Luka 20

Jesu mbwaakabuzigwa akaambo kanguzu zyakwe

¹ Buzuba bumwi Jesu naakali kwiisya bantu muŋanda ya Leza akukambauka Makani Mabotu, bapaizi basilutwe abamayi ba Mulawo antoomwe abapati bacisi, bakaboola kulinguwe, ² bakati, “Twaambile, ninguzu nzi nzyojisi mukucita zintu eezi? Nguni waakakupa nguzu zyakucita zintu eezi?”

³ Jesu wakabaingula kuti, “Ambebo ndilamubuzya mubuzyo. Amundaambile, ⁴ Nguni wakatuma Joni kuti abbapatizye ngu Leza naa mbantu?”

⁵ Mpoonya bakatalika kukazyanya mulicabo bati, “Ino twaambe buti? Naa twaambe kuti Leza nguwakamutuma, ulaamba kuti, ‘Ino kayi mwakalekela nzi kumusyoma?’ ⁶ Naa twati, ‘Mbantu’ nkamu eeyi yoonse iili aano ilatuuma mabwe, nkaambo boonse balizi kuti Joni wakali musinsimi.” ⁷ Aboobo bakamuvwiila akuti, “Tatumuzi pe.”

⁸ Mpoonya Jesu wakabaambila kuti, “Ambebo nsikoomwaambila naa ninguzu nzi nzecitya zintu eezi.”

Cikozyanyo cabasikulanga muunda

⁹ Mpoonya Jesu wakaambila bantu cikozyanyo eeci, wakati, “Umwi muntu wakalima muunda wamusaansa. Wakuupa kubalimi, eelyo wakaya kucisi cimbi. ¹⁰ Nicakasika ciindi cakutebula nsaansa, ooyo muntu wakatuma mubelesi kubalimi aabo kuti akamuletele caabilo cakwe camicelo yamuunda. Pele balimi bakamuuma mubelesi ooyo akumupilusya acinkwamaanza. ¹¹ Kumane muntu ooyo wakatuma aumbi mubelesi, pele balimi bakamuuma awalo akumucita zintu zyuusya nsoni, awalo bakamupilusya acinkwamaanza. ¹² Alimwi wakatuma mubelesi watatu, awalo ooyo bakamucisa balimi aabo bamusowela kunze aamuunda. ¹³ Eelyo mukamwini muunda wakati, ‘Ino ndilacita buti? Nkokuti ndilatuma buyo mwanaangu ngweyandisisya, ambweni bayoomulemeka!’ ¹⁴ Pele balimi nibakamubona bakavwiya kuti, ‘Ooyu ngosimulya zina. Atumujaye kutegwa muunda ube wesu!’ ¹⁵ Aboobo bakamujaya akumusowela kunze aamuunda.”

Jesu wakababuzya kuti, “Ino ninzi ncatikacite uuli aamuunda kubantu aaba? ¹⁶ Uyooboola akubajaya balimi akupa muunda wakwe kubantu bambi.” Bantu nibakamvwa boobu bakati, “Kutabi boobo kaka!”

¹⁷ Jesu wakabalanga akubabuzya kuti, “Ino malembe aaya aamba nzi aati,

‘Ibbwe ndibakakaka bayaki

ndelyakaba bbwe liyandisi lyaacooko.’

¹⁸ Kufumbwa muntu uutikawide alindilyo uyootyokooka, alimwi kuti bbwe eelyo likawide amuntu liyoomupwasyaula.”

Makani aakutela mutelo

¹⁹ Lino bamayi ba Mulawo antoomwe abapaizi basilutwe bakasola kuti bamujate Jesu mpoonya abusena aawo, nkaambo bakaziba kuti wakali kusendekezya mbabo mucikozyanyo eeci, pele bakayoowa bantu. ²⁰ Aboobo bakali kulindila ciindi cakuti bamujate. Bakabbadela bamwi bantu basikutwela kutegwa bakalicengezye kuti mbantu basyomeka, bakabatuma kuti bakamuteye Jesu amibuzyo yabo, kutegwa bakonzye kumutola kunkuta yamweendelezi. ²¹ Bantu aaba bakati kuli Jesu, “O Mwiiyi, tulizi kuti yebo ulaamba akwiisya mubwini. Tulizi kuti tokwe makani amuntu naba ni, pele ulaiisya nzila ya Leza mukasimpe. ²² Twaambile, sena kuleelede kutela mitelo ku Muleli Mupati waku Loma naa pe?”

