Kulonga 30

Cipaililo catununkilizyo

¹ “Ukayake cipaililo cakutentela tununkilizyo. Ukaciyasye amapulanga aamulombe. ² Ceelede kuti kaceelene mubulamfu bwamabazu aaco oonse one. Mubulamfu kacilampa kakokola komwe amwalo mubwamba kacilampa kakokola komwe, bulamfu bwakuya mujulu bukabe tukokola tobilo. Meja aaco aleelede kunoojisini aamwi acinyina. ³ Ukacizilulule mpocili atala amumabazu aaco oonse akumeja angolida iini-ini, alimwi ukazilulule moombe waco angolida mbubonya. ⁴ Ukanamatike tuninga twangolida munsi lyamoombe kumabazu obilo twakuyoosekka tukulisyo. ⁵ Ukabambe tukulisyo, twamulombe eelyo ukatuzilulule angolida. ⁶ Eeci cipaililo ukacibikke kumbele lyasani lyacisitilizyo eelyo lilenga kumbele lyabbokesi lyacizuminano kalinooyovunikidwe acivunisyo calyo. Oobu mbusena mpetinooswaanganina anduwe. ⁷ Aloni uleelede kunootenta tununkilizyo alincico lyoonse cifumo-fumo anoobamba malambe. ⁸ Alimwi uleelede kutenta tununkilizyo kulubundu-bundu ciindi namunika malambe. Kutenta tununkilizyo boobu kuleelede kunoocitwa lyoonse kwamazyalani oonse kakunyina akuleka. ⁹ Toelede kutenta alincico tununkilizyo tubi, nikuba kupaizya munyama, nikuba kutuuzya maila, nikuba kutila cipaizyo cacakunywa. ¹⁰ Ciindi comwe buyo mumwaka Aloni uyoocita cilengwa eeco cakulamba bulowa kumeja aacipaililo bwamunyama wakapaizigwa mukukombelezezya zinyonyoono. Eeci cileelede kunooyoocitwa kwamazyalani oonse aaboola. Cileelede kuba cipaililo cisalalisya cipedwe kumulimo wa Mwami Leza alikke.”

Mutelo waŋanda ya Leza

¹¹ Lino Mwami Leza wakati kuli Mozesi, ¹² “Ciindi nobala Baisilayeli, muntu umwi aumwi uyoobbadela ku Mwami Leza muulo wabuumi bwakwe, kutegwa kutabi cuumo cimusikila ciindi nobacibalwa. ¹³ Woonse muntu wabalwa uleelede kubbadela cisela casyekeli cili ngomweelwe uubikkidwe kuŋanda ya Leza, syekeli ileelene amagela aali makumi obilo, cisela eeci mmulumbo ku Mwami Leza. ¹⁴ Umwi aumwi wabalwa, nkokuti, woonse muntu uuli amyaka iili makumi obilo naa kwiinda waawa, uleelede kubbadela mali aaya, ku Mwami Leza. ¹⁵ Muntu muvubi teelede kubbadela mali aaindilila pe, awalo muntu mucete takooyoobbadela mali mace kwiinda bamwi pe ciindi nomubbadela mali aaya aabuumi bwanu ku Mwami Leza. ¹⁶ Uyootambula mali aacinunuzyo aaya kuzwa kubantu Baisilayeli akwaabelesya mumilimo yamutente lyakuswaanganina. Mali aayo ngaayooibalusya Mwami Leza mbuyakamanwa milandu ya Baisilayeli.”

Mutiba wakusambila

¹⁷ Mwami Leza wakati kuli Mozesi, ¹⁸ “Ukabumbe mutiba wakusambila, wamukuba, kaujisi tako lyamukuba, Ukaubikke akati katente lyakuswaanganina acipaililo. Ukabikke maanzi mulinguwo. ¹⁹ Nkabela Aloni abana bakwe banoosamba maanzi aayo kumaulu akumaanza. ²⁰ Ciindi nibanjila mutente lyakuswaanganina naa nibasika kucipaililo mukucita milimo yabo yabupaizi, kupa cipaizyo citentwa ku Mwami Leza, ²¹ basambe mumaanzi aayo, kutegwa batafwi. Ooyu mulawo ngobeelede kubamba kukabe kutamani, balo alimwi alunyungu lwabo.”

Mafuta aakunana

²² Alimwi Mwami Leza wakati kuli Mozesi, ²³ “Utole tununkilizyo tubotu kapati tuzwa mungwimba wamaala tulema masyekeli aali myaanda yosanwe alimwi atwasinamoni tulema masyekeli aali myaanda yobilo amakumi osanwe atwamindale tulema mbubonya, ²⁴ atwakasiya tulema masyekeli aali myaanda yosanwe, kweendelana amweelwe wakuŋanda ya Leza alimwi amafuta aaoliva aazula cipempa. ²⁵ Azintu eezi ukapange mafuta aasalala aakunana, ukaavwele mbubweenga simafuta. ²⁶ Amafuta aaya ukananike tente lyakuswaanganina, abbokesi lyamabwe aaciibalusyo, ²⁷ tebule azibelesegwa alindilyo zyoonse, acikkalilo calambe, acipaililo cakuumpila tununkilizyo, ²⁸ acipaililo cazipaizyo zyakutenta, azibelesyo zyaco zyoonse, amutiba wakusambila atako lyawo. ²⁹ Munzila eeyi uyoozisalazya zintu eezi, eelyo ziyoosalala ncobeni, aboobo kufumbwa uyooziguma uyoonyonyoonwa abusalali bwazyo. ³⁰ Mbombubo oobu mboyoonanika Aloni abana bakwe akubasalazya kuti bandibelekele mulimo wabupaizi. ³¹ Lino mboobu mboyoobaambila Baisilayeli, ‘Aaya mafuta abe aalibedelede aakunana mumulimo wangu kwamazyalani aanu oonse. ³² Alimwi muntu buyo, atatilwi mafuta aayo pe. Mutabi nimuvwelanya tununkilizyo kuti mupange aali mbubo pe. Alasalala, aboobo anywebo kamwaayeeya mbubonya. ³³ Kufumbwa muntu uuti kapange amwi aakozyenye angawo, nikuba kwaabelesya aaya mafuta kumuntu buyo uutali mupaizi, ooyo uyoogwisigwa akati kabantu bokwabo.’”

Tununkilizyo tumwi

³⁴ Eelyo Mwami Leza wakaambila Mozesi kuti, “Bweza cipaanzi ceelene catununkilizyo twamisyobo eeyi, sitakite, onika, galibbanumu, afulankisensi. ³⁵ Usanganye upange cinunkilizyo cabweema bubotu. Ucibikke munyo kuti cilondoke cisalalisye. ³⁶ Cimwi cipaanzi caco cisilwe cibe busu buti kasansailwe kumbele lyabbokesi lijisi mabwe aaciibalusyo lili mutente lyakuswaanganina, busena oobo mwendinoomuswaanganina abantu. Eeci cinunkilizyo uleelede kuciyeeya kuti cilasalala kapati. ³⁷ Toelede kuti ukabelesye zintu mbuli zyakabelesegwa kucipanga mukuti ayebo ukalipangile mafuta aako pe. Pele koyeeya kuti ncinunkilizyo cisalala cipedwe ku Mwami Leza. ³⁸ Kuti naa muntu wapanga cili mbuli ncico kuti akabelesye walo, ncobeni ooyo muntu uyoogwisigwa kubantu bokwabo.”