Josyuwa 24
Josyuwa mbwaakakananina bantu ku Syekemu
1 Lino Josyuwa wakabunganya misyobo ya Isilayeli ku Syekemu. Wakaita bapati, basololi, babetesi, abamwi balupati-pati ba Baisilayeli, kuti baime kumbele lya Leza. 2 Mpawo Josyuwa wakaambila bantu boonse kuti, “Mboobu mbwaamba Mwami Leza, Leza wa Isilayeli, ‘Kale-kale basikale banu, kubikkilizya Tela wisi Abulahamu a Nahoo bakali kukkala mutala lyamulonga wa Yufuletisi akukomba baleza bambi.’ 3 Pele ndakagwisya sikale wanu Abulahamu akumuzubusya mulonga ooyo, ndakamusolweda kuya kunyika ya Kenani, alimwi ndakamupa lunyungu lunji. Ndakamupa Izaka, 4 awalo Izaka ndakamupa Jakobo a Isau. Nyika yazilundu zyaku Siiya ndakiipa Isau, pele Jakobo abana bakwe bakainka ku Ijipiti. 5 Bweende-bweende ndakatuma Mozesi a Aloni, ndakapenzya Baijipiti a zeezyo nzindakacita, mbwindakamugwisya nywebo omuya. 6 Ciindi nindakagwisya basikale banu mu Ijipiti, nibakasika kulwizi lusalala, Baijipiti bakabatobela ankalaki abasimabbiza. 7 Baisilayeli nibakabona boobo, bakalilila Mwami Leza kuti abagwisye, eelyo wakabikka mudima akati kandinywe a Baijipiti. Kumane wakabavumbya lwizi baloba. Mwakalibonena eezyo nzindakacita ku Baijipiti. Mwakakkala munkanda kwaciindi cilamfu.
8 “Kuzwa kooko ndakamutola kucisi ca Baamoli cili kujwe lyamulonga wa Jolodani. Bakamulwana, pele ndakabaaba kulindinywe. Ndakabanyonyoona kumbele lyanu, mwakatola nyika yabo. 9 Ciindi Balaki mwanaa Zipoo, mwami waku Mowabu naakayanda kuzoomulwana, wakaita Balaamu mwanaa Beyo kuti azoomusinganye. 10 Pele ndakakaka kuswiilila zyakaamba Balaamu, aboobo wakamuleleka. Ndakamuvuna kuzwa kulinguwe. 11 Mwakazubuka mulonga wa Jolodani mwaakusika kumunzi wa Jeliko. Bantu bamumunzi wa Jeliko bakamulwana, mbubonya mbuli bwakacita Baamoli, Bapelezi, Bakenani, Bahiti, Bageegasyi, Bahivi a Bajebusi. Abalo aaba ndakabaaba kulindinywe. 12 Ndakabatumina manko, ngaakamutandila bami bobilo ba Baamoli. Talili panga nibuba buta bwanu bwakacita kuti bazundwe. 13 Nkaako ndakamupa nyika njimwatakabelekela alimwi aminzi njimwatakayaka, mulakkala mulinjiyo akulya nsaansa amaoliva ngimwatakasyanga.”
14 Lino Josyuwa wakaindilizya akuti, “Amulemeke Mwami Leza akumubelekela cakusyomeka. Amusowe baleza aabo basikale banu mbibakali kukomba mutala lyamulonga uulya amu Ijipiti, mubelekele Mwami Leza. 15 Pele kuti kamutayandi kubelekela Mwami Leza amusale sunu ooyo ngomweelede kubelekela, naa muyanda kubelekela baleza aabo basikale banu mbibakali kukomba mutala lyamulonga uulya, naa baleza ba Baamoli bali munyika eeyi njomukkede. Pele mebo lwangu amukwasyi wangu tulabelekela Mwami Leza.”