²³ Jesu wakaziba luuni lwabo, mpoonya wakati, ²⁴ “Amunditondezye di. Ino lijisi mutwe azina lyani?”

Bakati, “Nzya Muleli Mupati waku Loma.”

²⁵ Eelyo wakati, “Ncibotu, amupe Muleli Mupati waku Loma zintu zyakwe, alimwi amupe Leza zintu zya Leza.”

²⁶ Aboobo bakakacilwa kuti bamuce muli ncaakaamba kumbele lyabantu niciba comwe, eelyo bakaumuna buyo alimwi bakagambwa kukwiingula kwakwe.

Makani aabubuke bwabafu

²⁷ Lino bamwi Basaduki bakasika kuli Jesu. Mbambabo aabo baamba kuti bantu tabakooyoobuka kuzwa kubafu. Bakati, ²⁸ “Mwiiyi, Mozesi wakatulembela mulawo ooyu, ‘Kuti naa munyoko wafwa wajisi mukaintu pele katakwe bana mbaakazyala, wamukowa uleelede kukwata mukamufu kutegwa amuzyalile bana mufu.’ ²⁹ Lino kwakali babunyina bali ciloba, mupati wa boonse wakakwata mukaintu pele wakafwa katanazyala mwana. ³⁰ Eelyo awabili wakakwata mukamufu, ³¹ alimwi awatatu mbubonya, pele awalo wakafwa, bakali kuya bufwa boonse mane kusikila kuli waciloba kabatasiyi amwana pe. ³² Kumamanino awalo mukaintu wakafwa. ³³ Ino bwaakusika buzuba mbobayoobusigwa bafu, ooyo mukaintu uyooba mukani? Nkaambo baalumi aaba bali ciloba boonse bakali mukwete.”

³⁴ Jesu wakabaingula kuti, “Baalumi abakaintu bamazuba aano balakwatana, ³⁵ pele muciindi ciboola baalumi abakaintu nibayoobusigwa kuzwa kubafu tabakooyookwatana pe. ³⁶ Bayooba mbuli bangelo, alimwi tabakafwi limbi pe. Balo bayooba bana ba Leza, nkaambo bayoobusigwa kuzwa kubafu. ³⁷ Awalo Mozesi wakacibikka aantangalala cakuti bafu bayoobusigwa. Nkaambo aawo mpaakalemba makani aciteyo ciyaka mulilo, wakalemba kuti, ‘Ngu Leza wa Abulahamu, wa Izaka, alimwi a Jakobo!’ ³⁸ Caamba kuti ngu Leza wabaumi, tali wabafu pe, nkaambo kuli Leza boonse mbaumi.”

³⁹ Eelyo bamwi bamayi ba Mulawo bakaamba kuti, “Ooko nkwiingula kubotu, omwiiyi.” ⁴⁰ Aboobo bakayoowa kucinoomubuzya limbi mibuzyo.

Ino Munanike wa Leza mwana wani?

⁴¹ Jesu wakati kulimbabo, “Ino caambilwa nzi kuti Munanike wa Leza ngwalunyungu lwa Devedi? ⁴² Nkaambo Devedi mwini mubbuku lya Intembauzyo, waamba kuti,

‘Mwami Leza wakati ku Mwami wangu,

Kkala kubbazu lyalulyo lwangu

⁴³ Mane kusikila nkabike basinkondonyoko kuti

cibe cilyatililo cako.’

⁴⁴ Oobuya Devedi mbwaakamwiita kuti ‘Mwami.’ Ino inga ulaba buti mwanaakwe?”

Jesu mbwaakacenjezya bantu zyabamayi ba Mulawo

⁴⁵ Lino bantu banji kabaswiilila Jesu wakati kuli basikwiiya bakwe, ⁴⁶ “Kamubacenjelela bamayi ba Mulawo aabo bayandisya kweendeenda kabasamide zisani zilamfu, akuyanda kulisalila masena mabotu akujuzigwa akulemekwa muzisambalilo akukkala zyuuno zyabulemu muzikombelo amumapobwe. ⁴⁷ Bacenga bamukabafu akubanyanga mbono zyabo, alimwi bayanda kubonwa abantu kwiindila mukukomba kwabo kulamfu. Cisubulo cabo kuli Leza ciyooindilila kubija!”