Luka 2
Jesu mbwaakazyalwa
1 Mumazuba aayo kwakaza mulawo wa Agusitusi Muleli Mupati waku Loma, wakuti bantu boonse bali mubulelo bwa Loma balembwe. 2 Ciindi kubalwa ooku kwakusaanguna nikwakacitika, Kwiliniyasi wakali ngomweendelezi wacisi ca Siliya. 3 Nkabela muntu a muntu wakainka kuyoolilembya kumunzi wokwabo. 4 Awalo Josefa wakanyamuka kuzwa ku Nazaleta mucisi ca Galilii wakainka kumunzi wa Devedi uutegwa Betelehemu mucisi ca Judiya, nkaambo wakali walunyungu lwa Devedi. 5 Wakainka kuti akalembwe antoomwe a Maliya ngwaakakkalide. Maliya wakali minsi. 6 Kabacili kooko mazuba aakuzyala akasika. 7 Eelyo wakazyala mwana mutaanzi mulombe, wakamuputaila muzisani zituba, wamulazika mucilido caŋombe, nkaambo kwakabula busena bwakuti bakkale muŋanda yabeenzu.
Beembezi mbobakabona Bangelo
8 Kulubazu lwacisi ooko kwakali beembezi bakali kulanga matanga aabo masiku kulutanga. 9 Eelyo mungelo wakalibonya kulimbabo, mumuni wabulemu bwa Leza wakamweka akubazinguluka, babone eezi bakayoowa kapati, 10 mungelo wakati kulimbabo, “Mutayoowi, amubone ndamuletela makani mabotu aatikabotele bantu boonse, 11 sunu, mumunzi wa Devedi mwazyalilwa Mufutuli uuli ngu Kilisito Mwami. 12 Nceeci citondezyo, muyoojana mwana muvwanda uuputailidwe muzisani kalazikidwe mucilido caŋombe.” 13 Mpoonya-mpoonya kwakalibonya impi yabaabo bakujulu antoomwe amungelo, kabalumbaizya Leza kabati,
14 “Akube bulemu kuli Leza kujulu lyamajulu,
munyika amube luumuno akati kabaabo bamukondelezya!”
15 Bangelo nibakabweeda kujulu, beembezi bakalyaambauzya bakati, “Atweende kufwambaana ku Betelehemu, tukabone cintu cacitika Mwami ncaatuzibya.”
16 Bakainka cakufwambaana baakujana Maliya a Josefa, amwana Jesu ulilazikidwe mucilido caŋombe. 17 Beembezi nibakamubona, bakaamba makani oonse mungelo ngaakabaambila kujatikizya mwana ooyu. 18 Nkabela bantu nibakamvwa zyakaamba beembezi bakagambwa kapati. 19 Maliya, wakabamba zintu eezi zyoonse mumoyo wakwe. Wakali kuziyeeyesya. 20 Beembezi bakabweeda kabaya bulemya akulumbaizya Leza akaambo kazintu zyoonse nzyobakamvwa akubona. Zyakaba mbubonya mbuli mungelo mbwaakabaambilide.
Jesu mbwaakaulikwa zina
21 Nikwakainda mazuba aali lusele kuzwa naakazyalwa Jesu, cakasika ciindi cakuti apalulwe, eelyo wakaulikwa zina lya Jesu, zina eeli wakapegwa amungelo katanamitwa.
Jesu mbwaakatolwa kuŋanda ya Leza
22 Ciindi cakuti bakalisalazye nicakasika, kweendelana abwakalailila Mozesi, bakatola mwana Jesu ku Jelusalemu kuti bakamupe kuli Leza. 23 Nkaambo mbombubo mbokulembedwe mumulawo wa Leza kuti, “Mwana woonse mulombe wakusaanguna uyoopegwa kuli Leza.” 24 Alimwi bakaluunkide akuyoopa cituulo canziba zyobilo naa bana bankwilimba bobilo, nkweendelana amulawo wa Leza.
25 Lino mu Jelusalemu kwakali mwaalumi wakali kwiitwa kuti Simiyoni, wakali muntu uululeme uulemeka Leza, alimwi wakali kulangila lununuko lwa Baisilayeli. Muuya Uusalala wakali aanguwe, 26 alimwi wakali musyomezezye kuti takooyoofwa katana mubona Munanike wa Leza. 27 Kasoledwa a Muuya Uusalala, Simiyoni wakaakunjila muŋanda ya Leza. Ciindi bazyali ba Jesu nibakanjizya mwana kuti acitwe bwaamba mulawo, 28 Simiyoni wakamubweza mwana akumufukata mumaanza aakwe, wakatalika kulumbaizya Leza wati,
29 “Mwami, ncobeni wabamba cisyomezyo cako,
lino ndileke ndemubelesi wako mfwe muluumuno.
