Luka 16

Mulangi simaanu

¹ Alimwi Jesu wakati kuli basikwiiya bakwe, “Kwakali muntu muvubi, wakajisi mulangi walubono lwakwe. Ooyo wakaambilizigwa kuli simalelo wakwe kuti wakali kusowaila lubono lwakwe. ² Lino simalelo wakwe wakamwiita mulangi ooyo akumubuzya kuti, ‘Ino makani nzi aaya ngindamvwa? Ndaambile kabotu-kabotu mbuli mbookalubelesya lubono lwangu, nkaambo njanda kukugwisya mumulimo wako.’ ³ Lino ooyo mulangi wakalyaambauzya mwini wati, ‘Ndacita buti, kayi simalelo wangu uyanda kundigwisya mulimo? Nsijisi nguzu zyakulima, alimwi kulomba ndalisenda. ⁴ Oo! mboobu mbwenticite kutegwa nkajane bantu bati kanditambule mumaanda aabo ndalesegwa mulimo.’ ⁵ Aboobo wakatalika kwiita bantu boonse bakakolotede lubono lwasimalelo wakwe. Kumutaanzi wakati, ‘Ino yebo mbookakweleta nzi kuli simalelo wangu?’ ⁶ Wakati ‘Madalamu aamafuta aaoliva aali mwaanda.’ Mpoonya mulangi wakati kulinguwe, ‘Nkooko nkaaka kapepa kalembwa zikoloto. Kkala fwambaana lemba makumi osanwe buyo.’ ⁷ Kuli wabili wakati, ‘Ino yebo wakakweleta nzi?’ Wakati, ‘Masaka aamaila aali mwaanda.’ Mbubonya buyo wakati kulinguwe, ‘Nkooko nkaaka kapepa kalembwa zikoloto. Lemba makkumi aali lusele buyo.’ ⁸ Abone boobo simalelo wakwe wakamulumbaizya mulangi ooyu uutasyomeki, nkaambo wakacita camaanu. Nkaambo bantunsi balaamaanu mukubamba makani aabo kwiinda bantu ba Leza.”

⁹ Alimwi Jesu wakacili kwaamba kuti, “Amulicitile cilongwe alubono lwamunyika muno, kutegwa lwaakumumanina mukatambulwe mumaanda aatamani. ¹⁰ Kufumbwa muntu uusyomeka kuzintu ziniini, nguusyomeka akuzipati, awalo uutasyomeki kuzintu ziniini, tasyomeki akuzipati. ¹¹ Aboobo kuti kamutasyomeki kulubono lwaanyika aano, ino nguni uuyoomusyoma akumupa lubono lwakasimpe? ¹² Alimwi kuti kamutasyomeki mukweendelezya lubono lwamuntu uumbi, ino nguni uutikamupe lubono lwanu lumugeme?

¹³ “Taakwe mubelesi uukonzya kubelekela bami bobilo. Nkaambo ulasula umwi ayande umwi, naa ulakakatila kuluumwi akusampaula umwi. Tamukonzyi kubelekela Leza abuvubi pe.”

Twaambo tumwi twa Jesu

¹⁴ Bafalisi nibakamvwa makani aaya, bakatalika kusabwida Jesu, nkaambo balo bakali kuyandisya mali. ¹⁵ Nkabela Jesu wakati kulimbabo, “Ndinywe bantu balibosya-bosya buyo kubantu, kakuli Leza uliizi myoyo yanu. Nkaambo eeco cilumbaizigwa akubaampuwo akati kabantu, ncisesemyo kuli Leza.

¹⁶ “Mulawo wa Mozesi amalembe aabasinsimi zyakali kutobelwa mane kusikila kuciindi ca Joni Mubbapatizi, pele kuzwida ciindi eeco Makani Mabotu aabwami bwa Leza akatalika kukambaukwa, alimwi bantu boonse balalwanina kuti banjile mubwami oobu. ¹⁷ Ncuubauba kuti julu anyika zimane kwiinda kuti kabala nokaba komwe ka Mulawo kamanizigwe.

¹⁸ “Kufumbwa mwaalumi uuleka mukaintu wakwe akukwata uumbi, wacita bumambe, awalo ooyo uukwata mukaintu wakalekwa kumwaalumi wakwe, walalika.

Muntu muvubi a Lazalo

¹⁹ “Kwakali muntu muvubi, wakali kusama zisani ziteteete, zibotu zidula, alimwi wakali kulya zilyo zibotu mazuba oonse aabuumi bwakwe. ²⁰ Kumane kwakali muntu mucete wabacete wakali kutegwa Lazalo, wakali aazilonda zinji-zinji. Wakali kuletwa kumulyango wamuntu muvubi ooyo, ²¹ wakali kulangila buyo kulya bufwefwelenga bwakali kuloka kuzwa atebule lyamuvubi ooyo. Babwa bakali kuboola akumyankuta zilonda zyakwe.

²² “Lino muntu mucete wakafwa, nkabela bangelo bakamubweza akumutola baakumukkazika kulubazu lwa Abulahamu. Musule ooyo muvubi wakafwa awalo akuzikkwa. ²³ Eelyo kali kumulilo uutamani wakanjila mumapenzi mapati kapati. Kuti alange, wakabona Abulahamu alaale a Lazalo kulubazu lwakwe. ²⁴ Mpoonya wakoongolola kuti, ‘Taata Abulahamu, ndifwida luzyalo, tuma Lazalo atompe munwe mumaanzi aatontola kuti azootontozye mulaka wangu, nkaambo ndapya kapati mumulilo muno!’

²⁵ “Pele Abulahamu wakati, ‘Mwanaangu, koyeeya kuti yebo nookali kupona wakalipedwe zintu zyoonse zibotu, pele Lazalo zibi. Lino omuno ulatangala yebo umvwide kucisa. ²⁶ Kunze lyaboobo, akati kesu ayebo kuli mulindi mulamfu cakuti taakwe muntu uuzwa ookuno uunga wakonzya kuuzubuka akuboola kooko, naba muntu uuzwa kooko uukonzya kuza kuno.’ ²⁷ Muntu muvubi wakati, ‘Taata, ndakukumbila kuti utume Lazalo kuŋanda yataata, ²⁸ kuli bana bokwesu bosanwe akabacenjezye kuti abalo batakabooli kokuno kubusena bwamapenzi.’ ²⁹ Pele Abulahamu wakati, ‘Bana bokwanu balijisi Mozesi abasinsimi abaswiilile nzobaamba.’ ³⁰ Muntu muvubi wakati, ‘Peepe, taata Abulahamu! Kuti naa umwi wabafu watumwa kulimbabo, bayoosanduka.’ ³¹ Abulahamu wakati, ‘Kuti naa tabamvwi Mozesi abasinsimi tabakooyoozumina nikuba kuti umwi wabuka kubafu.’”