Kulonga 18

Jetulo mbwaakaswaya Mozesi

¹ Lino Jetulo mupaizi waku Midiyani, simakwaakwe Mozesi, wakamvwa zyoonse Leza nzyaakacitila Mozesi abantu bakwe Baisilayeli, ambuli Mwami Leza mbwaakabasolwedela kuzwa mu Ijipiti. ² Aboobo Jetulo, wakatolelela Zipola, mukaintu wa Mozesi, ooyo walo Mozesi ngwaakapilusizye kwabo. ³ Alimwi Jetulo wakaletelela abana ba Mozesi balombe bobilo, Gesyomu a Eliyazaa. Mozesi wakaambide kuti, “Ndimuzwakule munyika yabantu, aboobo umwi mwana wakwe wakamuulika kuti Gesyomu.” ⁴ Alimwi wakalaambide akuti, “Leza wataata wakali ngolugwasyo lwangu, wakandivuna kupanga lya Falo, aboobo umwi mwana wakamuulika kuti Eliyazaa. ⁵ Jetulo, simakwaakwe Mozesi, wakasika amukaintu alimwi abana balombe ba Mozesi bobilo munkanda oomo Mozesi mwaakayaka civuka kucilundu ca Leza. ⁶ Jetulo wakatumizya mulomo kuli Mozesi wakuti, ‘Ime ndime Jetulo simakwaako, ndizabuza kulinduwe, amukaintu wako abana.’” ⁷ Nkabela Mozesi wakainka kuyoomucingauzya, naakaakumujana wakamufugamina akumumyonta. Bakajuzyanya akubuzyanya-buzyanya zyambobapona, bamane bazoonjila mutente. ⁸ Mozesi wakamulungulwida zintu zyoonse Mwami Leza nzyaakacita kuli Falo abantu bakwe Baijipiti akaambo ka Baisilayeli. Wakamwaambila azyabuyumu-yumu boonse mbubakajana munzila, ambuli mbwaakabavuna Mwami Leza. ⁹ Jetulo wakabotelwa kapati akaambo kabubotu bwa Mwami Leza naakavuna Baisilayeli kuzwa ku Baijipiti. ¹⁰ Wakati, “Alumbwe Mwami Leza wakamufutula kuzwa ku Baijipiti akuli Falo. ¹¹ Ndaziba kuti Mwami Leza mupati kwiinda baleza boonse, nkaambo wakacita eeci ku Baijipiti nibakasulaikide Baisilayeli.” ¹² Eelyo Jetulo wakaletela Leza cipaizyo cakutenta alimwi azituuzyo zimwi. Awalo Aloni abasololi boonse Baisilayeli bakaboola kuti balide amwi cinkwa asimakwaakwe Mozesi kumbele lya Leza.

Babetesi mbubakasalwa

¹³ Nibwakaca, Mozesi wakatalika kubeteka bantu, nkabela nkujana bantu bakalibungene kuzwida cifumo-fumo mane masiku. ¹⁴ Jetulo simakwaakwe Mozesi, naakabona milimo yoonse yakali kucita Mozesi, wakabuzya kuti, “Ino milimo nzi yoonse eeyi njocitila bantu? Nkaambo nzi ncocita eeci olikke nkaambo nzi bantu ncobaza kulinduwe kuzwida cifumo-fumo mane kusikila masiku?”

¹⁵ Lino Mozesi wakaingula kuti, “Ndileelede kucita boobu, nkaambo bantu balandizida kuzoobuzya mbuli mbwalailila Leza. ¹⁶ Kuti naa bantu bobilo kabazwangana, balaboola kulindime, ndamana mebo, ndime eembeteka kaambo kabo kuti ndibone naa nguuli uuluzi, alimwi ndilabaambila aalo malailile aa Leza amilawo yakwe.”

¹⁷ Amvwe boobo simakwaakwe Mozesi wakati kulinguwe, “Eeci cintu ncocita taciluzi pe. ¹⁸ Kayi milimo ilakuminya, yebo abantu aabo bali aanduwe. Ooyu mulimo mmupati, tokonzyi kuucita olikke. ¹⁹ Swiilila ndikulailile kabotu mbuli mboelede kucita, alimwi a Leza ulaba aanduwe. Ncibotu kuti wiiminine bantu kuli Leza akumuletela twaambo twabo. ²⁰ Uleelede kubaiisya malailile amilawo yakwe akubapandulwida mbuli mbobeelede kukkala anzyobeelede kucita. ²¹ Nkaako usale baalumi basongo bakonzya kubeteka, mbotibikke kuti babe basololi bazyuulu, bamyaanda, bamakumi osanwe, abamakumi alimwi kabali bantu bayoowa Leza, batayandi zisinkamulomo. ²² Ubabikke babe babetesi babantu, bakkalilile mumilimo eeyo. Yebo banookweetela buyo twaambo tuyumu toonse, pele balo banoobeteka twaambo toonse tuniini. Eeco inga ciyookuubila nkaambo muyooabana mukuli ambabo. ²³ Kuti naa wacita boobo, mukuti Leza nguwalailila inga tiikookuminya milimo pe, abalo bantu lwabo banookoswedwa cakufwambaana twaambo twabo akupiluka caluumuno kumaanda aabo.”

²⁴ Lino Mozesi wakaswiilila majwi aasimakwaakwe, akucita eeco ncaakaamba. ²⁵ Wakasala aabo bantu basongo akati ka Baisilayeli boonse, akubabikka mubusololi bwabantu, bamwi bakaba basololi bazyuulu, bamwi bamyaanda, bamwi bamakumi osanwe, abamwi bamakumi. ²⁶ Bakabeteka bantu kwaciindi coonse. Bakali kuleta milandu miyumu kuli Mozesi, pele balo beni bakali kukosola milandu miniini. ²⁷ Mozesi wakalayana asimakwaakwe, walo wakabweeda kunyika yokwabo.