16 Mpoonya bantu bakaingula kuti, “Tatukonzyi kuleka Mwami Leza kuti tubelekele baleza bambi! 17 Mwami Leza wesu lwakwe nguwakatugwisya abasikale besu mu Ijipiti mubuzike, wakacita zigambya katulibwenene. Wakatukwabilila mulweendo lwesu loonse aakati kamisyobo mutwakainda. 18 Mwami Leza nguwakatutandila misyobo yoonse, kubikkilizya a Baamoli bakakkede munyika iino. Aswebo mbubonya tuyoobelekela Mwami Leza, nkaambo ngu Leza wesu.”
19 Kumane Josyuwa wakaambila bantu kuti, “Ambweni inga mulaba nomutabelekeli Mwami Leza. Nkaambo ngu Leza uusalala, ngu Leza uutalekeleli bakomba baleza bambi. Takooyoolekelela buzangi bwanu niziba zinyonyoono zyanu. 20 Kuti mukake Mwami Leza akugama kubelekela baleza bambi, uyoomufutatila akumuletela mapenzi mane kusikila mukalobe myoo, nikuba kuti kusaanguna wakali kumucitila zibotu.”
21 Pele bantu bakaambila Josyuwa kuti, “Peepe, tuyoobelekela Mwami Leza.”
22 Aawo Josyuwa wakati, “Muli bakamboni banu nobeni mukuti mwasala kubelekela Mwami Leza.” Balo bakaingula kuti, “Iiyi, tuli bakamboni.”
23 Mpoonya Josyuwa wakati, “Mbubo, lino amusowe baleza bambi aabo bali akati kanu, mubikke myoyo yanu ku Mwami Leza, Leza wa Isilayeli.”
24 Bantu bakaambila Josyuwa kuti, “Tuyoobelekela Mwami Leza wesu, tunoomuswiilila.”
25 Aboobo mubuzuba oobo Josyuwa wakapanga cizuminano abantu, akubalembela malailile amilawo ku Syekemu. 26 Amane Josyuwa wakalemba zintu eezi mubbuku lya Mulawo wa Leza. Mpoonya wakabweza bbwe pati akuliimika munsi amubanga kumbali abusena busalala bwa Mwami Leza. 27 Amane wakaambila bantu boonse kuti, “Amubone, bbwe eeli liyooba kamboni kulindiswe. Nkaambo lyamvwa majwi oonse Mwami Leza ngaatwaambila. Liyooba kamboni kulindinywe kuti naa mutakasyomeki kuli Leza wanu.” 28 Kuzwa waawo Josyuwa wakabaleka bantu, eelyo bakapiluka kumaanda aabo.
Kufwa kwa Josyuwa a Eliyazaa
29 Lino musule azintu eezi, Josyuwa mwanaa Nuni mubelesi wa Mwami Leza wakafwa, wakali aamyaka iili mwaanda akkumi. 30 Bakamuzikka munyika eeyo njaakapegwa ku Timunatisela, munyika yatulundu-lundu ya Efulemu, kubbazu lyakunyika lyacilundu ca Gaasyi.
31 Nkabela Baisilayeli bakabelekela Mwami Leza mumazuba aa Josyuwa oonse amumazuba aabapati aabo boonse bakasyaala ciindi naakafwa, abaabo bakabona zintu zyoonse eezyo Mwami Leza nzyaakacitila Baisilayeli.
32 Lino mafuwa aa Josefa aayo Baisilayeli ngibakabwezelezya kuzwa ku Ijipiti, bakaazikka ku Syekemu munyika eeyo Jakobo njaakaula amali aansiliva aali mwaanda kuzwa kubana ba Hamoo wisi Syekemu. Nyika eeyi yakaba lukono yalunyungu lwa Josefa.
33 Awalo Eliyazaa mwana wa Aloni wakafwa, bakamuzikka ku Gibeya, munzi wakapegwa mwanaakwe Fineyasi. Munzi ooyu wakali munyika yatulundu-lundu ya Efulemu.