Luka 1
Intalisyo
1 Nomuyandwa ba Teyofilusi,
Mbubonya mbomuzi bantu banji basoleka kulemba kwaambilizya kwamakani aacitika akati kesu. 2 Bakaalemba mbubonya mbuli mbotwakaambilwa abaabo bakazibona aameso zintu eezi kuzwa kumatalikilo. Aabo bakaambilizya Makani Mabotu aaya. 3 Eelyo ambebo, mbuli mbundakaatobela akwaazibisisya makani aaya oonse, ndabona kuti ncibotu kuti ndimulembele kabotu-kabotu makani aaya, nywebo nomulemekwa kapati, ba Teyofilusi. 4 Ndacita oobo kuti muzibe kasimpe kamakani aayo ngomwakaiisigwa.
Mbukwakaambilizyigwa kuzyalwa kwa Joni Mubbapatizi
5 Mumazuba mwami Helodi naakali kulela cisi ca Judiya kwakali mupaizi wakali kutegwa Zekaliya, wacibunga cabupaizi bwa Abija. Wakakwete mukaintu wamukwasyi wa Aloni, uuli mukwasyi wabupaizi awalo. Izina lyakwe wakali Elizabeti. 6 Boonse bakali bantu baluleme kuli Leza. Bakali kutobela amoyo woonse milawo amalailile aa Mwami Leza. 7 Pele taakwe nibakajisi mwana nkaambo Elizabeti taakali kuzyala. Limwi walo amulumi wakwe bakacembaala.
8 Bumwi buzuba Zekaliya wakali kucita mulimo wakwe wabupaizi muŋanda ya Leza, nkaambo bwakali musikilide bulizi bwakwe, 9 mukweendelana acilengwa cakali kutobela bapaizi. Wakasalwa kwiindila mukuuma cisolo kuti katenta tununkulizyo acipaililo. Aboobo wakanjila muŋanda ya Mwami Leza. 10 Ciindi Zekaliya naakali kutenta tununkilizyo, nkamu yabantu yakali kukomba mulubuwa. 11 Nkabela mungelo wakalibonya kulinguwe, kaimvwi kululyo lwacipaililo aakali kutentelwa tununkilizyo. 12 Zekaliya naakabona mungelo ooyo, wakakankama, wakayoowa kapati. 13 Mungelo wakati, “Utayoowi, Zekaliya! Leza wakumvwa kukomba kwako. Mukaintu wako Elizabeti uyoozyala mwana mulombe. Ukamuulike kuti Joni. 14 Uyoobotelwa akutangala aakuzyalwa, alimwi bantu banji bayoobotelwa abalo. 15 Nkaambo mwana ooyo uyooba muntu mupati kuli Leza, alimwi takanywi waini niciba cimwi cintu cikola, mbwatikazyalilwe buyo, unoyoozwide Muuya Uusalala. 16 Uyooboozya banji ba Baisilayeli ku Mwami Leza wabo. 17 Uyoosololwedwa a Mwami, unooli aanguzu mbuli zyakajisi musinsimi Elija. Uyoomvwanya mawisi abana babo alimwi. Uyoosandula bataswiilili kuti babe aamizeezo mbuli yabalulami. Uyoobambilila Mwami bantu bakwe.”
18 Zekaliya wakaambila mungelo wati, “Ani ndilaziba buti kuti eeci ncakasimpe? Bona mebo ndili mudaala, awalo mukaintu wangu wacembaala tacitumwa nsangwa.”
19 Mungelo wakati, “Mebo ndime Gabuliyele, uuima kubusyu bwa Leza. Walo wandituma kuzookwaambila makani mabotu aaya. 20 Pele toosyoma mulumbe wangu ooyo uuyocitika ciindi caakusika. Nkaako ulaba syaataambi mane kusikila zintu zyoonse eezi nzendakwaambila zikacitike.”
21 Ciindi eeci coonse bantu bakali kulindila Zekaliya akugambwa kuti naa ncinzi camumusya kuzwa muŋanda ya Leza. 22 Nkabela naakazwa taakakonzya kwaambaula kulimbabo, bakaziba kuti wakabona cilengaano muŋanda ya Leza. Wakatalika kutambaika buyo kulimbabo. Wakakkala kali cimuumu.
