
52 Mpoonya Jesu wakaambila bapaizi basilutwe, balindizi bapati baŋanda ya Leza, bapati bacisi, aabo bakaza kuzoomujata wakati, “Nkaambo nzi mwazikundijata amapanga ankoli mbuli kuti ndimubbi? 53 Ndakali aandinywe muŋanda ya Leza mazuba oonse, pele taakwe nimwakasola kundijata. Ecino nciindi cakuti muleli wamudima atondezye nguzu zyakwe.”
Pita mbwaakatama Jesu
54 Lino bakamujata akumutola kuŋanda yamupaizi mupati, Pita wakaccilila kaya bweendela alaale. 55 Kwakakutwidwe mulilo akati kalubuwa, nkabela Pita wakakkala akuyota abaabo mbaakajana mpawo. 56 Umwi wabasimbi babelesi naakabona Pita kayota wakamulangisya akuti, “Ooyu muntu wakali aanguwe!” 57 Pele Pita wakatama wakati, “Yebo omusimbi, ooyu muntu nsimwizi pe!”
58 Nikwakainda kaindi kaniini buyo, umwi mwaalumi naakabona Pita wakati, “Yebo uli umwi wabo!”
Pita wakamwiingula kuti, “Peepe, mebo nsili wambabo pe!”
59 Alimwi nikwainda oola lyomwe, umwi muntu wakaamba cakusinizya wakati, “Taakwe amubuzyo, ooyu muntu wakali antoomwe a Jesu, nkaambo ngwaakucisi ca Galilii.”
60 Pele alimwi Pita wakati, “Yebo, aayo makani ngoamba mebo nsyaazi pe!”
Pita kacaamba, mukombwe wakalila. 61 Ndilyonya eelyo Mwami Jesu wakacenguluka waceba Pita akumulangisya. Lino Pita wakaibaluka majwi ngaakaamba Mwami aakuti, “Sunu mukombwe katanalila unoonditamide ziindi zyotatwe.” 62 Pita wakazwida anze walila kapati.
Jesu mbwaakatolwa kunkuta
63 Lino bantu bakali kulindila Jesu, bakamuseka calweeno akumuuma. 64 Bakamuvumba kumeso, bakamuuma akumubuzya kuti, “Ziba, ino nguni wakuuma?” 65 Bakaamba zintu zimwi zinji zyakumusampula akumutukana.
Jesu kumbele lyankamu yababetesi
66 Nibwakaca, bapati ba Bajuda, bapaizi basilutwe, abamayi ba Mulawo bakakkala antoomwe, Jesu wakaletwa kulimbabo. 67 Bakamubuzya kuti, “Twaambile, sena yebo nduwe Munanike wa Leza?”
Walo wakati, “Nikuba kuti ndamwaambila tamukoondizuminina, 68 alimwi kuti ndamubuzya mubuzyo inga tamukoodiingula. 69 Pele kuzwida sunu mane kuyoosika akutamani Mwanaa Muntu uyookkala kululyo lwa Leza Singuzuzyoonse.”
70 Eelyo boonse bakati, “Nkokuti ndonduwe Mwanaa Leza?” Walo wakati kulimbabo, “Ndinywe mwaamba kuti ndime nguwe.”
71 Balo bakati, “Mbaanzi bakamboni mbotuciyanda! Swebo tobeni twalimvwida nzyaamba amulomo wakwe mwini!”