Kulonga 29
Aloni abana bakwe mbobakapegwa mulimo wabupaizi
1 “Mboobu mboelede kucita kuli Aloni abana bakwe balombe kuti bapegwe kulindime, bandibelekele mumulimo wabupaizi. Utole kapoho komwe abagutu bobilo batakwe kampenda. 2 Alimwi utole azinkwa zitakwe mimena, zyakakandwa amafuta, alimwi akankwa katakwe mimena kapapali kalambaikidwe mafuta. Zyoonse eezi zikacitwe abusu bunante. 3 Ukazibikke mucisuwo uzilete kulindime, uletelezye kapoho abagutu bobilo.
4 “Umulete Aloni abana bakwe balombe kumulyango watente lyakuswaanganina, wamana ubacite kuti basambe amibili. 5 Mpoonya ubweze zisani, usamike Aloni jansi damfu, atala aandilyo jansi eeli umusamike lifwiifwi, wamana umusamike kabaki kabupaizi, kuzwa waawo kabaki kaacamba, ukamwaange lutambo loosedwe kabotu lwakabaki kabupaizi. 6 Eelyo ukamusamike cingundu kumutwe, ubikke musini wabupaizi uusalala. 7 Notibweze mafuta aakumunanika akwaatila kumutwe wakwe.
8 “Nkabela ulete bana bakwe abalo, ubasamike zibaki, 9 ubaange ntambo muzibuno akubasamika zingundu kumitwe. Bayooba bapaizi kweendelana amulawo wangu uutamani. Oobu mbombubo mboelede kumupa mumulimo wa Leza Aloni abana bakwe balombe.
10 “Ulete kapoho kumbele lyatente lyakuswaanganina, Aloni abana bakwe balombe babikke maanza aabo amutwe wankako. 11 Ukajaye kapoho aako kumbele lya Mwami Leza amulyango watente lyakuswaanganina. 12 Ubweze bumwi bulowa bwakapoho ubulambe amunwe wako kumeja aacipaililo. Eelyo bulowa butisyaale ubutilile kutako lyacipaililo. 13 Kuzwaawo utole mafuta aazyamukati aali aamuni, ansa zyobilo amafuta aazyo, uzitente zyoonse acipaililo. 14 Pele nyama yako akkutu abufumba bwako uzitentele kunze lyazivuka. Eeci ncecipaizyo cakugwisya zinyonyoono.
15 “Lino utole umwi wabagutu, kuli Aloni abana bakwe balombe babikke maanza aabo amutwe wakwe. 16 Wamana umujaye, ubweze bulowa bwakwe, ukasansaile kumabazu one oonse aacipaililo. 17 Umukosoole mugutu muzipaanzi, usanzye zyamukati amyeendo yakwe, ukazibikke zyoonse antoomwe azituli zimwi amutwe. 18 Wamana umutente mugutu acipaililo. Eeci ncipaizyo cakutenta, cabweema bubotelezya ku Mwami Leza.
19 “Mpoonya utole umwi mugutu. Lino Aloni abana bakwe babikke maanza aabo amutwe wakwe. 20 Umujaye, ubweze bulowa bwakwe bumwi, ubulambe kumpela amatwi aakululyo aa Aloni abana bakwe, akuzyala zyakululyo zyakumaanza aabo, akuzyala zyakumaulu aabo aalulyo. Bulowa butisyaale ubusansaile kumabazu one oonse aacipaililo. 21 Ubweze bumwi bulowa buli aacipaililo amafuta amwi aakunana, usansaile Aloni azisani zyakwe, ubasansaile abalo bana bakwe azisani zyabo. Ndendilyo walo abana bakwe azisani zyabo nibayoosalazigwa.
22 “Lino kumugutu ooyu ubweze mafuta, aakumucila, amafuta aazyamukati, mafuta aalaamuni, ansa amafuta aazyo, alimwi acibelo calulyo, nkaambo ooyu mugutu wapegwa ku Mwami Leza. 23 Lino kuzinkwa eezyo zitakwe mimena zili mucisuwo kumbele lya Mwami Leza, ugwisye cinkwa comwe, acinkwa comwe cakakandizigwa aamafuta, akankwa kapapali kalambaikidwe amafuta. 24 Zyoonse eezi zilyo ukazipe kuli Aloni abana bakwe, balo bakazizumbanye kuli Leza kuti zibe zipego zyeelede. 25 Mpoonya uzitole kuzwa kulimbabo uzitente aacipaililo, atala acipaizyo cakutenta, cabweema bubotelezya ku Mwami Leza. 26 Ukatole kaango kamugutu kakabelesegwa Aloni naakapegwa ku Mwami Leza, ukakazumbaanye kuti kabe cipaizyo cilibedelede ku Mwami Leza. Eeci cipaanzi camunyama cilaba cako. 27 Kuzizo zyamugutu eezyo zyakabelesegwa Aloni abana bakwe nibakapegwa ku Mwami Leza uyoopa kaango aako kwiindila mukukazumbaanya kabe cipaizyo cilibedelede ku Mwami Leza, alimwi cibelo eeco casalilwa bapaizi. 28 Kwiindila kumulawo wangu uutamani, Baisilayeli kabapa zituuzyo zyalumvwano kulindime zyalo ziyooba zya Aloni abana bakwe, kuzwa kuzituuzyo Baisilayeli nzyobanoopa kulimbabo.