23 Naakamana mazuba aabulizi bwakwe, wakabweeda kuŋanda yakwe. 24 Bweende-bweende Elizabeti, mukaintu wakwe, wakamita, nkabela wakali kulisisa kwamyezi iili musanu, kalyaambauzya kuti, 25 “Ma, kumamanino Leza wandivuwa wagwisya masampu aangu kubantu.”
Mbukwakaambilizigwa kuzyalwa kwa Jesu
26 Nikwakainda myezi iili cisambomwe Elizabeti kamitide, Leza wakatuma Gabuliyele kuya kumunzi wa Nazaleta mucisi ca Galilii. 27 Wakamutuma kumusimbi uutezi musankwa wakakkalidwe kumwaalumi uutegwa Josefa walunyungu lwa Devedi. Musimbi ooyo izina lyakwe wakali Maliya. 28 Mungelo wakasika kulinguwe wakamwaambila kuti, “Wabonwa, luse lupati lwa Leza luli kuli nduwe, Mwami uli aanduwe!”
29 Pele Maliya wakapenzegwa kapati amajwi aaya. Wakalibuzya mumoyo wakwe alikke kuti, “Ino nkujuzigwa kuli buti ooku?” 30 Mpoonya mungelo wakati kulinguwe, “Utayoowi, Maliya, nkaambo Leza wakubeda aaluzyalo. 31 Uyoomita akuzyala mwana mulombe, uyoomuulika zina lya Jesu. 32 Uyooba mulemu, uyooitwa kuti Mwanaa Leza Sijulu wamajulu. Mwami Leza uyoomucita kuti abe mwami, mbuli Devedi wisi mbwaakabede. 33 Alimwi uyooba mwami wamusyobo wa Jakobo mane kukabe kutamani. Bwami bwakwe tabukamani pe!”
34 Mpoonya Maliya wakaambila mungelo kuti, “Ino inga eeci caba buti kulindime neentazi amwaalumi pe?” 35 Mungelo wakamwiingula wati, “Muuya Uusalala uyooboola alinduwe, anguzu zya Leza Sijulu wamajulu ziyookuvumbilila. Aboobo mwana uusalala ooyo ngoyoozyala, uyooitwa kuti Mwanaa Leza. 36 Uli muyeeyede Elizabeti musazinyoko, uulya wakali kutegwa tazyali? Ulimitide mwana mulombe nacembaala oobuya, mwezi uuno ngwacisambomwe. 37 Nkaambo kuli Leza taakwe citakonzeki pe!”
38 Maliya wakati, “Mebo ndimutwanga wa Mwami, akucitike kulindime mbubonya mbuli mbooamba.” Mpoonya mungelo wakamusiya wabweeda kujulu.
Maliya mbwaakaswaya Elizabeti
39 Mazuba ngoonya aayo, Maliya wakabweza lweendo wainka cakufwambaana kumunzi wakali muzilundu, mucisi ca Judiya. 40 Wakaakunjila muŋanda ya Zekaliya, wajuzya Elizabeti. 41 Eelyo Elizabeti naakamvwa kujuzya kwa Maliya, mwana ngwaakaminsi wakaputauka mwida. 42 Mpoonya Elizabeti wakazula Muuya Uusalala, wakapozomoka ajwi pati wakati, “Nduwe oolelekedwe kwiindilila mubakaintu boonse. Awalo mwana ngoyoozyala ulilelekedwe! 43 Ncoolwe cipati cili buti eeci kuli ndime, kuti ndiswaigwe banyina Mwami wangu? 44 Mboondijuzizya buyo, awalo mwana mwida waputauka cakubotelwa. 45 Ulilelekedwe nkaambo wakasyoma kuti makani ngookaambilwa ayoocitika ncobeni.”
Lwiimbo lwa Maliya lwakulumbaizya
46 Eelyo Maliya wakaamba kuti,
“Moyo wangu walumbaizya Mwami,
47 Muuya wabotelwa kapati, nkaambo ka Leza Mufutuli wangu.
48 Nkaambo wayeeya kulicesya kwangu ndemubelesi wakwe!
Kuzwa sunu mazyalani oonse ayoondiita kuti uulelekedwe.
49 Nkaambo kazintu zipati Leza Singuzuzyoonse nzyaandicitila.
Izina lyakwe lilasalala,
50 luzyalo lwakwe luli kuli boonse bamulemeka,
kuzwa kuzyalani limwi kusikila kuli limwi.
