Josyuwa 4

Mbubakabikka mabwe aaciibalusyo

¹ Lino bantu boonse nibakazubuka mulonga wa Jolodani, Mwami Leza wakaambila Josyuwa kuti, ² “Sala baalumi bali kkumi ababili omwe-omwe kuzwa kumisyobo yoonse, ³ ubalailile kuti babweze mabwe aali kkumi aabili kuzwa akati kamulonga wa Jolodani aawo bapaizi mpubaimvwi, mwaatolelezye, mukaabikke ooko nkomuyooonena sunu.”

⁴ Mpoonya Josyuwa wakaita baalumi bali kkumi ababili mbaakasala kuzwa kumusyobo omwe-omwe wa Baisilayeli, ⁵ akubaambila kuti, “Amwiinde kumbele lyabbokesi lyacizuminano ca Mwami Leza wanu, muye akati kamulonga wa Jolodani. Omwe-omwe kuzwa kumisyobo yanu uleelede kukulika bbwe. ⁶ Mabwe aaya ayooba ciibalusyo kulindinywe. Mazuba aaboola, bana banu baakumubuzya kuti ino mabwe aaya aamba nzi? ⁷ Mukabaambile kuti ciindi bbokesi lyacizuminano ca Mwami Leza nilyakazubusigwa, maanzi aamulonga wa Jolodani akaandaana. Mabwe aaya ayooibalusya Baisilayeli lyoonse eeco cakacitika.”

⁸ Eelyo baalumi aabo bakacita mbubonya mbuli mbwaakabalailila Josyuwa. Bakabweza mabwe aali kkumi aabili kuzwa akati kamulonga wa Jolodani, omwe-omwe kuzwa kumisyobo yabo mbuli Mwami Leza mbwaakalailila Josyuwa. Bakaabweza, baakwaatula ooko nkubakaakoonena. ⁹ Josyuwa wakaimika mabwe aali kkumi aabili aakazwa akati kamulonga wa Jolodani, abusena aalya aakaimvwi bapaizi bakabwezede bbokesi lyacizuminano. Mabwe aaya mpaacili asunu aawo.

¹⁰ Lino bapaizi aabo bakabwezede bbokesi, bakaciliimvwi akati kamulonga wa Jolodani mane kusikila nibakacita zintu zyoonse eezyo Mwami Leza nzyaakalailila Josyuwa kuti bazicite. Bakacita mbubonya mbuli Mozesi mbwaakaambilide Josyuwa. Bantu bakafwambaana kuzubuka. ¹¹ Bamane buyo kuzubuka, bapaizi bakabwezede bbokesi lyacizuminano ca Mwami Leza bakainda kumbele, bantu boonse kabalangilila.

¹² Lino basilumamba bamisyobo ya Lubeni, Gadi, acisela camusyobo wa Manase bakazubuka mulonga kabajisi azilwanyo zyabo, bakali kumbele lya Baisilayelinyina, mbubonya mbuli Mozesi mbwaakalailila. ¹³ Kwakazubuka basilumamba bakatisike kuzyuulu zili makumi one kumbele lya Mwami Leza, kabageme mabanda aa Jeliko. ¹⁴ Buzuba oobo zyakacita Mwami Leza, zyakapa kuti Baisilayeli bazibe kuti Josyuwa wakali mwaalumi singuzu. Bakamulemeka mubuumi bwakwe boonse mbubonya mbuli mbubakali kulemeka Mozesi.

¹⁵ Lino Mwami Leza wakaambila Josyuwa kuti, ¹⁶ “Lailila bapaizi babwezede bbokesi lyacizuminano kuti bazwe mumulonga wa Jolodani.” ¹⁷ Josyuwa wakalailila bapaizi aabo kuti bazubuke. ¹⁸ Mpawo bapaizi bakazubuka kababwezede abbokesi lyacizuminano ca Mwami Leza. Bazubuke buyo, maanzi akabuwana akufwasuka mbuli lyoonse.

¹⁹ Mubuzuba bwakkumi bwamwezi mutaanzi, bantu bakalonga kuzwa kumbali aamulonga wa Jolodani, bakaakuyaka zivuka ku Giligali kujwe lyamunyinza wa Jeliko. ²⁰ Ooko Josyuwa wakaimika mabwe aalya aali kkumi aabili ngibakabweza mumulonga. ²¹ Wakaambila Baisilayeli kuti, “Mazuba aaboola, bana banu baakumubuzya naa mabwe aaya aamba nzi, ²² mukabaambile kuti twakazubuka mulonga wa Jolodani anyika njumu. ²³ Nkaambo Mwami Leza wanu wakaandaanya maanzi aa Jolodani kumbele lyanu, kumane nyoonse mwakazubuka. Mwami Leza wanu wakacita kumulonga wa Jolodani mbubonya mbuli mbwaakacita ciindi ciya kulwizi lusalala. Wakalwaandaanya mane kusikila toonse nitwakazubuka. ²⁴ Wakacita eeci kuti misyobo yoonse yaansi izibe kuti Mwami Leza ngusinguzu. Nkaako mweelede kulemeka Mwami Leza lyoonse.”