Kulonga 19

Baisilayeli mbubakasika kucilundu ca Sinai

¹ Mubuzuba butaanzi bwamwezi watatu kuzwa ciindi Baisilayeli kabazwide kale mu Ijipiti bakasika kunkanda ya Sinai. ² Bakasiya busena butegwa Lefidimu akusika kunkanda ya Sinai ooko kwalo nkobakayakila zivuka munsi aacilundu. ³ Walo Mozesi wakatanta mucilundu eeco kuti akaswaangane a Leza.

Lino Mwami Leza wakaita Mozesi mucilundu oomo wakati, “Mboobu mboelede kwaambila bana balunyungu lwa Jakobo, Baisilayeli kuti, ⁴ ‘Mwakabona ncendakacita ku Baijipiti, ambuli mbundakamunununa nywebo amababa aabasikwaze, aakumuleta kulindime. ⁵ Aboobo lino, kuti mundiswiilile akubamba cizuminano cangu, mulaba bantu bangu ncobeni. Nikuba kuti nyika yoonse mbwiibede njiyangu, nywebo muyooba bantu bangu basale. ⁶ Muyooba bantu bandibelekela mbuli bapaizi, musyobo uusalala.’ Oobu mboelede kubaambila Baisilayeli.” ⁷ Aboobo Mozesi wakabweeda akuyooita basololi babantu boonse akubaambila zyoonse Mwami Leza nzyaakamwaambila. ⁸ Mpoonya bantu boonse bakavwiila antoomwe kuti, “Tulacita zyoonse nzyaamba Mwami Leza.” Eelyo Mozesi wakaakwaambila Mwami Leza makani aaya.

⁹ Lino Mwami Leza wakati kuli Mozesi, “Ndiyooboola kulinduwe mukkumbi pati lisiya kuti bantu bazoondimvwe ndanooambaula ayebo kutegwa kabakuzuminina lyoonse.” Mozesi wakaambila Leza eeco ncobakaingula bantu.

¹⁰ Lino Mwami Leza wakati kuli Mozesi, “Koya kubantu, ukabaambile kuti balibambile kukomba sunu ajuunza. Baleelede kusanzya zisani zyabo ¹¹ kutegwa izona kabazoolibambilide. Nkabela mubuzuba oobo, ime nde Mwami Leza ndizooselukila acilundu ca Sinai kababwene bantu boonse. ¹² Uleelede kuyoobeengela munyinza bantu kuzinguluka cilundu, alimwi ukabaambile kuti, ‘Amucenjele kuti mutakatanti cilundu nikuba kuciguma pe. Kufumbwa ooyo uutikacigume, uyoojaigwa. ¹³ Uleelede kuumwa mabwe nikuba kuyaswa amivwi kakunyina aumuguma. Eeci cilajatikizya bantu abanyama. Kwaakusibwa mweembo walwija lwamugutu, bantu bakainke kucilundu.’”

¹⁴ Lino Mozesi wakaseluka kuzwa mucilundu akuunka kubantu, wakabaambila kuti balibambile kuya kukukomba. Bakasanzya zisani zyabo, ¹⁵ amane Mozesi wakati kulimbabo, “Amulibambilile buzuba bwazona. Mutakooni bulo bomwe amukaintu pe.”

¹⁶ Lino mucifumo-fumo cabuzuba bwatatu, kwakali kuzuma andabo acilundu, alimwi kwakali akkumbi pati lisiya mbi, akulila kupati kwamweembo walwija lwamugutu. Nkabela bantu boonse muzivuka bakali kuzyangama akuyoowa. ¹⁷ Eelyo Mozesi wakasolweda bantu kuzwa azivuka kuya kukuswaangana a Leza, bakaakwiima kumbali lyacilundu. ¹⁸ Nkabela cilundu ca Sinai coonse cakali kuunta busi, nkaambo Mwami Leza wakaselukila alincico muciimo camulilo. Busi bwakali kusunta musumpuululu, lino bantu boonse bakali kuzyangama kapati. ¹⁹ Awalo mweembo wakali buya bulilisya. Mozesi naakaambaula, Leza wakamuvuwa mukuzuma. ²⁰ Mwami Leza wakaselukila acilundu ca Sinai, mpoonya wakaita Mozesi kuti atante acilundu, eelyo Mozesi wakainka. ²¹ Mwami Leza wakati kuli Mozesi, “Seluka, koya ukabacenjezye bantu kuti batasotoki munyinza akuboola kuzoondilanga, nkaambo inga bunji bwabo bafwa. ²² Nobaba bapaizi aabo batiboole aafwiifwi ambebo baleelede kusaanguna kulisalazya lwabo, nkaambo kuti bataciti boobo inga ndabasubula.” ²³ Mozesi wakati ku Mwami Leza, “Bantu tabakonzyi kutanta mucilundu ca Sinai, nkaambo wakatucenjezya kuti, ‘Amweenge munyinza munsi acilundu akuucita kuti bube busena butondwa.’” ²⁴ Mpoonya Mwami Leza wakati kuli nguwe, “Seluka ukalete Aloni. Pele bapaizi abantu buyo tabeelede kusotoka munyinza akuboola kulindime, nkaambo inga ndabasubula.” ²⁵ Mpawo Mozesi wakabweeda kubantu akuyoobaambila eezi.