Josyuwa 3

Baisilayeli mbubakazubuka mulonga wa Jolodani

¹ Lino buce buyo cifumo-fumo, Josyuwa a Baisilayelinyina boonse bakalonga kuzwa ku Syitimu baakukkalila kumbali aamulonga wa Jolodani kulibambilila kuzubuka. ² Kwiinde buyo mazuba otatwe, basololi bakeendeenda akati kazivuka, ³ akulailila bantu kuti, “Mwabona buyo kuti bapaizi, Balevi banyamuna bbokesi lyacizuminano ca Mwami Leza wanu, anywebo mulitalikizye, mubatobele. ⁴ Akaambo kakuti tamunasikide kuno, bayoomutondezya nzila. Pele mutakabi nimweendela afwiifwi abbokesi lyacizuminano, mweelede kuti kamutantamukide kwatukokola tuli zyuulu zyobilo kuzwa kuli ndilyo.”

⁵ Mpawo Josyuwa wakaambila bantu kuti, “Amulisalazye, nkaambo juunza mabala Mwami Leza uyoocita maleele.” ⁶ Lino Josyuwa wakazooambila bapaizi kuti, “Amubweze bbokesi lyacizuminano, muzubuke bantu boonse kabatana.” Abalo bakacita mbubonya mbubakaambilwa.

⁷ Lino Mwami Leza wakaambila Josyuwa kuti, “Nceticite sunu cilapa kuti Baisilayeli boonse bakulemeke, balaziba kuti ndilaanduwe mbubonya mbuli mbundakali aa Mozesi. ⁸ Ambila bapaizi aabo babweza bbokesi lyacizuminano kuti basika buyo ankomwe yamulonga wa Jolodani, banjile-njile maanzi, akwiima.”

⁹ Kumane Josyuwa wakaambila Baisilayeli kuti, “Amuboole kuno muswiilile majwi aa Mwami Leza wanu. ¹⁰ Ndendilyo nomutizibe kuti Leza muumi ulaandinywe, alimwi nomutizibe kuti uyootanda ncobeni Bakenani, Bahiti, Bahivi, Bapelezi, Bageegasyi, Baamoli a Bajebusi. ¹¹ Amubone, bbokesi lyacizuminano ca Mwami wanyika yoonse mbwiibede lilazubusigwa mulonga wa Jolodani nywebo kamutana. ¹² Amusale baalumi bali kkumi ababili omwe-omwe kuzwa kumisyobo yoonse ya Baisilayeli. ¹³ Nkabela bapaizi aabo bayumuna bbokesi lyacizuminano ca Mwami Leza, Mwami wanyika yoonse mbwiibede, mbobatikaalyatile buyo maanzi aamulonga, maanzi aayo ayooandaana akati akulundana lubazu lumwi alumwi.”

¹⁴ Lino bantu nibakalonga aawo kuti bazubuke mulonga wa Jolodani, bapaizi aabo babweza bbokesi lyacizuminano bakeendela kumbele. ¹⁵ Lyoonse litebulwa, mulonga wa Jolodani ulazula kapati. Pele bapaizi aabo bakali kunyamuna bbokesi lyacizuminano mbubakaalyatila buyo maanzi, ¹⁶ mulonga nkuuli kutala wakaima. Maanzi akalundana mane kusikila kumunzi wa Adamu kumbali a Zaletani. Maanzi aakali kukunkila kulwizi lwa Alaba, nkokuti Lwizi lwa munyo akaandaana. Nkaako Baisilayeli bakazubuka mulonga aawo kulangana amunzi wa Jeliko. ¹⁷ Bapaizi bakabwezede bbokesi lyacizuminano ca Mwami Leza, bakaima anyika njumu akati kamulonga wa Jolodani mane kusikila Baisilayeli boonse nibakamaninina kuzubuka anyika njumu.