Kulonga 8

Baijipiti mbubakapenzegwa abacula

¹ Lino Mwami Leza wakati kuli Mozesi, “Koya kuli Falo ukamwaabile kuti, ‘Mboobu mbwaamba Mwami Leza. Baleke bantu bangu bainke kutegwa bakandikombe. ² Pele kuti naa ubakasye bantu bangu kuunka, ndiyoosubula cisi cako coonse abacula. ³ Mulonga uyoozula bacula balo bayoosika muŋanda yako yabwami, akuzyuli nkolala, aabulo, amumaanda abalupati-pati bako, amumaoveni aako, amumpoto zyako. ⁴ Mane bazookunamatila amubili wako, aamibili yabantu bako, aali balupati-pati bako boonse.’”

⁵ Kumane Mwami Leza wakati kuli Mozesi alimwi, “Mwaambile Aloni kuti, ‘Tandabika musako wako atala lyamilonga, tunkolola amaziba, ucite bacula kuti baze anyika ya Ijipiti.’” ⁶ Nkaako Aloni wakatandabika janza lyakwe atala lyamaanzi oonse, nkabela kwakazwa bacula bakazuzya nyika ya Ijipiti. ⁷ Pele abalo basimabibo mumabibo aabo bakapanga bacula, bakazwa mumulonga baza anyika ya Ijipiti. ⁸ Lino Falo wakaita Mozesi a Aloni wakati, “Amukombe ku Mwami Leza kuti abagwisye bacula kuzwa kulindime akubantu bangu, eelyo ndiyoobaleka bantu bakwe kuti bainke bakape zipaizyo ku Mwami Leza.”

⁹ Mozesi wakati kuli Falo, “Mbubo, ndipa ciindi nentikakukombele abalupati-pati bako, abantu bako kuti bacula bazwe akusiya maanda aanu, kabajanika buyo mumulonga.” ¹⁰ Falo wakaingula kuti, “Juunza mabala.” Mpoonya Mozesi wakati, “Ciyoocitika mbuli mbooamba, kutegwa ukazibe kuti taakwe uumbi uuli mbuli Mwami Leza wesu. ¹¹ Bacula bayoozwa kukusiya yebo, amaanda aako, abalupati-pati bako, abantu bako, banoojanika mumulonga buyo.” ¹² Mpoonya Mozesi a Aloni bakasiya Falo. Eelyo Mozesi wakakomba ku Mwami Leza amakani aabacula, mbubonya mbubuli mbobakazuminana a Falo. ¹³ Eelyo Mwami Leza wakacita mbubonya mbuli mbwaakakumbila Mozesi, bacula bakali mumaanda, amubbuwa, amumyuunda bakamana kufwa. ¹⁴ Aboobo Baijipiti bakalundika milwi-milwi yabacula, mane nyika yoonse yakanunka nsu. ¹⁵ Pele Falo naakabona kuti zintu zyeenda kabotu, wakaba sicinguni alimwi, taakwe naakaswiilila ba Mozesi a Aloni mbubonya mbuli bwakaambide Mwami Leza.

Baijipiti mbubakapenzegwa abususuli

¹⁶ Lino Mwami Leza wakaambila Mozesi kuti, “Mwaambile Aloni kuti, ‘Uma nyika amusako wako, eelyo lusuko lulasanduka bususuli mu Ijipiti yoonse.’” ¹⁷ Aloni wakacita oobo. Wakatandabika janza lijisi musako wakwe akuuma nyika, mpoonya bwakasika bususuli akati kabantu aakati kabanyama. Loonse lusuko lwamu Ijipiti lwakasanduka lwakaba bususuli. ¹⁸ Abalo basimabibo bakasola amabibo aabo munzila eeyi njiyonya kuti balete bususuli, pele bakakacilwa. Nkaako kwakali bususuli kubantu akubanyama. ¹⁹ Lino basimabibo bakaambila Falo kuti, “Ooyu mmunwe wa Leza wacita ceeci.” Pele Falo wakacili sicinguni, wakakaka kuswiilila Mozesi a Aloni, mbubonya mbuli bwakaambide Mwami Leza.

Baijipiti mbubakapenzegwa anzinini

²⁰ Lino Mwami Leza wakaambila Mozesi kuti, “Ubuke cifumo-fumo, ukalindilile Falo ciindi naya kumulonga. Ukamwaambile kuti, mboobu mbwaamba Mwami Leza, ‘Leka bantu bangu bainke kuti bakandikombe. ²¹ Kuti naa utabaleki kuti bainke, ndiyootumina makata-makata aanzinini alinduwe abalupati-pati bako amumaanda aako, zizoozula mumaanda aako, aansi mpobeendela ziyooba nzinini zyalo.’ ²² Pele nikuba boobo ndiyoocita kuti nzinini zitakasiki ku Gosyeni ooko kukkede bantu bangu, kutegwa ukazibe kuti mebo nde Mwami Leza, ndime eendi munyika eeyi. ²³ Oobo mbweyooandaanya bantu bangu abantu bako. Aaya maleele ayoocitika juunza.” ²⁴ Mwami Leza wakacita eeci, aboobo makata-makata aanzinini akasika muŋanda ya Falo, amumaanda aabalupati-pati bakwe, amunyika yoonse ya Ijipiti. Nyika yakapenga kapati kunzinini.

²⁵ Mpoonya Falo wakaita Mozesi a Aloni akubaambila kuti, “Kamuya mukape zipaizyo kuli Leza wanu mumonya muno munyika.” ²⁶ Pele Mozesi wakati, “Tacili cibotu kucita oobo pe, nkaambo ciyoobijila Baijipiti akaambo kabanyama mbotupaizya ku Mwami Leza wesu. Kuti naa twapaizya antangalala banyama mbobatayandi, inga cilabanyemya nkabela balatuuma mabwe. ²⁷ Tweelede kutola lweendo lwamazuba otatwe munkanda kuti tukape zipaizyo ku Mwami Leza wesu, mbubonya mbuli mbwaakatulailila walo.”

²⁸ Falo wakati, “Ndilamuleka kuti mukapaile ku Mwami Leza wanu munkanda, kuti naa mutakainki kule. Amebo mukandikombele.”

²⁹ Eelyo Mozesi wakaamba kuti, “Mbwetuunke buyo, ndiyookomba ku Mwami Leza kuti juunza mabala zizoozwe nzinini kulinduwe akuli balupati-pati bako, alimwi akubantu bako. Pele toelede kuti utucenge alimwi, kuti ukasye bantu kuunka kukupaizya ku Mwami Leza.”

³⁰ Mpawo Mozesi wakazwa, wasiya Falo, waakukomba ku Mwami Leza ³¹ awalo Mwami Leza wakacita mbubonya mbuli bwakakumbila Mozesi. Makata-makata aanzinini akazwa akusiya Falo, abalupati-pati bakwe, abantu bakwe. Taakwe ayomwe nzinini yakasyaala pe. ³² Nikuba kuciindi eeci, Falo wakacili sicinguni alimwi, wakakasya bantu kuunka.