51 Watandabika janza lyakwe lyanguzu mpati,
wamwaya bantu bali aamakanze aakulisumpula mumyoyo yabo.
52 Wagwisya bami basinguzu kuzwa muzyuuno zyabwami,
wasumpula balibombya.
53 Bafwa nzala bakkuta zintu zibotu,
Bavubi wabatanda acinkwamaanza.
54 Cisyomyo ncaakapa kumatata wacibamba,
wagwasya Isilayeli mubelesi wakwe,
55 taaluba kutondezya luzyalo lwakwe kuli Abulahamu,
akulunyungu lwakwe mane kukabe kutamani!”
56 Maliya wakakkala a Elizabeti kuyanda kumana kwamyezi yotatwe, amane wakajokela kumunzi.
Kuzyalwa kwa Joni Mubbapatizi
57 Lino nicakasika ciindi ceelede Elizabeti wakazyala mwana mulombe. 58 Ciindi beenzinyina abasazinyina nibakamvwa mbuli Leza mbwakatondezya luzyalo lupati kuli Elizabeti, bakasekelela antoomwe anguwe.
59 Eelyo mwana naakaba aamazuba aali lusele bakasika kuti bamupalule, bakali kuyanda kumuulika kuti Zekaliya, mbuli wisi. 60 Pele banyina bakati, “Peepe, ulaulikwa kuti Joni.”
61 Bantu bakati, “Taakwe naba omwe wamukowa wako wakaulikwa zina eeli!” 62 Mpoonya bakatambaikila Zekaliya wisi, kumubuzya zina ndyaakali kuyanda kuulika mwana.
63 Zekaliya wakakumbila cilembelo, walemba kuti, “Zina lyakwe ngu Joni.” Eeci cakabagambya kapati bantu boonse. 64 Mbwaakalembela buyo, wakakonzya kwaambaula alimwi, wakatalika kulumbaizya Leza. 65 Beenzinyina boonse bakayoowa kapati, alimwi makani aazintu eezi akamwaika mbocili cisi coonse camalundu aa Judiya. 66 Boonse bakamvwa zintu eezi bakazibamba mumoyo, bakabuzya kuti, “Ino ooyu mwana uyooba muntu uuli buti?” Nkaambo cakaboneka kuti nguzu zya Leza zyakali aanguwe.
Zekaliya mbwaakasinsima
67 Lino Zekaliya, wisi wakazula Muuya Uusalala, wasinsima wati,
68 “Atumulumbaizye Mwami,
Leza wa Isilayeli!
Waboolela kugwasya bantu bakwe wabanununa.
69 Watupa Mufutuli Singuzu,
uuzwa kulunyungu lwamuntu wakwe Devedi.
70 Mbubonya mbuli mbwaakaamba nsiku,
kwiindila mubasinsimi bakwe basalala.
71 Kuti uyootufutula kuzwa kuli basinkondoma,
aabo batusulide.
72 Wakaamba kuti uyootubeda aaluzyalo mbuli mbwaakabeda matata aaciindi,
alimwi uyoobamba cizuminano cakwe cisalala.
73 Acikonke cipati wakasyomezya kuli taata Abulahamu,
74 wakasyomezya kuti uyootuvuna kuzwa kuli basinkondoma,
kutegwa tukamubelekele cakutayoowa,
75 akweenda cabusalali abululami,
mazuba aabuumi bwesu boonse.
76 Yebo, omwanaangu, uyooitwa kuti musinsimi wa Leza Sijulu wamajulu.
Uyoosololela Mwami kuti akamululamikile nzila.
77 Uyoozibya bantu bakwe kuti bayoofutulwa,
kwiindila mukulekelelwa zinyonyoono zyabo.
78 Leza wesu ulaalwengelelo,
nkaambo mmutete moyo,
uyootumunikila alufutuko lwakwe mbuli mumuni wakubucedo.
79 Uyoomunikila bakkede mumudima amucimvule calufu.
Uyootweenzya munzila yaluumuno.”
80 Eelyo mwana ooyo wakakomena akuyuma-yuma mumuuya. Wakakkala munkanda mane kusikila buzuba mbwaakalitondezya antangalala kubantu ba Isilayeli.