Kulonga 27

Cipaililo

¹ “Cipaililo mukaciyake amapulanga aamulombe. Kacinooyoojisi mabazu one aajisi bulamfu bweelene bulampa tukokola tosanwe, abwamba buli tukokola tosanwe, bulamfu bwamujulu kabuli tukokola totatwe. ² Mutuswi twaco tone ukabikke meja anooimvwi. Kaajisilizi kucipaililo, eelyo coonse cikazilululwe amukuba. ³ Alimwi ukafule zibelesyo zyacipaililo zyamukuba zyakuyolela twe, alimwi ukapange amafocolo, mbede, ngobyoobyo, ankaye zyamulilo. Zyoonse zibelesyo zyacipaililo zikapangwe amukuba. ⁴ Alimwi cipaililo mukacipangile mbaula yamasuwa atubulo tupatangene twamukuba. Nkabela muzyooko zyamasuwa aambaula eeyo, ukabikke tuninga tone twamukuba twakuyumwida. ⁵ Masuwa ambaula eeyo ukaabikke kunsi lyamubalo wacipaililo kuti kuusika akati-kati kacipaililo nkociya mujulu. ⁶ Wamana ukacite tukulisyo twamulombe ukatuzilulule amukuba. ⁷ Tukulisyo ootu ntwakusekka muninga zyacipaililo kumabazu aaco obilo mocinooyumwidwa. ⁸ Cipaililo ukacipange amapulanga mumabali kakutakwe cintu muli ncico. Ukacipange mbuli mbookatondezegwa acilundu.”

Kubambwa kwabbuwa lyatente

⁹ “Wamana ukayake bbuwa lyatente. Kulubazu lwakumusanza masani aakusitilizya aandeketela akasumwe kuzwa kumasani mateteete mabotu aalampa tukokola tuli mwaanda lubazu lomwe, ¹⁰ kaajisini kumisemo yamukuba iili makumi obilo iijisi ziimino zyamukuba zili makumi obilo, ukabikke kumisemo yamukuba iijisi ngobyoobyo atusako twansiliva. ¹¹ Mbubonya oobo kulubazu lwakunyika kuyooba masani aakusitilizya aalampa tukokola tuli mwaanda, aajatene amisemo yamukuba iili makumi obilo aziimino zyamukuba zili makumi obilo, kakuli ngobyoobyo atusako twansiliva. ¹² Bwamba bwabbuwa kulubazu lwakumbo linoojisi masani aakusitilizya aalampa tukokola tuli makumi osanwe amisemo iili kkumi iijisi ziimino zili kkumi. ¹³ Kulubazu lwakujwe kumanjililo, bbuwa kalijisi bwamba bulampa tukokola tuli makumi osanwe. ¹⁴ Eelyo kulubazu lumwi lwamulyango kukabe masani aakusitilizya aalampa tukokola tuli kkumi atusanu, kakuli misemo aziimino zyotatwe. ¹⁵ Kulubazu lumwi kukabe masani aakusitilizya aalampa tukokola tuli kkumi atusanu kumbali aakumulyango aakajisi misemo yotatwe aziimino zyotatwe. ¹⁶ Lino mulyango walyo ukabe asani lyakusitilizya lilampa tukokola tuli makumi obilo twamusyobo wacijulu-julu, wacisombo, abutonje busalala pyu asani liteteete lisumidwe kabotu cakweebeka. Isani eelyo kalisuminidwe kumisemo yone alimwi lyakali cekawidwe. ¹⁷ Lino misemo yoonse yabbuwa iyooswaanganyizigwa atusako twansiliva, ngobyoobyo kazili zyansiliva, ziimino kazili zyamukuba. ¹⁸ Bbuwa lileelede kulampa tukokola tuli mwaanda, bwamba bukabe tukokola tuli makumi osanwe, abulamfu bwakuya mujulu buli tukokola tosanwe. Masani aakusitilizya akasumwe kuzwa kusani lyandeketela, ziimino kazili zyamukuba. ¹⁹ Lino zibelesyo zyoonse zyakubelesya mutente, anembe zya bbuwa, zyoonse buyo kufumbwa zibelesegwa mumilimo noiba buti, zileelede kuti kazili zyamukuba.”

Kubamba lambe

²⁰ “Ubalailile Baisilayeli kuti kabakuletela mungwimba mubotu waoliva, ukabikke mulambe kutegwa lambe kaliyaka lyoonse buyo kalitazimini. ²¹ Aloni abana bakwe balombe balibikke lambe eeli mutente oomo Leza mwaswaanganina abantu bakwe, anze lyamasani aacisitilizyo kumbele lyabbokesi lyacizuminano. Nkonkuko ooko kumbele lya Mwami Leza lambe kalinooyaka kuzwida kumangolezya mane cifumo-fumo. Malailile aaya aleelede kuyoobambwa a Baisilayeli alimwi abana balunyungu lwabo lyoonse buyo mane kukabe kutamani.