Kulonga 33
1 Lino Mwami Leza wakati kuli Mozesi, “Busiye busena buno, yebo abantu aabo mbookagwisya munyika ya Ijipiti, muye kunyika eeyo njendakasyomezya kuli Abulahamu, Izaka, a Jakobo, aawo nindakati kulimbabo, ‘Njooipa nyika eeyi kubana banu.’ 2 Ndiyootuma mungelo kumbele lyanu. Ndiyoobatanda Bakenani, Baamoli, Bahiti, Bapelezi, Bahivi, alimwi a Bajebusi. 3 Kamuya kunyika iikunka mukupa abuci. Pele mebo lwangu nsikooyooinka anywebo, nkaambo muli basicinguni, nkaambo inga ambweni ndamubukila munzila akumujaya.”
4 Lino bantu nibakamvwa makani aaya, bakatalika kulila, nkabela taakwe naba omwe wakalisakatizya atulibotezyo.
5 Mpoonya Mwami Leza wakati kuli Mozesi, “Baambile Baisilayeli kuti, ‘Muli basicinguni. Kuti naa ndainka anywebo nikuba kwakaindi kaniini buyo, inga ndamunyonyoona do. Lino amusamunune tulibotezyo ntomulisakatizizye ndendilyo nenga ndaziba ncenjoomucitila.’” 6 Aboobo mbubakazwida buyo kucilundu ca Sinai, Baisilayeli tiibakacili kusama limbi tulibotezyo pe.
Itente lyakuswaanganina
7 Lino Mozesi wakali kubweza tente eeli ndyaakaulika kuti, “Tente lyakuswaanganina,” akuyoolisimpila kunze azivuka aalaale. Kufumbwa muntu wakali kuyanda kubuzya ku Mwami Leza, wakali kuunka ooko kutente lyakuswaanganina. 8 Kufumbwa ciindi Mozesi naakali kuunka ooko bantu banoonga banyamuka, umwi aumwi wakali kwiima amulyango watente lyakwe akulangilila Mozesi mane do akasike akunjila mulindilyo. 9 Lino ciindi Mozesi naakali kunjila mutente, kwanoonga kwaboola musumpuululu wakkumbi wazookkala amulyango watente, eelyo kwakali kunga Mwami Leza waambaula kuli Mozesi kuzwa mukkumbi oomo. 10 Bantu nibakali kubona kkumbi eelyo amulyango watente, bakali kunga baima, lino umwi aumwi, wakali kukotama ansi amulyango watente lyakwe. 11 Aboobo Mwami Leza wakali kwaambaula a Mozesi kabalangene, mbubonya mbuli muntu mbwaambaula amweenzinyina. Eelyo kwamana, Mozesi wakali kubweeda kuzivuka. Pele walo mukubusi ooyo wakali mubelesi wakwe, Josyuwa mwanaa Nuni, taakwe naakali kuzwa atente eelyo.
Mwami Leza mbwaakasyomezya kuti unooli ambabo
12 Lino Mozesi wakati ku Mwami Leza, “Masimpe wakandaambila kuti ndisolwede bantu aaba kunyika eeyo, pele taakwe nookandaambila kuti naa nguni ngoyootuma kuunka andime. Pele yebo wakati, ‘Ndilizi kabotu, alimwi ndabotelwa anduwe.’ 13 Lino naa koboteledwe ncobeni andime, ndakukumbila kuti undaambile makanze aako mbwaabede kuti nkenookubelekela kabotu akukubotezya. Alimwi koyeeya kuti ooyu mmusyobo wabantu bako.”
14 Mpoonya Mwami Leza wakati, “Ndiyooinka ayebo, alimwi ndiyoopa kuti ukalikkalile.”
15 Mozesi wakati, “Kuti naa tokooinka andiswe nkokuti tutasiyi busena buno. 16 Alimwi ani muntu ulaziba buti kuti uliboteledwe abantu bako akubotelwa mulindime kuti toinki aswebo? Tee kayi, kutusindikila kwako nkokubonya kuti tulaandeene abantu bamwi bamunyika?”
17 Mpoonya Mwami Leza wakati kuli Mozesi, “Ndilacita mbubonya mbuli mbooamba, nkaambo kakuti ndiboteledwe anduwe, alimwi ndilikuzi kabotu-kabotu.”
18 Lino Mozesi wakakumbila kuti, “Akaka undileke kuti ndibone bulemu bwako mbobubede.” 19 Mwami Leza wakamwiingula kuti, “Ndiyoocita kuti bubotu bwangu boonse bwiinde kumbele lyako, alimwi njoolibanda azina lyangu lyakuti Mwami Leza. Kufumbwa kuli yooyo ngundayanda njootondezya luse aluzyalo.” 20 Mwami Leza wakaindilizya akuti, “Tokookonzya kubona busyu bwangu, nkaambo taakwe muntu uukonzya kubona busyu bwangu, kwamana kacipona pe.” 21 Lino Mwami Leza wakati, “Langa, mboobu busena kumbali andime, wiime abbwe, 22 nkabela bulemu bwangu nobwiinda ndilakubikka mulwaanzi lwamwaala ndilakuvumba ajanza kumeso mane ndiinde. 23 Mpoonya ndagwisya janza kuti ubone buyo sule lyangu, pele kutali busyu pe.”