Kulonga 23
Imwi milawo yabululami
1 “Mutanoomwayi makani aakubeja. Mutakagwasyi muntu mubi kwiindila mukupa bukamboni bwakubeja. 2 Mutanootobeli bbungankamu mukucita cibi, alimwi mulubeta mutanoopi bukamboni bunyonganya mulandu mukubotezya bbungankamu. 3 Mutanootondezyi lusalululo kumucete mukubetekwa kwakwe.
4 “Kuti naa wabona musune niiba mbongolo yasinkondonyoko iisweekede, ukaitole kulinguwe. 5 Naa kuti mbongolo yakwe uukusulaika yawa akulimbililwa mukuli wayo, toelede kwiindilila pe, umugwasye kwiibusya.
6 “Kuciindi nabetekwa muntu umwi wabacete, utanooleki kuti mulandu wakwe unyonganyizigwe. 7 Utanootamikizyi milandu bantu. Utanoojazyi muntu uutakwe mulandu, nkaambo mebo njoomusubula uucita boobo. 8 Utanootambuli sinkamulomo, nkaambo sinkamulomo lyoofwaazya muntu kuti ataciti ciluzi, alimwi lilabisya makani aabaabo batakwe mulandu.
9 “Mutabaleli calunya bazwakule, nkaambo nywebo mulizi mbuli mbwalimvwa muzwakule, kayi anywebo mwakali bazwakule mu Ijipiti.
Mwaka waciloba abuzuba bwaciloba
10 “Kwamyaka iili cisambomwe muyoosyanga myuunda yanu akuyobola zilyo nzyomutebula. 11 Pele mumwaka waciloba mukiileke buyo myuunda, ikalale. Taakwe acomwe ncomuyootebula cikomena mulinjiyo. Bantu bacete akati kanu mbabanga bakonzya kulya zyamakoko mulinjiyo, abanyama bamusokwe mbabayoolya ciyoosiya bacete. Mukacite mbubonya oobo akumyuunda yanu yamisaansa ayamisamu yaoliva.
12 “Muyoobeleka kwamazuba aali cisambomwe, Pele mutakabeleki mubuzuba bwaciloba kutegwa basune banu ambongolo zyanu zikakonzye kulyookezya, abalo bazike banu abazwakule bakakonzye kujana nguzu. 13 Muziswiilile zintu zyoonse nzendamwaambila. Mutakakombi baleza bambi, naaba mazina aabo mutakaaambi pe.
Mapobwe mapati otatwe
14 “Kwaziindi zyotatwe mumwaka mweelede kunoocita pobwe lyakusekelela mukulemya ndime. 15 Pobwe lyacinkwa citakwe mimena kamuyoolicita, mbubonya mbuli mbundakamulailila. Muyoolya cinkwa citakwe mimena kwamazuba aali ciloba, muciindi cibikkidwe ca mwezi wa Abibu, nkaambo mumwezi ooyo ndendilyo nimwakasiya Ijipiti. Taakwe muntu uyoolitondezya kuli ndime cinkwamaanza. 16 Alyalo pobwe lya butebuzi munooyoolicita aawo nimuyobola zilyo zitaanzi nzimwakasyanga mumyuunda yanu. Kumamanino aamwaka munooyoocita pobwe lya kutebula micelo, aawo nimuyoobungika micelo kuzwa mumyuunda yanu. 17 Kwaziindi zyotatwe mumwaka boonse baalumi bakalibonye kulindime, nde Mwami Leza wanu.
18 “Tamukoonoobelesya cinkwa cakabikkwa mimena mwaakupaizya munyama kulindime. Aalo mafuta aamunyama ooyo wabelesegwa mupobwe lyangu taaelede kulazikwa mane buce pe.
19 “Mukalete muŋanda ya Mwami Leza wanu zintu zibotu kwiindilila zyakutebula zitaanzi zizwa mumyuunda yanu.
“Mutajiki kana kambelele naa kampongo mumukupa wabanyina.
Leza mbwaakasyomezya kubasisya ku Kenani
20 “Ndiyootumina mungelo kumbele lyanu kuti akamukwabilile munzila, akuti akamusisye kubusena mbondakamubambila. 21 Mukamuswiililisye akuyoocita nzyayooamba. Mutakamuzangili pe, nkaambo wiimvwi muzina lyangu, takooyooilekelela milandu iili boobo pe. 22 Pele kuti mukamuswiilile akucita nzyaamba, ndiyoobalwana basinkondonyoko akukazya bamukazya. 23 Mungelo wangu uyooenda kumbele lyanu akuyoomutola munyika ya Baamoli, Bahiti, Bapelezi, Bakenani, Bahivi, alimwi a Bajebusi, eelyo ndiyoobanyonyoona. 24 Pele mutakakotamini baleza babo akubakomba. Mutakaciti nzyobacita bantu aabo pe. Mukanyonyoone mituni yabo kwiimaninizya, akupwayaula mabwe aayo ngobakomba. 25 Mukakombe Mwami Leza wanu, nkabela ndiyoomuleleka azilyo amaanzi, akuyoomugwisizya malwazi oonse. 26 Takuciyoobi mukaintu uyoosowa munyika yanu, alimwi taakwe uutanooyoozyali pe. Ndiyoomucita kuti mukoongole ansi.
27 “Ndiyoocita kuti bamukazya bakandiyoowe. Ndiyoocita kuti bantu aabo mbomulwana limwi bakanyongane mumyoyo, akuyoocita basinkondonyoko boonse kuti bakamutije. 28 Ndiyookonga basinkondonyoko, Bahivi, Bakenani alimwi a Bahiti ndiyoobatanda kuzwa kulindinywe. 29 Nsikooyoobatanda akubagwisya mucisi mumwaka omwe buyo pe, kuti nyika itakasyaali buyo akuti batakamuvulili banyama babutambo. 30 Ndinoobatanda asyoonto-syoonto mane mukavule akutola nyika. 31 Ndiyookwakwabula minyinza yanyika yanu kuti ikazwide ku Lwizi Lusalala akuyoosika ku Lwizi Lupati, alimwi akuzwida kunkanda akuyoosika kumulonga wa Yufuletisi. Ndiyoomupa nguzu kwiinda bantu bakkala munyika eeyo, nkabela muyoobatanda akubagwisya mumo. 32 Tamweelede kupanga cizuminano ambabo naa kukomba baleza babo. 33 Mutakabaleki kuti bakkale munyika yanu pe, mukuti batakamuciti kuti mukandibisizye. Kuti naa mukakombe baleza babo, eeco inga caba kakole kakumuca.”