Kulonga 6
1 Mpoonya Mwami Leza wakati kuli Mozesi, “Ulacibona lino ncentimucite Falo. Njoomusinikizya kuti aleke bantu bangu bainke. Njoomusinikizya buya kuti abatande kuzwa mucisi cakwe.”
Leza mbwaakayumya-yumya Mozesi
2 Leza wakaambila Mozesi kuti, “Ndime Mwami Leza. 3 Ndakalitondezya kuli Abulahamu, akuli Izaka, alimwi akuli Jakobo, mbuli Leza Singuzuzyoonse. Pele zina lyangu lyakuti Mwami Leza taakwe nindakaliyubununa kulimbabo. 4 Alimwi ndakacita ambabo cizuminano cangu, akusyomezya kuyoobapa nyika ya Kenani, nyika oomo mobakakkede mbuli basikutuntulika. 5 Lino ndakumvwa kulilauka kwa Baisilayeli aabo mbobakacita bazike Baijipiti, aboobo ndaciyeeya cizuminano cangu. 6 Mbombuboobu yebo mboelede kwaambila Baisilayeli kuti ndati, ‘Ndime Mwami Leza, ndiyoomwaangununa kuzwa kumilimo iiminya njobamusungilizya kucita Baijipiti. Ndiyoomuvuna kuzwa mubuzike bwanu kulimbabo. Njoomunununa akuboko kwangu kwanguzu ambeta mpati. 7 Ndiyoomutambula mbuli bantu bangu, ambebo ndiyooba Leza wanu. Ndendilyo nimuyooziba kuti ndime Mwami Leza wanu wamwaangununa kuzwa kumilimo iiminya ya Baijipiti. 8 Ndiyoomutola kunyika eeyo njindakasyomezya cakusinizya kuli Abulahamu, Izaka, a Jakobo. Ndiyoomupa kuti ikabe yanu. Ndime Mwami Leza.’” 9 Nkabela Mozesi wakaakwaamba makani aaya ku Baisilayeli, pele taakwe nibakamuswiilila, nkaambo bakalityompedwe akaambo kamapenzi aabo aabuzike.
10 Mwami Leza wakati kuli Mozesi, 11 “Koya ukaambile Falo kuti uleelede kubaleka Baisilayeli kuti bazwe mucisi cakwe.” 12 Pele Mozesi wakaambila Mwami Leza kuti, “Nibaba Baisilayeli tabandiswiilili, ino walo Falo inga wandiswiilila buti neendaakamaama?” 13 Pele Mwami Leza wakaambila Mozesi a Aloni kuti bacenjezye Baisilayeli alimwi a Falo, kuti twaambilwa kugwisya Baisilayeli kuzwa mu Ijipiti.
Mazyalani aa Mozesi a Aloni
14 Aaba mbabapati bamikwasyi. Bana ba Lubeni, mwana wakusaanguna wa Isilayeli, bakali ba Hanoki, Palu, Heziloni a Kaami, aaba mbabaciinga ca Lubeni. 15 Bana ba Simiyoni bakali, Jemuweli, Jamini, Ohadi, Jakini, Zohaa, a Syaulu mwanaa mukaintu Mukenani. Aaba mbabaciinga ca Simiyoni. 16 Aaya ngamazina aabana ba Levi alunyungu lwabo mbaa: Gesyoni, Kohati, a Melali. Levi wakapona myaka iili mwaanda amakumi otatwe aciloba. 17 Aaba mbabana baciinga ca Gesyoni, Libini a Syimeyi, abamikwasyi yabo. 18 Bana ba Kohati mbaaba, Amulamu, Izihaa, Hebuloni a Uziyeli. Kohati wakapona myaka iili mwaanda amakumi otatwe aitatu. 19 Bana ba Melali mbaaba: Mali a Musyi. Aaba mbabaciinga ca Levi, amikwasyi yabo.
20 Amulamu wakakwata mucizi wawisi uutegwa Jokebedi, wakazyala Aloni a Mozesi. Amulamu wakapona myaka iili mwaanda amakumi otatwe aciloba. 21 Bana ba Izihaa mbaaba: Kola, Nefegi, a Zikili. 22 Bana ba Uziyeli mbaaba: Misyayeli, Elisafani, a Sitili. 23 Aloni wakakwata Elisyeba mwana wa Aminadabu mucizi wa Nasyoni. Walo wakazyala Nadabu, Abihu, Eliyazaa a Itamaa. 24 Bana ba Kola mbaaba: Asili, Elikana a Abiyasafu. Aaba mbabaciinga ca Kola. 25 Lino Eliyazaa mwana wa Aloni wakakwata umwi wabana ba Putiyeli, wakazyala Finehasi. Aaba mbabasololi bamikwasyi muciinga ca Balevi, mukwasyi amukwasyi.
26 Aaba mbabonya ba Aloni a Mozesi mbaakaambila Mwami Leza kuti, “Bagwisye Baisilayeli mu Ijipiti, kabali mumakamu-makamu aabo.” 27 Mbabonya aaba ba Mozesi a Aloni mbabakaambila Falo, kuti aangunune Baisilayeli.
Mwami Leza mbwaakalailila Mozesi a Aloni
28 Mwami Leza naakakanana kuli Mozesi kacili mu Ijipiti 29 wakati, “Ndime Mwami Leza. Umwaambile Falo zyoonse nzindakwaambila.” 30 Pele Mozesi wakati ku Mwami Leza, “Bona, ulizi kuti mebo ndisikamaama, ino inga Falo wandiswiilila buti?”