Luka 19

Jesu a Zakeyosi

¹ Jesu wakanjila mu Jeliko akwiindilila. ² Lino ooko kwakali muntu wakali kutegwa Zakkeyosi. Wakali simutelo mupati, alimwi wakalivubide. ³ Lino muntu ooyu wakayanda kubona Jesu, pele akaambo kakufwiimpa kwakwe taakakonzya kumubona bantu bakali banji. ⁴ Nkaako wakatijaanina kumbele akuyootanta mucisamu camukuyu kuti amubone mukuti Jesu nkwakeelede kwiinda. ⁵ Lino Jesu naakasika aawo, wakalungumana, wakati kulinguwe, “Zakeyosi, kofwambaana kuseluka, sunu ndeelede kuyookkala kuŋanda yako.”

⁶ Aboobo wakafwambaana kuseluka, wakatambula Jesu cakukondwa. ⁷ Eelyo bantu nibakabona boobo, bakatongooka akwaamba kuti, “Amubone, muntu ooyu waakusikila kuŋanda yamuntu sizibi.”

⁸ Zakeyosi wakaima akuti ku Mwami, “Komvwa, O Mwami! Mebo cisela calubono lwangu ndiyoocipa kubacete, alimwi naa kuli muntu ngundakacenga kulubono lwakwe, ndiyoomubweedezezya lubono lwakwe akuluyungizya ziindi zili zyone.”

⁹ Mpoonya Jesu wakati kulinguwe, “Sunu lufutuko lwasika kuŋanda eeyi, nkaambo ooyu muntu mwana wa Abulahamu, ¹⁰ kayi Mwanaa Muntu wakazida kuyandaula akufutula basweekede.”

Cikozyanyo camali aangolida

¹¹ Nibakacili kuswiilila makani aaya, Jesu wakabaambila cikozyanyo, mukuti wakali afwiifwi kusika ku Jelusalemu, alimwi balo bakali kuyeeya kuti bwami bwa Leza buli afwiifwi kusika. ¹² Wakati kulimbabo, “Kwakali mwaalumi wakali kulemekwa, wakatola lweendo kuya kucisi cakali kulaale kuti akapegwe bwami bwacisi eeco, kwamana akapiluke. ¹³ Katanainka wakaita babelesi bakwe bali kkumi akubapa boonse di lyomwe-lyomwe lyangolida, wabaambila kuti ‘Mwaapindaule mali aaya kuti ndaakuboola nzoojane mpindu yawo.’

¹⁴ “Pele basicisinyina tiibaali kuyanda kuti abe mwami. Aboobo bakatumya mulomo munsi lyakwe wakuti, ‘Swebo tatuyandi kuti muntu ooyo abe mwami wesu.’

¹⁵ “Nikuba boobo muntu ooyo wakaakupegwa bwami, amane wapiluka. Mbwaakasikila buyo, wakaita babelesi bakwe mbaakapede mali, kuti azibe nzibakajana mukupindauka kwabo. ¹⁶ Mutaanzi wakaboola wati, ‘Mwami, di lyako lyakajana aambi aali kkumi.’ ¹⁷ Mpoonya wakati kulinguwe, ‘Wakacita kabotu, omubelesi mubotu! Lino nkaambo wasyomeka kuzintu ziniini, ndilakucita kuti ube mweendelezi waminzi iili kkumi.’ ¹⁸ Awalo mubelesi wabili wakasika wati, ‘Mwami, di lyako lyajana aambi osanwe.’ ¹⁹ Mwami wakati kulinguwe, ‘Yebo ulaba mweendelezi waminzi yosanwe.’ ²⁰ Mubelesi wamamanino wakaboola wati, ‘Ndeeli di lyako. Ndalilivungaide mukasani akuliyobola. ²¹ Ndakayoowa, nkaambo uli mukali. Ulatola ncootakabikka, akutebula mpootakasyanga.’

²² “Mwami wakati kulinguwe, ‘Yebo omubelesi mubi! Tee kayi majwi aako omwini akuzula? Mbuli mbozi kuti ndimukali, ndatola zitali zyangu, alimwi ndatebula mpindatasyanga, ²³ ino nkaambo nzi ncootakapindaula di lyangu Kutegwa ndaboola njane mpindu?’ ²⁴ Mpoonya mwami wakabaambila bakaimvwi afwiifwi anguwe wakati, ‘Amumunyange ngolida, mwiipe kuli uujisi ngolida, zili kkumi!’ ²⁵ Balo bakati, ‘O Mwami, ulijisi kale ngolida zili kkumi.’ ²⁶ Mwami wakabaingula kuti, ‘Ooyo uujisi uyooyungizizilwa, pele uujisi kasyoonto uyoonyangwa koonse nkajisi nikaceya. ²⁷ Lino abaya basinkondoma batakali kuyanda kuti mbe mwami, amukabalete okuno, bazoojaigwe nkelangilila!’”

