Josyuwa 5

¹ Lino bami ba Baamoli bakali kukkala kumbo lyamulonga wa Jolodani antoomwe abami boonse ba Bakenani bakali kukkala kumbali aalwizi nibakamvwa mbuli Mwami Leza mbwaakaandaanya mulonga wa Jolodani kuti Baisilayeli bainde anyika njumu, bakayoowa kapati, lyakabaleka akaambo ka Baisilayeli.

Mbubakapalulwa ku Giligali

² Lino ciindi eeco nciconya Mwami Leza wakaambila Josyuwa kuti, “Bamba mabwe aabosya, upalule Baisilayeli batana palulwa.” ³ Mpoonya Josyuwa wakapanga mabwe aabosya akupalula Baisilayeli ku Gibeyati Haalaloti. ⁴ Lino nceeci cakacita kuti Josyuwa abapalule. Boonse aabo bakazwa mu Ijipiti, nkokuti aabo bakali kukonzya kulwana, bakafwida munkanda kabacili munzila kuzwa ku Ijipiti. ⁵ Bantu boonse bakazwa mu Ijipiti bakalipalwidwe, pele aabo bakazyalilwa munkanda tiibakana pe. ⁶ Baisilayeli bakakkala munkanda kwamyaka iili makumi one mane kusikila baalumi boonse bakali kukonzya kulwana bakazwa mu Ijipiti bafwa. Eeci cakacitika akaambo kakuti tiibakali kuswiilila Mwami Leza. Mbubonya mbuli mbwaakakonkezede, Mwami Leza taakabazumizya kuti babone nyika eeyi njaakasyomezya kuli basikale besu kuti uzootupa, nyika iikunka mukupa abuci. ⁷ Nkaako bana babo bakazyalilwa mulweendo mbambabo Josyuwa mbaakapalula, nkaambo tiibakanapalulwa pe. ⁸ Nibakamana kupalulwa, bantu boonse bakakkala aawo mane kusikila bapona.

⁹ Lino Mwami Leza wakaambila Josyuwa kuti, “Sunu ndamugwisya masampu aalya ngomwakajisi mu Ijipiti.” Ncenciceeco busena oobu ncobuciitwa kuti Giligali asunu.

¹⁰ Lino Baisilayeli kabacili ku Giligali mucibanda ca Jeliko, bakalya Pobwe lya Kwiindilila mubuzuba bwakkumi aane bwamwezi ciindi cakumangolezya. ¹¹ Pobwe lya Kwiindilila nilyakamana, buce buyo bakalya zilimwa zyanyika eeyo, Bakayoka maila akulya zinkwa zitakwe mimena. ¹² Bucica kabalide kale zilimwa eezi, mana taakaloka limbi pe. Kuzwa leelyo Baisilayeli tiibakalya limbi mana, bakalya buyo zyakaliminwe mwaka ooyo.

Josyuwa mbwaakabona muntu wakajisi panga

¹³ Lino Josyuwa naakasika aafwiifwi amunzi wa Jeliko, wakabona muntu wakaimvwi kumbele lyakwe kajisi apanga. Josyuwa wakainka kwakaimvwi muntu ooyo akumubuzya kuti, “Sena uli umwi wesu, naa uli wabasinkondoma?” ¹⁴ Muntu ooyu wakaingula kuti, “Peepe, mebo ndiwaano nkaambo ndendime mupati wabasilumamba ba Mwami Leza.” Mpoonya Josyuwa wakavuntama ansi wati, “Simalelo wangu, ino ncinzi ncoyanda kuti ndicite?”

¹⁵ Mupati wabasilumamba ba Mwami Leza wakati, “Samununa ndyasyo zyako, nkaambo aawa mpoimvwi alasalala.” Josyuwa wakacita oobo.