Kulonga 3

Mwami Leza mbwaakaita Mozesi

¹ Lino Mozesi wakali kweembela mbelele zyasimakwaakwe Jetulo, mupaizi wanyika ya Midiyani. Eelyo wakakosola nkanda akutola butanga bwakwe ku Holebu, cilundu ca Mwami Leza. ² Lino mungelo wa Leza wakalibonya kulinguwe muciimo camulilo, wakali kuyaka muciteyo. Mozesi naakalanga, wakabona kuti citeyo eeco cakali kuvwilima pele kacitapyi. ³ Mpawo Mozesi wakayeeya kuti, “Andiswene aafwiifwi kuti ndibone eeci cintu cigambya, alimwi nkaambo nzi ncocitapyidilili, nkociide kuvwilima buyo.” ⁴ Lino Mwami Leza naakabona kuti Mozesi waswena aafwiifwi, wakamwiita kuzwa muciteyo oomo wakati, “Mozesi!” Mozesi wakaingula kuti, “Mwami.” ⁵ Leza wakati, “Utasweni aafwiifwi. Samununa ndyasyo zyako, nkaambo busena mpoimvwi bulasalala.” ⁶ Alimwi wakati, “Ndime Leza wauso, Leza wa Abulahamu, Leza wa Izaka, Leza wa Jakobo.” Eelyo Mozesi wakalivumba kumeso nkaambo wakayoowa kulanga kuli Leza.

⁷ Mpoonya Mwami Leza wakati, “Ndilibwene kabotu mbuli bantu bangu mbobapenga mu Ijipiti, ndakumvwa kulila kwabo nkobalila kugwasigwa kuli baabo babaminya amilimo. Ndilaabwene kabotu mapenzi aabo. ⁸ Lino ndaboola kuti nzoobavune kuzwa ku Baijipiti, akuti ndizoobagwisye mucisi ciya akubatola kunyika mbotu mpati. Ninyika iikunka mukupa abuci, kwaciindi cino iikkedwe a Bakenani, Bahiti, Baamoli, Bapelezi, Bahivi a Bajebusi. ⁹ Ndakumvwa kulila kwa Baisilayeli, alimwi ndabona mbobabadyaminina Baijipiti. ¹⁰ Lino ndakutuma yebo kuli Falo kuti ukagwisye bantu bangu Baisilayeli kuzwa mu Ijipiti.”

¹¹ Pele Mozesi wakati kuli Leza, “Ma, ndimeni mebo mu Ijipiti kuti nkakonzye kugwisya Baisilayeli?” ¹² Leza wakati, “Ndilaba aanduwe, waakugwisya bantu kuzwa mu Ijipiti, muzoondikomba aawa adundu eeli, calo ciyootondezya kuti ndime ndakutuma.”

¹³ Pele Mozesi wakaambila Leza kuti, “Kayi kuti ndainka ku Baisilayeli ndaakubaambila kuti, ‘Leza wabamauso wandituma kulindinywe,’ balo inga baakundibuzya kuti, ‘Ino nguni zina lyakwe?’ Ino inga ndaakubaambila buti?” ¹⁴ Eelyo Leza wakaambila Mozesi kuti, “Ndime Uuliwo Lyoonse.” Alimwi wakayungizya akuti, “Mboobu mbotikabaambile Baisilayeli ukati, ‘Ndime Uuliwo Lyoonse nguwandituma kulindinywe.’” ¹⁵ Alimwi Leza wakaambila Mozesi kuti, “Mboobu mbotikaambile Baisilayeli ukati, ‘Mwami Leza, Leza wa Abulahamu, Leza wa Izaka, Leza wa Jakobo nguwandituma kulindinywe.’ Eeli ndezina lyangu akutamani. Mbombubo oobo mbwaayoondiita oonse mazyalani aaciyooboola kumbele. ¹⁶ Koya ukabunganye basololi ba Baisilayeli antoomwe, ukabaambile kuti, ‘Mwami Leza wamauso, Leza wa Abulahamu, wa Izaka, Jakobo, wakalibonya kulindime, akundaambila kuti ndizoomwaambile kuti, Ndaboola kulindinywe, ndabona eeco ncobamucita Baijipiti.’ ¹⁷ Eelyo ndasyomezya kuti ndiyoomugwisya kuzwa mu Ijipiti oomo momupenzegwa akumutola kunyika ya Bakenani, Bahiti, Baamoli, Bapelezi, Bahivi, alimwi a Bajebusi. Ninyika iikunka mukupa abuci. ¹⁸ Bayooswiilila ncotikabaambile. Wamana ukainke kumwami wa Ijipiti, yebo abasololi ba Baisilayeli, mukati kulinguwe, ‘Mwami Leza wa Bahibulu wakaswaangana aswebo, aboobo lino twakulomba kuti utuleke tuunke munkanda lweendo lwamazuba otatwe, kuti tukapaile ku Mwami Leza wesu.’” ¹⁹ Ndilizi kuti mwami wa Ijipiti takooyoomuzumizya kuunka, ccita nkamusinikizye buya. ²⁰ Pele ndiyoobelesya nguzu zyangu akusubula Ijipiti azigambya eezyo nzyeyoocita ooko. Eelyo musule akooku, uyoomuleka mukainke.

²¹ “Ndiyoocita kuti Baijipiti bakalemeke bantu bangu kutegwa mwaakulonga mutakainki acinkwamaanza. ²² Mukaintu umwi aumwi uyookumbila mukaintu Muijipiti ngobakkala limwi, alimwi uyookumbila angobabambene limwi zyakusama, alubulo lweebesi lwansiliva angolida. Eezi zintu muyoozisamika bana banu balombe abasimbi, nkabela munzila eeyi muyoobasaala Baijipiti.”