Luka 10
Jesu mbwaakatuma bali makumi aali ciloba ababili
1 Musule akooku, Mwami wakasala bambi bali makumi aali ciloba ababili kuti basaangune, kabali mutukamu twababili babili. Wakabatuma muminzi amumasena oonse oomo mwaakalibambilide kuyoosika. 2 Wakati kulimbabo, “Kutebula kwavula kapati, pele batebuzi mbace. Aboobo amumukumbile Mwami wabutebuzi kuti atume abambi babelesi mumulimo wakwe wakutebula. 3 Kamuya! Pele amubone, ndamutuma mbuli bana bambelele akati kabaumpe. 4 Mutabwezi cikwama camali, niiba nkomo, niziba ndyasyo, alimwi mutanoosowi ciindi munzila kujuzyanya abantu pe. 5 Kufumbwa muŋanda mumwanjila amusaangune kwaamba kuti, ‘Luumuno alube kuŋanda iino.’ 6 Naa kuti kakuli muntu uuyandisya luumuno muŋanda oomo, luumuno lwanu luyooba alinguwe, pele kuti naa taakwe muntu uuli boobo, luumuno lwanu luyoomupilukila. 7 Muŋanda mumwanjila, mukalye akunywa kufumbwa nzomuyoopegwa. Nkaambo similimo ulida amulimo wakwe. Mutanoolongi-longi kuya mumaanda aambi. 8 Kufumbwa munzi ngomuyoonjila, kuti naa bamutambula, amukalye kufumbwa eeco ncobayoomupa. 9 Amukaponye balwazi bali mumunzi ooyo, alimwi mukaambe kuti ku bantu banguwo, ‘Bwami bwa Leza bwaswena afwiifwi kulindinywe.’ 10 Pele kuti mwasika mumunzi, nkabela bantu kabatamutambuli kabotu, mukainke mumigwagwa yamunzi ooyo mukaambe kuti, 11 ‘Noluba lusuko lwamunzi ooyu loonse lulamatide kumatende eesu twalukunkumuna kuti cibe cicenjezyo kulindinywe. Nikuba boobo amuzibe kuti bwami bwa Leza bwaswena afwiifwi kulindinywe!’ 12 Ncobeni ndamwaambila kuti mubuzuba bwalubeta Leza uyoopa mulandu mupati kumunzi ooyo kwiinda ngwaakapa kumunzi wa Sodomu!
Kusingililwa kwaminzi
13 “Maawe kulindinywe, nominzi ya Kolazini a Betesaida! Nkaambo kuti milimo yanguzu yakacitwa mulindinywe niyakacitilwa muminzi ya Taya a Sidoni, minzi yabantu bakunze, nibakeempa kale, kabakkala akusama masaka akulibikka twe kutondezya kuusa. 14 Pele ndamwaambila kuti mulandu wanu uyoobija kwiinda wa Taya a Sidoni! 15 Ayebo Kapenaumu! Sena uyeeya kuti bayookulumbaizya kujulu? Peepe, uyoosowelwa mumulilo uutamani.”
16 Alimwi Jesu wakati kuli basikwiiya bakwe, “Ooyo uumuswiilila, waswiilila ndime, ooyo uumukaka ukaka ndime, alimwi kufumbwa muntu uundikaka, wamukaka ayooyo wakandituma.”
Kupiluka kwabali makumi aali ciloba ababili
17 Lino aabo baalumi bali makumi aali ciloba bakatumidwe a Jesu bakapiluka akubotelwa kapati. Bakati kuli Jesu, “Mwami, myuuya mibi yakali kutuswiilila nitwakali kwiigwisya muzina lyako!”
18 Mpawo Jesu wakati kulimbabo, “Ndakamubona Saatani kawa mbuli lulabo kuzwa kujulu. 19 Amumvwe! Ndakamupa nguzu ziinda nguzu zyasinkondoma. Taakwe niciba comwe ciyoomucisa pe. 20 Nikubaboobo mutasekeleli akaambo kakuti myuuya mibi ilamuswiilila, pele kwiinda eeci, amusekelele nkaambo kakuti mazina aanu alilembedwe kujulu.”
Jesu mbwaakalumba
21 Nciconya ciindi eeco, Jesu wakasekelela mu Muuya Uusalala wakati, “Ndakulumba Taata, Mwami wajulu anyika kuti wayubunwida bantu buyo zintu nzookasisa kubasongo abamaanu. Mbombubo, Taata, mbocakakukonda!