Jesu mbwaakanjila mu Jelusalemu

²⁸ Jesu naakamana kwaamba boobu, wakabasolweda kuya ku Jelusalemu. ²⁹ Naakasika kufwiifwi aminzi ya Betefage a Betani, kucilundu camisamu ya Oliva, wakatuma basikwiiya bakwe bobilo kuya mumunzi. ³⁰ Wakabalailila kuti, “Kamuya mumunzi uulya. Mwaakunjila buyo muyoojana mwanaa mbongolo uutanatantidwe muntu pe, ulisungidwe kucisamu. Mukamwaangunune mumulete kuno. ³¹ Kuti naa kukabe muntu uyoomubuzya kuti, ‘Ino mucitila nzi oobu?’ Mukamwaambile kuti, ‘Mwami ulamuyanda.’”

³² Eelyo bakainka akuyoojana mbubonya mbuli Jesu mbwaakabalailila. ³³ Lino nibakacili kumwaangununa, bamukamwini bakati, “Mumwaangunwida nzi mwanaa mbongolo?”

³⁴ Balo bakabaingula kuti, “Mwami uyanda kumubelesya.” ³⁵ Mpoonya bakamuleta kuli Jesu, bayala majansi aabo alinguwe, akumukkazika mpawo Jesu. ³⁶ Jesu naakali kuya buya ku Jelusalemu katantide amwanaa mbongolo bantu bakayala majansi aabo mumugwagwa.

³⁷ Naakasika afwiifwi a Jelusalemu aawo mugwagwa mpowakali kuselemukila munselelo lyacilundu ca misamu ya Oliva, nkamu yoonse yabaccilili bakwe yakatalika kukondwa akoongolola kulumbaizya Leza akaambo kamilimo mipati njibakabona. ³⁸ Bakati, “Mwami Leza, aaleleke Mwami ooyo uuboola muzina lyakwe! Kuli luumuno kujulu, a Leza ulalumbaizigwa!”

³⁹ Lino bamwi Bafalisi bakali munkamu yabantu bakati kuli Jesu, “O Mwiiyi, baambile baccilili bako baumune.”

⁴⁰ Walo wakabaingula kuti, “Nikuba kuti aaba baumune, mabwe alakonzya koompolola.”

Jesu mbwaakuulilila munzi wa Jelusalemu

⁴¹ Lino Jesu naakaswena afwiifwi amunzi wa Jelusalemu akuubona, wakuulilila. ⁴² Wakati, “Akaka noolizizi zintu zikonzya kukuletela luumuno! Pele ono zilisisidwe kuzwa kulinduwe! ⁴³ Nikuba boobo ayoosika mazuba notikabule coolwe, aawo basinkondonyoko nibayookusida mulindi uuyookuzinguluka, bakakubikke akati akukusinkila koonse koonse mane ukabule ambolikwabilila. ⁴⁴ Alimwi bayookumwaila ansi yebo omunzi. Bakkala mulinduwe bayoobanyonyoona boonse. Taakwe bbwe niliba lyomwe ndyobatikasiye kalili atala aabbwenyina, nkaambo tookaciziba ciindi Leza ncaakazide kuzookufutula!”

Jesu mbwaakaya kuŋanda ya Leza

⁴⁵ Jesu wakanjila muŋanda ya Leza akutalika kutanda baabo bakali kusambalila mumo, ⁴⁶ wakati kulimbabo, “Kulilembedwe kuti, ‘ŋanda yangu iyooba ŋanda yakukombela.’ Pele nywebo mwaicita ciyubilo cababbi!”

⁴⁷ Jesu wakali kwiisya muŋanda ya Leza mazuba oonse. Bapaizi basilutwe, bamayi ba Mulawo, abeendelezi babantu bamucisi bakali kuyandaula nzila yakuti bamujaye. ⁴⁸ Pele bakakacilwa kwiijana, nkaambo bantu boonse bakali kumuswiilila, akumvwisya nzyaakali kwaamba.