Kulonga 2

Kuzyalwa kwa Mozesi akufutulwa kwakwe

¹ Muntu umwi wamusyobo wa Levi wakakwata mukaintu Mulevinyina.

² Mukaintu ooyo wakamita akuzyala mwana mulombe. Nkabela naakabona kuti mwanaakwe wakali mubotu, wakamusisa kwamyezi yotatwe. ³ Naakabona kuti mwana tacikwe busise, wakabweza cinzuma cakalukwa amatete, wakacisingulula abunzuka kuti kacitanjilwi maanzi. Wakamubikka mumo mwana, akuyoobikka cinzuma eeco mumatete malamfu munkomwe yamulonga. ⁴ Mucizi wakwe wakaliimvwi aalaale kalindilila mwana kubona citicitike kulinguwe.

⁵ Eelyo mwana musimbi wa Falo wakaza kumulonga ooko kuti asambe, nkabela aabo bakamusindikila bakali kweendeenda mumbali aamulonga.

Lino ooyo mwanaa Falo wakacibona cinzuma mumatete eelyo wakatuma mubelesi wakwe kuti akacilete. ⁶ Naakacivununa, wakajana mwana mumvwanda mulombe, wakali kulila. Musimbi wakeetezegwa akaambo kamwana, wakaamba kuti, “Nkokuti ooyu mwanaa Muhibulu.” ⁷ Lino ooyo mucizi wamwana wakabuzya mwanaa Falo kuti, “Sena ngunke ndikakweetele mukaintu Muhibulu uunyosya kuti akakulelele mwana ooyu?” ⁸ Mwanaa Falo wakati, “Mbubo koya.” Nkabela musimbi ooyo wakainka waakwiita mbabonya banyina mwana. ⁹ Eelyo mwanaa Falo wakati kumukaintu ooyo, “Mutole mwana ooyu ukandilelele, ndizookubbadela mukucita mulimo ooyo.” Aboobo mukaintu wakatola mwana akuyoomulela. ¹⁰ Mwana ooyo naakakomena, wakamutola kumwanaa Falo musimbi, walo wakamucita kuti abe mwanaakwe. Wakamuulika kuti ngu Mozesi. Nkaambo wakati, “Ndakamununa mumaanzi.”

Mozesi mbwaakatijila kunyika ya Midiyani

¹¹ Nikwakainda ciindi cili mbocibede, Mozesi kakomenede, wakainka kuyooswaya bantu bokwabo, wakaakubona mbuli mbubakali kusungilizigwa kucita milimo miyumu. Alimwi wakabona Muijipiti umwi kauma Muhibulu. ¹² Wakalanga-langa koonse-koonse, lino naakabona kuti taakwe muntu uumbi, wakajaya Muijipiti akumuzikka mumusenga. ¹³ Nibwakaca wakabweeda alimwi, lino wakabona Bahibulu kabalwana mulicabo. Nkabela wakaambila ooyo uulubizizye wakati, “Ino umuumina nzi mweenzinyoko?” ¹⁴ Walo wakaingula kuti, “Ino nguni wakakupa buleli abubetesi alindiswe? Sena uyanda kundijaya ambebo mbuli mbookajaya Muijipiti uulya?” Amvwe boobo Mozesi wakayoowa, wakayeeya kuti, “Nkokuti bantu balizi ncindakacita.”

¹⁵ Lino Falo naakamvwa makani aaya, wakasoleka kuti ajaye Mozesi, pele Mozesi wakatija kuzwa kuli Falo, nkabela wakaakukkala munyika ya Midiyani, kumbali aamukalo wamaanzi.

¹⁶ Lino mupaizi waku Midiyani wakali abana basimbi bali ciloba. Balo bakaza kuzooteka maanzi, bazuzya zinywido zyabutanga bwambelele bwawisi. ¹⁷ Pele beembezi bamwi bakasika akubatanda. Lino Mozesi wakasika akuvuna basimbi aabo, wakabanywisizya butanga bwabo. ¹⁸ Nibakabweeda kuli Luweli wisi, wakababuzya kuti, “Ino mwafwambaana buti kupiluka sunu?” ¹⁹ Balo bakati, “Umwi muntu Muijipiti watuvuna kubeembezi, alimwi ngoonya watutekela maanzi akutunywisizya butanga bwesu.” ²⁰ Mpawo wisi wakababuzya kuti, “Ino muntu ooyu uli kuli? Nkaambo nzi nimwamusiya kusokwe? Kamuya mukamwiite tuzoolye aawe.” ²¹ Mozesi wakazumina kukkala amukwasyi ooyu, nkabela Luweli wakamupa mwanaakwe musimbi, Zipola kuti akwate. ²² Mukaintu ooyu wakazyala mwana mulombe. Aawo Mozesi wakayeeya kuti, “Mebo ndili muzwakule munyika yabantu,” aboobo mwana ooyo wakamuulika kuti Gesyomu.

²³ Nikwakainda ciindi cili mbocibede, mwami Waijipiti wakafwa. Pele Baisilayeli bakacili kupenga mubuzike bwabo alimwi bakali kulililaukila kuti kwabula uubagwisya.

Leza wakamvwa kulila kwabo, ²⁴ amatongoosi aabo, eelyo wakayeeya cizuminano ncaakapanga a Abulahamu, a Izaka alimwi a Jakobo. ²⁵ Leza wakabona buzike bwa Baisilayeli amapenzi aabo.