29 “Lino zisani zya Aloni zyabupaizi zileelede kuyoopegwa kubana bakwe balombe ciindi aakufwa, kuti abalo bakananikwe ku Mwami Leza. 30 Ooyo mwana wa Aloni uyootola mulimo wabupaizi uyoozisama kwamazuba aali ciloba ciindi nanjila mutente lyakuswaanganina kuyoobelekela mubusena busalala.
31 “Ubweze mugutu ooyo wakabelesegwa Aloni naakapegwa ku Mwami Leza, ujike nyama yakwe mubusena busalala. 32 Kwamana Aloni abana bakwe balombe bayolida nyama eeyo yamugutu amulyango watente lyakuswaanganina, bayooilida aamwi azinkwa zili mucisuwo. 33 Bayoolya zilyo eezyo zyakabelesegwa mucilengwa cakulekelelwa zinyonyoono ciindi nibakabikkwa mumulimo wa Mwami Leza. Pele taakwe uumbi weelede kuzilya, nkaambo zilasalala. 34 Kuti naa kuli nyama niciba cinkwa catamaninina kuligwa, bwaca, citentwe. Taciligwi pe, nkaambo cilasalala.”
35 Mbombubo oobu mboelede kuyoocitila Aloni abana bakwe mbubonya mbuli mbwindakulailila. Cilengwa cakubapa ku Mwami Leza, ukacicite kwamazuba aali ciloba. 36 Muli bumwi abumwi buzuba weelede kujaya mupoho kuti abe cipaizyo cakukombelezezya zinyonyoono. Nopa cipaizyo eeco, usalazya cipaililo. Mpoonya ucinanike cipaililo akucipa ku Mwami Leza. 37 Kwamazuba aali ciloba uleelede kucita zipaizyo zyakusalazya cipaililo akucipa ku Mwami Leza. Eelyo cipaililo ciyoosalalisya, nkabela kufumbwa uuyoociguma uyoonyonyoonwa abusalali bwaco.
Zipaizyo zyabuzuba abuzuba
38 “Nzeezi nzyoelede kupaizya acipaililo buzuba abuzuba, ciindi coonse, uleelede kupaizya tugutu tobilo twamwaka omwe tutakwe akampenda. 39 Kamwi katugutu ootu uleelede kukapaizya cifumo-fumo, kamwi kulubundu-bundu. 40 Kagutu kakusaanguna uleelede kukapaizya abusu buzula nsangwa, bukandidwe amafuta aazula nsazi. Utuuzye antoomwe akafulu kawaini. 41 Akalo kabelele kabili weelede kukatenta kulubundu-bundu, akalo ukapaizye azintu mbuli zyabelesegwa kuli kacifumo-fumo, cituuzyo cazyakulya, acituuzyo cazyakunywa, kutegwa zipe bweema bubotelezya ku Mwami Leza. 42 Eeci cipaizyo cakutenta cileelede kunoopaizigwa amulyango watente lyakuswaanganina, kumbele lyangu, nde Mwami Leza. Aawo mpetinooswaanganina akwaambaula kulinduwe. 43 Ooko nkwenjooswaanganina abantu Baisilayeli, busena oobo buyoosalazigwa abulemu bwangu. 44 Ndiyoosalazya tente lyakuswaanganina, acalo cipaililo ndiyoocisalazya, awalo Aloni ndiyoomusalazya akusalazya bana bakwe kuti bakandibelekele mumulimo wabupaizi. 45 Ndiyookkala akati kabantu Baisilayeli, ndiyooba Leza wabo. 46 Bayooziba kuti ndime Mwami Leza wabo wakabagwisya mu Ijipiti kuti ndizookkale akati kabo. Ndendime Mwami Leza wabo.”