Josyuwa 17

Nyika yakumbo lya Jolodani

¹ Lino ndoolu lukono lwamusyobo wa Manase, mwana wakusaanguna wa Josefa. Makii wakali mwana wakusaanguna wa Manase. Makii wakali ngosikale wa Bagiliyadi. Ooyu nguwakatola munzi wa Giliyadi awa Basyani, nkaambo Bamakii bakali basilumamba bayumu. ² Nyika yakali kumbo lyamulonga wa Jolodani yakapegwa Bamanase boonse muziinga zya Abiyeza, Heleki, Asiliyeli, Syekemu, Hefa a Syemida. Mbaaba bamwi balunyungu lwa Manase mwanaa Josefa muziinga zyabo. ³ Zelofehadi mwanaa Hefa, mwanaa Giliyadi, mwanaa Makii, mwanaa Manase wakazyala bana basimbi balo, mazina aabo ngaaya: Mala, Nowa, Hogila, Milika a Tiiza. ⁴ Basimbi aaba bakainka kuli Eliyazaa mupaizi akuli Josyuwa mwanaa Nuni, akubasololi bamwi baakuti, “Mwami Leza wakalailila Mozesi kuti, atupe lukono lwesu akati kabakwesu.” Nkaako Josyuwa wakabapa lukono lwabo antoomwe abana bokwabo wisi, mbubonya mbuli Mwami Leza mbwaakalailila. ⁵ Ncenciceeco Manase ncaakatambula zyaabilo zili kkumi kunze aanyika ya Giliyadi a Basyani zili kujwe lyamulonga wa Jolodani. ⁶ Wakazitambula nkaambo kakuti lunyungu lwabana basimbi alwabalombe lwakapegwa nyika. Nyika ya Giliyadi yakapegwa kuli balunyungu lwa Manase bamwi.

⁷ Nyika ya Manase yakali kutalikila ku Asya mane kuyoosika ku Mikimetati kujwe lyaku Syekemu. Kuzwa kooko munyinza wabo wakali kwiinda kumusanza mane waakujatikizya abantu bakali kukkala ku Enitapuwa. ⁸ Manase nguwakali aanyika ya Tapuwa, pele munzi wa Tapuwa wini uuli amunyinza anyika ya Manase wakali wa Baefulemu. ⁹ Kuzwa kooko munyinza wakaindilila wagama kumusanza kukalonga ka Kana. Ooko kwakali minzi ya Baefulemu yakali akati kaminzi ya Manase. Kulubazu oolu munyinza wa Manase wakali kalonga nkokali kunyika nkabela walo wakali kugolela mulwizi. ¹⁰ Nyika yakumusanza yakali ya Efulemu yakubbazu lyakunyika yakali ya Manase. Nyika ya Manase yakali kugolela kulwizi, kubbazu lyakunyika nkubakali kupana munyinza a Asya, kujwe nkubakali kupana munyinza a Isakaa. ¹¹ Muzisi zya Isakaa a Asya, Manase wakajisi minzi ya Betisyani, Ibiliyamu, antoomwe abantu bamumunzi wa Doo, uuli kumbali aankomwe, Endoo, Taanaki, awa Megido antoomwe atunzi twayo. ¹² Pele nikuba boobo Bamanase tiibakakonzya kutanda bantu bakali kukkala muminzi eeyi pe. Nkaako Bakenani bakacilikkede munyika eeyo. ¹³ Nikuba kuti Baisilayeli bakaba aanguzu, taakwe nibakatanda Bakenani, pele bakabacita bazike.

Baefulemu a bamanase mbubakakumbila nyika iimbi

¹⁴ Lino balunyungu lwa Josefa bakabuzya Josyuwa kuti, “Ino nkaambo nzi ncookatupa nyika nsyoonto? Bona mazuba aano tuli banji kapati nkaambo Mwami Leza watuleleka.”

¹⁵ Josyuwa wakaingula kuti, “Kuti naa muli banji alimwi nyika yatulundu-lundu ya Efulemu yamuceela, kamuya munyika ya Bapelezi a Balefa mukaakuteme cisaka, ibe nyika yanu.”

¹⁶ Mpawo balunyungu lwa Josefa bakaingula kuti, “Nyika yatulundu-lundu yatuceela, alimwi Bakenani boonse bakkala mucibanda bajisi nkalaki zyalubulo. Nkalaki nzyalubulo zyabaabo bakkala mu Betisyani, atunzi twawo abaabo bakkala mukkuti lya Jezuleeli.”

¹⁷ Pele Josyuwa wakaambila balunyungu lwa Josefa, nkokuti ziinga zya Efulemu a Manase kuti, “Muli bantu banji alimwi muli basinguzu. Tamutibe buyo acaabilo comwe pe. ¹⁸ Nyika yatulundu-lundu ilaba yanu, nikuba kuti ncisaka muyoocitema mane kuyoosika kumagolelo aaco. Nyika iyooba yanu nikuba kuti Bakenani bajisi nkalaki zyalubulo alimwi mbayumu, muyoobatanda.”