Josyuwa 23
Josyuwa mbwaakalayana abantu
1 Lino nikwakainda ciindi cilamfu, Mwami Leza wakacita kuti Baisilayeli baliibe kuzwa kuli basinkondonyina boonse bakabazingulukide. Ciindi eeci Josyuwa wakalimudaala kapati. 2 Mpoonya wakaita Baisilayeli boonse, bapati, basololi, babetesi, alimwi abamwi balupati-pati wabaambila kuti, “Mebo ndaba mudaala kapati. 3 Nywebo lwanu nobeni mwakalibonena zintu zyoonse eezyo Mwami Leza nzyaakacita kumisyobo eeyi akaambo kandinywe. Mwami Leza lwakwe mwini nguwakamulwanina. 4 Amuyeeye kuti ndakamupa nyika yoonse yamisyobo eeyi iisyeede kuti ibe yanu, kubikkilizya anyika yamisyobo njindakazunda, yakali akati kamulonga wa Jolodani alwizi lupati kumbo. 5 Mwami Leza wanu uyoomutandila mbabo basinkondonyoko. Uyoobatanda, kuti nywebo mukatole nyika yabo, mbubonya mbuli Mwami Leza wanu mbwaakamusyomezya. 6 Amuzyandamane, mucenjele kuti mutasusyi zilembedwe mubbuku lya Mulawo wa Mozesi. Taakwe ncomweelede kususya pe. 7 Tamweelede kumvwana amisyobo eeyi iicili akati kanu, mutaambi nikuba kukomba mumazina aabaleza babo. Tamweelede kubabelekela nikuba kubakomba pe. 8 Pele mweelede kukakatila ku Mwami Leza wanu mbubonya mbuli mbomucita sunu. 9 Mwami Leza wakamutandila misyobo iili aanguzu, cakuti kusikila sunu taakwe muntu naba omwe uukonzya kumuyumina. 10 Mazuba aano omwe-omwe wanu ulakonzya kutanda bantu bali cuulu, nkaambo Mwami Leza wanu nguumulwanina, mbubonya mbuli mbwaakasyomezya. 11 Lino amucenjele kapati kuti muyande Mwami Leza wanu. 12 Pele kuti muleke, mutalike kumvwana amisyobo eeyi iisyeede akati kanu, kamukwatana akumvwana ambabo, 13 mukazibe kuti Mwami Leza wanu takiitandi misyobo eeyi. Balo bayooba tukole twakumuca. Bayooba zikwabbuzyo mukalobe myoo munyika mbotu eeyi Mwami Leza wanu njaakamupa.
14 “Lino njanda kumusiya. Mulizi amyoyo yanu yoonse alimwi amyuuya yanu yoonse kuti taakwe cisyomezyo cibotu niciba comwe eeco Mwami Leza ncaatakacita. Taakwe niciba comwe catakacitika, zyoonse zyakazuzikizigwa. 15 Pele mbubonya mbuli zisyomezyo zibotu zyoonse Mwami Leza wanu mbwaakazizuzikizya, mbubonya oobo Mwami Leza ulakonzya kumuletela bubi, mane kusikila nyoonse mukanyonyooke kuzwa anyika mbotu eeyi njaakamupa. 16 Kuti naa mukatyole cizuminano ca Mwami Leza wanu eeco ncaakamulailila, mukatalike kubelekela baleza bambi akubakomba, Mwami Leza mubukali bwakwe uyoomusubula. Nkokuti muyooloba kufwambaana munyika mbotu eeyi njaakamupa.”