Josyuwa 20

Minzi yakulivunina

¹ Lino Mwami Leza wakaambila Josyuwa kuti, ² “Ambila Baisilayeli kuti basale minzi yakulivunina eeyo njindakamulailila kwiindila muli Mozesi, ³ kutegwa muntu ooyo wajaya muntunyina muntenda kutali caali, kakonzya kutijila nkuko kuti alivune kuzwa kuli simukowanyina mufu. ⁴ Kuti naa watijila kuli umwi waminzi eeyi, weelede kuti aakusika akaime amulyango wamunzi, kwamana akaambile bapati bamunzi mulandu wakwe. Ndendilyo nobakonzya kumuzumizya kunjila mumunzi akumupa busena bwakukkala ambabo. ⁵ Kuti naa simukowa wamufu wamutandila, bapati aabo tabeelede kupa simulandu ooyo kuli simukowa wamufu, nkaambo taakwe naakamujaya acaali alimwi taakwe naakamusulide. ⁶ Uleelede kukkala mumunzi mane kusikila bankuta bakamubeteke. Kwamana unookkede mumunzi ooyo kusikila kulufu lwamupaizi mupati. Ndendilyo nakonzya kupilukila kwakwe kumunzi ngwaakatijide.”

⁷ Aboobo bakasala munzi wa Kedesyi mu Galilii, wakali munyika yatulundu-lundu ya Nafutali, Syekemu munyika yatulundu-lundu ya Efulemu, awa Kiliyatiaaba, uuli ngu Hebuloni wakali munyika yatulundu-lundu ya Juda. ⁸ Mutala lyamulonga wa Jolodani kujwe lya Jeliko wakasala Beza uuli mugundu lyamusyobo wa Lubeni, amunzi wa Lamoti wakali mu Giliyadi munyika yamusyobo wa Gadi, amunzi wa Golani wakali mu Basyani munyika yamusyobo wa Manase. ⁹ Kufumbwa Muisilayeli naba muzwamasi ngobakkala limwi wajaya muntunyina muntenda wakali kukonzya kutijila kuminzi eeyi yakasalwa. Taakwe simukowa wamufu walikunga wamujaya katanabetekwa abankuta.