22 “Zintu zyoonse zyapegwa kuli ndime a Taata. Taakwe naba omwe uundizi, pele Taata nduwe olikke. Alimwi taakwe muntu naba omwe uuzi Taata ccita ndime, ayooyo ngundayubunwida.”
23 Mpoonya Jesu wakaambila basikwiiya bakwe kumbali, wati, “Mulilelekedwe nimubona zintu eezi nzimubona! 24 Nkaambo ncobeni ndamwambila kuti basinsimi abami banji bakasungweede kuti babone zintu nzemubona pele taakwe nibakazibona pe, alimwi bakali kuyandisya kumvwa zintu nzomumvwa, pele taakwe nibakazimvwa.”
Cikozyanyo ca Musamaliya mubotu
25 Lino umwi mwiiyi wa Mulawo wakasika akusoleka kusunka Jesu. Wakamubuzya kuti, “O Mwiiyi, ino njelede kucita nzi kuti nkajane buumi butamani?”
26 Jesu wakamubuzya kuti, “Ino mu Mulawo kulembedwe buti? Uupandulula buti?”
27 Ooyu muntu wakaingula kuti, “‘Uleelede kuyanda Mwami Leza wako amoyo wako woonse, amuuya wako woonse, nguzu zyako zyoonse, amiyeeyo yako yoonse,’ alimwi ‘Uleelede kuyanda mweenzinyoko mbubonya mbuli mboliyanda omwini.’”
28 Mpoonya aawo Jesu wakati kulinguwe, “Waingula kabotu, kocita mbubonya oobo, uyoojana buumi butamani.”
29 Pele walo mwiiyi wa Mulawo mbwaakali kulilulamika wakati kuli Jesu, “Ino nguni mweenzuma?”
30 Jesu wakamwiingula kuti, “Umwi muntu wakali kweenda kuzwa ku Jelusalemu kuya ku Jeliko. Munzila wakafumpwa abafumpi, bakamujata, bamuuma akumusamununa. Bacimana bainka basiya ulinetukide. 31 Lino umwi mupaizi wakali kweenda munzila njiyonya eeyo, naakasika aakalede muntu ooyo, wakamubona, pele wakaleya, weenguluka, nguulya wainka. 32 Mulevi awalo mbubonya buyo, naakasika abusena aawo, abone buyo muntu ooyo kalede, wakaleya ambali, wainka.
33 “Pele umwi Musamaliya wakali kweenda munzila eeyo, wakasika abusena oobo. Naakabona muntu ooyo kalede, wakamufwida luzyalo. 34 Wakainka mpaakalede, wakatila mafuta alimwi awaini azilonda akumuzamba tusani, amane wamunyamuna, wamubikka ambongolo yakwe, wamutola kuŋanda yabeenzu nkwaakaakumubamba.
35 “Mubuzuba bwakatobela, Musamaliya ooyo wakapa mali obilo aansiliva kumulangi waŋanda. Wakamwaambila kuti, ‘Umubambe muntu ooyu, eelyo kufumbwa mali ngotisowe kwiinda aaya ndaboola ndilakubweedezezya.’”
36 Lino Jesu wakamanizya akubuzya mwiiyi wa Mulawo kuti, “Ino nguuli akati kabantu aaba botatwe ngoyeeya kuti wakalitondezya kuti mweenzinyina wamuntu uulya wakafumpidwe abafumpi?”
37 Mwiiyi wa Mulawo wakaingula kuti, “Nguyuulya wakamubeda aaluzyalo.” Jesu wakati, “Koya, ayebo ukacite mbubonya oobo.”
Jesu mbwaakaswaya Maata a Maliya
38 Lino Jesu abasikwiiya bakwe nibakali mulweendo lwabo, bakasika mumunzi umwi mwakali kukkala mukaintu uutegwa Maata. Nkabela mukaintu ooyu wakabatambula muŋanda yakwe. 39 Maata wakalijisi mwanookwabo musimbi uutegwa Maliya, ooyu, wakakkala munsi lya Jesu kaswiilila kwiisya kwakwe.
40 Ciindi eeci Maata wakagwitingene kubeleka. Nkaako wakaya kuli Jesu akuti, “Mwami, sena tobwene kuti mwanookwesu wandilekelezya milimo endike? Komwaambila andigwasye.”
41 Mwami wakati, “Maata, wagwitingana akukatazigwa azintu zinji-zinji. 42 Pele kuli cintu comwe buyo ciyandika. Maliya wasala cintu eeco ciluzi, ncatakanyangwi.”