Kulonga 1

Mbobakapenzegwa Baisilayeli mu Ijipiti

¹ Ngaaya mazina aabana ba Isilayeli aabo bakainka kunyika ya Ijipiti a Jakobo, umwi aumwi wabo amukwasyi wakwe. ² Lubeni, Simiyoni, Levi, Juda, ³ Isakaa, Zebuloni, Benjamini, ⁴ Dani, Nafutali, Gadi, a Asya. ⁵ Mweelwe wabantu bakazwa mulunyungu lwa Jakobo bakali makumi aali ciloba. Walo Josefa wakali kale mu Ijipiti. ⁶ Josefa abana bokwabo, antoomwe abamusela wakwe boonse, bakamana kufwa. ⁷ Pele Baisilayeli bakazyalana kapati akuba basinguzu. Bakavula cakuti cisi coonse cakazula mbabo.

⁸ Lino kwakanjila mwami mupya wakalela nyika ya Ijipiti, ooyo watakazi Josefa pe. ⁹ Nkabela wakaambila bantu bakwe kuti, “Amulange aaba bantu Baisilayeli bavula alimwi mbaasinguzu kapati. ¹⁰ Lino amuteelele, tuleelede kubacenjelela kuti batavuli kwiindilila. Nkaambo kuti kwabuka nkondo, inga balaba nobayanzana abasinkondoma akuswaangana ambabo kuti batulwane, bamana batije akuzwa mucisi.” ¹¹ Mpoonya bakabikka bantu bakubalanga mukuti bababelesye kapati kutegwa lyoonse kabakatede. Aboobo Baisilayeli bakayakila Falo minzi mipati yiitwa kuti Pitomu a Lamesisi. Eeyi minzi yakali yakuyobweda zilyo. ¹² Pele Baisilayeli nikuba kuti bakali kubafundilizya boobo amilimo miyumu, bakaindilila kuzula cisi coonse. Nkaako Baijipiti bakayoowa Baisilayeli. ¹³ Bakababelesya caluciso ¹⁴ akucitya kuti buumi bwabo buyume amilimo yakubumba zitina, ayakumuunda. Bakabasungilizya kucita yoonse milimo miyumu.

¹⁵ Lino mwami wa Ijipiti Falo wakaambila bakaintu bakali kutumbusya Bahibulu, aaba bakaintu umwi ngu Syifula umwi ngu Puwa. ¹⁶ Falo wakati kulimbabo, “Mwanootumbusya Bahibulu aaba, kuti naa mwabona kuti ooyo mwana watumbukwa mmulombe muleelede kumujaya, pele kuti mmusimbi, mumuleke buyo, mutamujayi pe.” ¹⁷ Pele aabo bakaintu basikutumbusya bakali kuyoowa Leza, aboobo taakwe nibakaswiilila malailile aamwami. Bakalikubaleka bana balombe kabatabajayi. ¹⁸ Lino mwami wa Ijipiti wakaita basikutumbusya akubabuzya kuti, “Ino mwakacitila nzi eeci, muleka bana balombe kuti kabapona?”

¹⁹ Lino balo bakaingula kuti, “Bakaintu Bahibulu tabali mbuli Baijipiti, balo tabakatazigwi kutumbuka pe, inga swebo twaakusika twajana mwana watumbukwa kale.” ²⁰ Lino Leza wakabacitila kabotu basikutumbusya aabo, nkabela Baisilayeli bakacili kuya buvula akuba basinguzu. ²¹ Akaambo kakuti basikutumbusya aaba bakali kuyoowa Leza, awalo Mwami Leza wakavuzya bana babo. ²² Mpawo Falo wakalailila bantu boonse kuti, “Kamubasowela mumulonga boonse bana balombe bazyalwa a Bahibulu, pele bana basimbi kamubaleka kabapona.”