30 Nkaambo lwangu ndemwini ndali bonena lufutuko lwako,
31 lwalo ndoobamba bantu boonse kababwene.
32 Ooyu ngomumuni uuyubununa luyando lwako kuli bamasi,
nguuleta bulemu kubantu bako ba Isilayeli.”
33 Bazyali bakagambwa kapati nibakamvwa majwi aa Simiyoni kumwana Jesu. 34 Mpoonya Simiyoni wakabaleleka akwaamba kuli Maliya, banyina mwana kuti, “Ooyu mwana wasalwa a Leza kuwisya akubusya banji akati ka Baisilayeli, uyooba citondezyo cizwa kuli Leza ncobayookazya banji. 35 Uyooyubununa miyeeyo yabo iisisidwe. Mause, ayooyasa moyo wako mbubona mbuli panga libosya.”
36 Lino kwakali mukaintu musinsimi wakali mukamufu wakali kutegwa Ana. Mukaintu ooyu wakalicembeede kapati. Wakali mwanaa Fanuweli, wamukowa wa Asya. Wakakkala buyo myaka iili ciloba amulumaakwe kuzwa naakakwatwa. 37 Lino ciindi eeci wakajisi myaka iili makumi aali lusele aine. Taakwe naakali kuzwa muŋanda ya Leza. Ciindi coonse masiku asikati wakali kukomba akuliimya kulya. 38 Nciconya eeco ciindi cakaletwa mwana Jesu wakasika walumba Leza, akwaamba makani aamwana ooyo kulibaabo boonse bakali kulindila kunununwa kwa Jelusalemu.
Mbobakabweeda ku Nazaleta
39 Nibakamana kucita zintu zyoonse mbuli mbokwaambwa mumulawo wa Leza, bakabweeda kumunzi wabo waku Nazaleta uuli mucisi ca Galilii. 40 Lino mwana wakakomena akuba singuzu muyumu. Wakalizwide busongo, alimwi zileleko zya Leza zyakali alinguwe.
Mulombe Jesu muŋanda ya Leza
41 Mwaka amwaka bazyali ba Jesu bakali kuunka ku Jelusalemu ku Pobwe lya Kwiindilila. 42 Ciindi Jesu naakaba aamyaka iili kkumi amyaka yobilo, bazyali bakwe bakainka kupobwe mbubonya mbuli mbobakazibide. 43 Pobwe nilyakamana, ciindi ncibakabweeda ku Nazaleta, mulombe Jesu wakacaala mu Jelusalemu. Bazyali bakwe tiibakazi pe. 44 Bakali kuyeeya kuti wakali akati kabuleya bwabeenzinyina. Bakeenda lweendo lwabuzuba bomwe, eelyo bakatalika kumuyandaula akati kabasazinyina. 45 Nibatakamujana, bakapilukila ku Jelusalemu kuyoomuyandaula. 46 Nibakamuyandaula kwamazuba otatwe, bakaakumujana muŋanda ya Leza kakkede akati kabamayi ba mulawo, kaswiilizya kukanana kwabo alimwi kababuzya mibuzyo. 47 Bantu boonse bakamvwa kwiingula kwakwe kwabusongo bakagambwa kapati. 48 Bazyali bakwe bakakankamana kapati nibakamujana. Mpoonya banyina bakati kulinguwe, “Mwanaangu, ino watucitila nzi boobu? Bona uso ambebo twali kukuyandaula akuzingwa kapati.”
49 Pele Jesu wakati kulimbabo, “Ino mwali kundiyandawida nzi? Sena tamuzi kuti mebo ndeelede kuba muŋanda ya Taata?” 50 Pele bazyali bakwe tiibakaziba ncaakali kwaamba pe.
51 Eelyo wakainka ambabo kumunzi wa Nazaleta alimwi wakali kubaswiilila. Nkabela banyina bakazibamba zintu eezi zyoonse mumoyo wabo. 52 Lino Jesu wakali kuyabukomena mumaanu aciimo, alimwi wakaba mwana uuyandwa kapati a Leza alimwi abantu.