Kulonga 22
Milawo yakubbadela milandu
1 “Kuti naa muntu wabba musune naa mbelele akuyooijaya naa kwiiuzya, uleelede kubbadela basune bosanwe kumusune omwe, mbelele zyone kumbelele yomwe. 2 Uleelede kumubbadelela munyama ooyo. Kuti naa muntu ooyo taakwe ncajisi, uyooulisigwa mbuli muzike kutegwa akabbadele ncaakabba. 3 Kuti naa ooyo munyama wakabbigwa, mmusune, mbongolo, naa mbelele, kwamana wajanwa kacipona muntu ooyo uyoobbadela banyama bobilo.
4 “Kuti naa mubbi wajatwa kapwaya ŋanda masiku akujaigwa, ooyo wamujaya takapegwi mulandu wakujaya pe. Pele kuti cakacitika kalipaswide kale zuba, inga uyoopegwa mulandu wakujaya muntu.
5 “Kuti naa muntu kacezezya banyama bakwe mumuunda wakwe nuuba wamisaansa, nkabela kuti banyama bamuloboka akuyoolida kumuunda waumwi muntu, uleelede kubbadela zisyango zyamumuunda wakwe zibotu kwiindilila nuuba muunda wansaansa mubotu kwiindilila.
6 “Kuti naa muntu watenta, wamana mulilo wayandilila akuyootenta maila aalundikidwe, naaba maila aaimvwi mulukuba, naa kutenta muunda oomo musyangidwe maila, inga ooyo muntu watenta uyoobbadela kunyonyooka ooko kwacitika.
7 “Kuti naa muntu wapa muntu umwi maila naa lubono lumwi kuti amubambile, nkabela lwabbigwa muŋanda yamuntu ooyo mulwabede, mubbi kuti wabonwa uyoobbadela kobilo. 8 Pele kuti mubbi tabonwi, ooyo mukamwini ŋanda uyooletwa kuŋanda ya Leza kuti akonkezye kuti talinguwe wakalutola lubono lwamweenzinyina.
9 “Kufumbwa twaambo twakuzwanganina makani aalubono, mbuli musune, mbongolo, mbelele, zisani, aniciba cintu cimwi cakasweekede, pele umwi muntu ncaamba kuti ncicakwe, kuzwangana kwabantu aabo bobilo kuleelede kutolwa kuŋanda ya Leza. Lino ooyo muntu uyoozulwa a Leza uyoobbadela kobilo kumweenzinyina.
10 “Kuti naa muntu wasisya mbongolo yakwe, naba musune wakwe, niiba mbelele yakwe, naba munyama umwi kumweenzinyina, nkabela munyama ooyo wafwa, nikuba kulicisa, nikuba kutolwa, kuti naa taakwe kamboni, 11 ooyo wakasisyigwa akakonke kuŋanda ya Leza kuti taakwe naakacitola. Nkabela kuti kwajanika kuti cintu eeco tiicakabbigwa, ooyo mukamwini cintu nguutisweekelwe, takooyoobbadelwa kuti cintu cakwe ciboozegwe pe. 12 Pele kuti naa munyama wakalibbidwe, eelyo ooyo wakali kumubamba uyobbadela mukamwini munyama. 13 Lino kuti naa wakalumwa abanyama bamusokwe, uleelede kuleta ncobakasiya kulya kutegwa azootondezye, teelede kubbadela cakalumwa abanyama bamusokwe.
14 “Kuti naa muntu wakumbila munyama kumweenzinyina, nkabela munyama ooyo waakulicisa naa wafwa katali mumaanza aasimalelo wakwe, ooyo wakamukumbila weelede kubbadela. 15 Pele kuti kali mumaanza aamukamwini munyama, ooyo wakamukumbilide inga takoobbadela. Kuti naa munyama ooyo wakali kubelekela mali kumuntu, inga kusweeka kwakwe kuyoobbadelwa amali aayo ngaakali kubelekela.
Milawo yabukale abukombi
16 “Kuti naa mwaalumi woongelezya musimbi uutezi mwaalumi alimwi uutakkalidwe, nkabela woona anguwe, uyoobbadela ciko cakumukwata. 17 Pele kuti naa wisi musimbi wakaka kuti muntu ooyo akwate mwanaakwe, inga wamubbadelesya mali aaelene aaciko camusimbi uutezi mwaalumi.
18 “Mutakaleki mukaintu mulozi kuti apone.
19 “Kufumbwa muntu woona amunyama uyoojaigwa.
20 “Kufumbwa muntu uupa cituuzyo kuli baleza bambi, kutali ku Mwami Leza alikke, uyoonyonyoonwa.
21 “Mutagutaiki nikuba kumulela calunya muzwakule, nkaambo anywebo mwakali bazwakule munyika ya Ijipiti. 22 Mutakatundululi mukamufu naba musyaala. 23 Kuti naamwabalela bubi ndiyoobavuwa baakundililila kuti ndibagwasye, 24 nkabela ndiyoonyema kapati akuyoomujaya apanga, eelyo abalo bakaintu banu bayooba bamukabafu abana bayooba bamusyaala.
25 “Kuti naa wakolotesya mali kuli umwi wabantu bangu, naa kuli aabo bacete akati kanu, utakaciti mbuli aabo basikukolotesya mali cakujana mpindu akuyoobacita kuti bakayungizye alingawo baakwaaboozya kuli nduwe. 26 Kuti naa wamutolela jansi muntu kuti cibe cisyomezyo cakuti uyookubbadela, uleelede kulibweedezya ndilyonya kalitana akubbila zuba, 27 nkaambo ncecakulivumba cakwe cilikke cimukasaazya. Ino inga walivumbya nzi cimbi? Aakundililila kuti ndimugwasye, ndiyoomuvuwa, nkaambo mebo ndili silubomba.
28 “Toelede kusampaula Leza, alimwi utasinganyi muleli wabantu bako.
29 “Mutakamuki kundipa zipo kuzwa kumaila aanu, niiba waini yanu njomulima.
“Mukandipe bana banu balombe bakusaanguna. 30 Alimwi mukandipe bana baŋombe zyanu bakusomona abana bambelele zyanu, mwana mulombe wakusaanguna uyookkala abanyina kwamazuba aali ciloba, nkabela mubuzuba bwalusele mweelede kuyoomupa kulindime.
31 “Amulipe kulindime mbuli bantu basalala, nkaako mutakalyi nyama yamunyama wakalumwa abanyama bamusokwe, nyama yawo mukiipe babwa.