Kulonga 17

Zyamaanzi aakazwa mubbwe

¹ Lino Baisilayeli boonse bakazwa akusiya nkanda ya Sini, kabaya bulonga-longa kuzwa kucilawo cimwi akuya kuli cimwi mbubonya mbuli malailile aa Mwami Leza. Bakaakusika akuyaka zivuka kubusena butegwa Lefidimu, pele kwakanyina maanzi. ² Nkaako bantu bakatongookela Mozesi akuti kulinguwe, “Kotupa maanzi tunywe.” Mozesi wakaingula kuti, “Nkaambo nzi ncomutongookela ndime? Nkaambo nzi ncomutalika acaali Mwami Leza?”

³ Lino bantu bakafwide nyota kapati, aboobo bakaindilizya akuti, “Ino wakatugwisizya nzi mu Ijipiti akutuleta kuno? Sena wakatweetela kuti tuzoomane kufwa nyota abana besu abanyama besu?”

⁴ Lino Mozesi wakakomba canguzu ku Mwami Leza wakati, “Ino bantu aaba ndabacita buti? Mbaaba bakakatila kuti banduume mabwe!”

⁵ Lino Mwami Leza wakati kuli Mozesi, “Tolelezya abamwi basololi ba Baisilayeli, mulibeelezye muye kumbele. Ubweze amusako wako ngookaumya mulonga wa Nailo, muunke. ⁶ Njooima kumbele lyako abbwe pati kuya kunkanda ya Holebu. Ukalyuume eelyo bbwe pati. Mpoonya maanzi ayoopoomoka mulindilyo aakuti bantu bakanywe.” Nkabela Mozesi wakacita oobo kabalangilide basololi ba Baisilayeli. ⁷ Lino busena oobo bwakaulikwa kuti “Masa” a “Meliba” nkaambo Baisilayeli bakatongooka akutalika Mwami Leza, aawo nibakali kubuzya kuti, “Mwati Mwami Leza mpali akati kesu naa pe?”

Baisilayeli mbubakazunda Baameleki

⁸ Lino Baameleki bakaboola kuzoolwana Baisilayeli ku Lefidimu. ⁹ Eelyo Mozesi wakaambila Josyuwa kuti, “Sala bamwi baalumi, muzooinke juunza kukulwana Baameleki. Mebo njooima atala aacilundu, kandijisi musako wakandipa Leza.” ¹⁰ Eelyo Josyuwa wakacita mbuli mbwakamulailila Mozesi, wakainka kuyoolwana Baameleki, pele Mozesi, Aloni a Huli bakaya akuyootanta cilundu. ¹¹ Kwaciindi Mozesi naakatambikide maboko aakwe mujulu, Baisilayeli bakali kuzunda, pele kuti waalosya maboko aakwe, mpoonya Baameleki bakatalika kuzunda. ¹² Lino maboko aa Mozesi naakaminwa, Aloni a Huli bakamuletela bbwe kuti akkale mpawo, eelyo balo bakaima munsi lyakwe akutabilila maboko aakwe. Bakali kwaatabilide boobo mane kusikila nilyakabbila zuba. ¹³ Munzila eeyi Josyuwa wakabazundila limwi Baameleki mukulwana ooko.

¹⁴ Lino Mwami Leza wakati kuli Mozesi, “Lemba makani aaya mubbuku kuti atakalubwi pe, alimwi umwaambile Josyuwa kuti ndiyoocita kuti Baameleki bakalubilwe limwi munyika.” ¹⁵ Mpoonya Mozesi wakayaka cipaililo akucuulika kuti, “Mwami Leza nindembela yangu.” ¹⁶ Wakati, “Amwiimike ndembela ya Mwami Leza. Walo wakakonkezya kuti ulaba sinkondonyina a Baameleki kwamazyalani oonse.”