Kulonga 7

¹ Lino Mwami Leza wakati kuli Mozesi, “Swiilila ndiyookucita kuti yebo ukabe mbuli Leza kuli Falo, nkabela Aloni mwanookwanu ngunookutolokela, uyoobambuli musinsimi wako. ² Unooambila Aloni zyoonse nzendikulailila, walo nguunooambila Falo kuti aleke Baisilayeli bazwe mucisi cakwe. ³ Pele Falo ndiyoocita kuti abe sicinguni cakuti nikuba kuti ndikacite maleele azigambya mu Ijipiti, ⁴ Takooyookuswiilila yebo pe. Ndendilyo nenjootondezya nguzu zyangu mu Ijipiti, ndaakubatundulula, ndamana neyoosolweda bantu bangu mumisyobo yabo. ⁵ Aawo Baijipiti bayooziba kuti ndime Mwami Leza, ndaakutondezya janza lyangu lyanguzu mu Ijipiti akugwisya Baisilayeli kuzwa munyika yabo.” ⁶ Mozesi a Aloni bakacita mbuli Mwami Leza mbwaakabalailila. ⁷ Mozesi wakali aamyaka iili makumi aali lusele, walo Aloni wakajisi myaka iili makumi aali lusele amyaka yotatwe ciindi nibakali kwaambaula kuli Falo.

Mozesi a Aloni mbubakacita zigambya kuli Falo

⁸ Mwami Leza wakaambila Mozesi a Aloni, ⁹ “Kuti naa Falo akamwaambile kuti, amulitondezye lwanu kwiindila mukucita maleele, ukaambile Aloni kuti, ‘Bweza musako wako, uuwaale ansi kumbele lya Falo eelyo uyooba nzoka.’” ¹⁰ Eelyo Mozesi a Aloni bakainka kuli Falo akuyoocita mbubonya mbuli Mwami Leza mbwaakabalailila. Aloni wakaakuwaala musako wakwe kumbele lya Falo abalupati-pati bakwe, mpawo wakaba nzoka. ¹¹ Abone boobo awalo Falo wakaita bantu bakwe basongo, baŋanga, abasimabibo aabo bakacita mbubonya. ¹² Bakawaala misako yabo ansi, mpawo yakaba nzoka. Pele musako wa Aloni wakamena misako eeyo. ¹³ Nikuba boobo Falo wakacili sicinguni, nkaako taakwe naakabaswiilila, mbubonya mbuli bwakaambide Mwami Leza.

Maanzi mbwaakasanduka kuba bulowa

¹⁴ Lino Mwami Leza wakati kuli Mozesi, “Moyo wa Falo mmuyumu, wakaka kuleka bantu bangu kuti bainke. ¹⁵ Ukainke kuli Falo cifumo-fumo, ciindi naya kumulonga. Ukamulindilile ankomwe yamulonga. Nkabela ukatolelezye musako wakasandukide nzoka. ¹⁶ Ukati kuli Falo, ‘Mwami Leza, Leza wa Bahibulu wandituma kuzookwaambila kuti, Leka bantu bangu bainke bakandikombe munkanda.’ Langa kusikila cecino ciindi tooswiilila pe. ¹⁷ Mboobu mbwamba Mwami Leza, ‘Lino aceeci ulaziba kuti ndime Mwami Leza. Langa, amusako ooyu uuli mujanza lyangu ndilauma maanzi aamulonga wa Nailo, nkabela alasanduka kuba bulowa. ¹⁸ Nkaako nswi zilafwa alimwi maanzi aawo alanunka cakuti Baijipiti balasesemwa kwaanywa.’”

¹⁹ Lino Mwami Leza wakati kuli Mozesi, “Ambila Aloni kuti, ‘Bweza musako wako, uuunyamune akuutandabika atala aamaanzi oonse mu Ijipiti, kumilonga, atunkolola, amaziba. Maanzi alaba bulowa, alimwi munyika yoonse kulaba bulowa azitekelo zyazisamu zyoonse alimwi amunkomeki zyamabwe.’”

²⁰ Eelyo Mozesi a Aloni bakacita mbubonya mbuli mbwaakabalailila Mwami Leza. Mpoonya aawo Falo abalupati-pati bakwe kabalangilila, Aloni wakatandabika musako wakwe akuuma maanzi mumulonga, nkabela oonse maanzi akasanduka bulowa. ²¹ Inswi zyakafwa, alimwi awalo mulonga wakanunka nsu cakuti Baijipiti tiibakakonzya kunywa maanzi aanguwo. Nkabela kwakaba bulowa munyika yoonse ya Ijipiti. ²² Mpawo abalo basimabibo bamu Ijipiti bakacita mbubonya buyo amabibo aabo, eelyo Falo wakacili sicinguni mbubonya buyo. Taakwe naakaswiilila Mozesi a Aloni, mbubonya mbuli bwakaambide Mwami Leza. ²³ Nkabela Falo wakabweeda kuŋanda yakwe, kaatakwe akulimvwa bubi aceeco. ²⁴ Baijipiti boonse bakali kusya munkomwe yamulonga kuti bajane maanzi aakunywa, nkaambo tiibakakonzya kunywa maanzi aamumulonga.

²⁵ Kwakainda mazuba aali ciloba kuzwa ciindi Mwami Leza naakuubisya mulonga.