Kulonga 31

Babelesi babamba tente lya Mwami Leza

¹ Lino Mwami Leza wakati kuli Mozesi, ² “Ndasala Bezaleli mwana wa Uli, mwanaa Hula, wamusyobo wa Juda. ³ Ndamuzuzya a Muuya wa Leza kutegwa abe amaanu abuuya, busongo, alimwi aluzibo mumilimo yoonse yamaanza, ⁴ kuti akonzye kucita zintu zyeebeka akuzibumba angolida, nsiliva alimwi amukuba, ⁵ kubeza mabwe meebesi, aakusyomaika kubeza zisamu, akucita milimo imwi yeebeka mibotu. ⁶ Nkabela ndasala sikumugwasya Oholiyabu mwana wa Ahisamaki, wamusyobo wa Dani. Kuli bamwi boonse bantu basikubamba ndapa busongo bunji kutegwa bakakonzye kuyoocita zyoonse nzendakulailila. ⁷ Babambe tente lyakuswaanganina, abbokesi lijisi mabwe aaciibalusyo, acivunisyo calyo, alimwi azintu zyoonse zyamutente, ⁸ tebule azibelesyo zyaco zyoonse, cikkalilo calambe cangolida iini-ini, azibelesyo zyaco zyoonse, cipaililo cakutentela tununkilizyo, ⁹ acipaililo cazipaizyo zitentwa, azibelesyo zyaco zyoonse, mitiba yakusambila atako lyawo, ¹⁰ azisani zyeebesi zisalala zyamupaizi Aloni abana bakwe zyobabelesya mumilimo yabo, ¹¹ mafuta aakunana, alimwi atununkilizyo tununkilila kabotu twamubusena busalalisya. Nkabela mukucita zintu eezi zyoonse baleelede kuti bakazicite mbubonya mbuli mbundakulailila.”

Sabata buzuba bwakulyookezya

¹² Lino Mwami Leza wakati kuli Mozesi, ¹³ “Ubaambile Baisilayeli kuti, ‘Muleelede kububamba buzuba bwa Sabata, nkaambo buzuba oobu mbwacitondezyo akati kangu andinywe alimwi abalunyungu lwanu, kutondezya kuti mebo nde Mwami Leza ndakamucita nywebo kuba bantu bangu. ¹⁴ Aboobo muleelede kububamba buzuba bwa Sabata, nkaambo bulasalala kulindinywe. Kufumbwa muntu uutabubambi akubusalazya uleelede kujaigwa. Muntu woonse uubeleka mulimo mubuzuba bwa Sabata uyoogwisigwa akati kabantu bokwabo. ¹⁵ Muleelede kubeleka milimo yanu kwamazuba aali cisambomwe, pele buzuba bwaciloba mbuzuba bwakulyookezya, bulasalala ku Mwami Leza. Kufumbwa uucita mulimo mubuzuba oobo uyoojaigwa. ¹⁶ Baisilayeli baleelede kububamba buzuba bwaciloba, mumazyalani oonse aayooboola akububamba kuti bukabe cizuminano citamani. ¹⁷ Mbwacitondezyo citamani akati kangu a Baisilayeli, nkaambo kakuti mebo nde Mwami Leza, ndakalenga julu anyika mumazuba aali cisambomwe, nkabela mubuzuba bwaciloba ndakaleka kubeleka, ndakalyookezya.’”

¹⁸ Lino Mwami Leza naakamanizya kwaambaula kuli Mozesi acilundu ca Sinai, wakamupa zilembelo zyamabwe obilo aaciibalusyo, mabwe aakalembedwe amunwe wini wa Mwami Leza.