Kulonga 35

Milawo yabuzuba bwa Sabata

¹ Lino Mozesi wakabunganya buleya boonse bwa Baisilayeli antoomwe, akuti kulimbabo, “Mboobu mbwaamulailila Mwami Leza kuti mucite. ² Muyoobeleka milimo yanu kwamazuba aali cisambomwe, pele buzuba bwaciloba buyooba buzuba busalala kulindinywe, mbuzuba bwakulyookezya bupedwe ku Mwami Leza cakumaninina. Kufumbwa muntu uyoocita mulimo mulimbubo uleelede kujaigwa. ³ Alimwi tamweelede akukutula mulilo mumaanda aanu mubuzuba bwa Sabata.”

Mulumbo watente lya Leza

⁴ Lino Mozesi wakaambila Baisilayeli boonse, kuti “Mboobu Mwami Leza mbwaalailila. ⁵ Muleelede kupa mulumbo ku Mwami Leza. Woonse uuyanda weelede kupa mulumbo wangolida, nsiliva amukuba, ⁶ masani acijulu-julu, aacisombo aasalala pyu, alimwi amasani aandeketela, aaboya bwampongo, ⁷ zikutu zyabagutu zyakanyikwa mucisila, zikutu zyakasukwa kabotu, mapulanga aamulombe, ⁸ mungwimba wamumalambe, tununkilizyo twamafuta aakunana atwakuumpilila, ⁹ mabwe amakwalala aacibize, amabwe meebesi aakubikka akasani kaacamba kabupaizi.”

Zintu zyamutente lyakukkalila

¹⁰ “Lino boonse bantu basibuuya mukati kanu baleelede kuboola akuzoocita zintu zyoonse eezyo Mwami Leza nzyaakalailila, ¹¹ nkokuti tente lya Leza, aciluli calyo, acivunisyo calyo, angobyoobyo zyalyo, azicinda zyalyo, azipinzyo zyalyo, amisemo yalyo, alimwi aziimino zyalyo, ¹² bbokesi lyacizuminano, atukulisyo twalyo, civunisyo calyo, asani lyacisitilizyo, ¹³ tebule atukulisyo twalyo, azibelesyo zyalyo, acinkwa cituulwa ku Mwami Leza, ¹⁴ cikkazikilo calambe lyakupa mumuni azyakubelesya zyaco, amalambe aaco, amingwimba yamalambe, ¹⁵ cipaililo cakutentela tununkilizyo, atukulisyo twaco, mafuta aakunana, tununkilizyo tubotu, asani lyakucingilizya lyaamulyango watente lya Leza, ¹⁶ cipaililo cazipaizyo zyakutenta, cijisi ambaula zyamukuba, tukulisyo twalyo alimwi azibelesyo zyalyo zyoonse, amutiba wakusambila, atako lyawo, ¹⁷ masani aakusitilizya bbuwa amisemo, alimwi aziimino zyawo, sani lyakusitilizya kumulyango wabbuwa, ¹⁸ nembe zyatente lya Leza, anembe zyabbuwa zyazyo, ¹⁹ azisani zibotu zyamulimo wabupaizi mubusena busalala, zisani zisalala zyamupaizi Aloni, abana bakwe nobacita mulimo wabo wabupaizi.”

Bantu mbubakaleta mulumbo

²⁰ Mpawo Baisilayeli boonse bakasiya Mozesi, ²¹ lino umwi aumwi mbwaakali kulimvwa wakaleta mulumbo ku Mwami Leza wakuyasya tente lyakuswaanganina, azintu zimwi zyoonse zyakali kuyandika mumilimo, azyakulusya zisani zisalala. ²² Baalumi abakaintu bakaza, boonse bakali kuyanda bakaleta mpande zyakubotya, tunkwinta-nkwinta, nweenwe, tuwenge, amisyobo iindene-indene yatulisakatizyo twangolida, akuzipa ku Mwami Leza. ²³ Kufumbwa muntu wakajisi mulembo wacijulu-julu wacisombo alimwi ausalala pyu atutali toosedwe kabotu, naa boya bwampongo, zikutu zyabagutu zyakanyikwa mucisila naa zikutu zyakasukwa kabotu wakaleta kufumbwa ncaakajisi, ²⁴ boonse bakali kukonzya kupa nsiliva naa mukuba bakazipa ku Mwami Leza, abaabo boonse bakajisi mapulanga aamulombe aakali kukonzya kubelesegwa mukuyasya bakaaleta. ²⁵ Abalo bakaintu bauya bakali kuluka milembo yacijulu-julu, yacisombo alimwi aisalala pyu atutali toosedwe kabotu, bamane bakaileta. ²⁶ Alimwi boonse bakaintu bakali bauya alimwi bakali kukonzya bakaluka zyaboya bwampongo. ²⁷ Abalo basololi bakaleta mabwe aamakwalala aacibize meebesi aakukabaki kubupaizi alimwi aakasani kaacamba, ²⁸ tununkilizyo, mungwimba wamumalambe, atununkilizyo twamafuta aakunana atwakuumpilila. ²⁹ Boonse baalumi abakaintu Baisilayeli aabo bakali kukonzya kupa mulumbo wakuliyandila ooyu Mwami Leza ngwaakalailila kwiindila muli Mozesi bakacita oobo.

Babelesi bamutente

³⁰ Lino Mozesi wakati ku Baisilayeli, “Mwami Leza wasala Bezaleli mwana wa Uli, mwanaa Hula, wamusyobo wa Juda. ³¹ Wamuzuzya a Muuya wa Leza kutegwa abe amaanu, busongo abuuya, alimwi aluzibo mumilimo yoonse yamaanza, ³² kuti akonzye kucita zintu zyeebeka akuzibumba angolida, nsiliva, alimwi amukuba, ³³ kubeza mabwe meebesi kusyomaika, kubeza zisamu, akucita milimo imwi yeebeka mibotu. ³⁴ Nkabela kulinguwe alimwi akuli Oholiyabu mwana wa Ahisamaki wamusyobo wa Dani, Mwami Leza wapa maanu aakukonzya kwiisya. ³⁵ Wapa maanu manji aakucita milimo yoonse yamaanza, mbuli kuluka, kucekaula milembo iiindene-indene yacijulu-julu, yacisombo alimwi aisalala pyu atutali toosedwe kabotu.”