Josyuwa 14
Nyika kumbo lyamulonga wa Jolodani mbuyakapambaulwa
1 Lino nzeezi zisi eezyo Baisilayeli nzibakatambula mu Kenani kuti zibe lukono lwabo. Eliyazaa mupaizi a Josyuwa mwanaa Nuni antoomwe abapati baziinga zyamisyobo ya Isilayeli mbibakapambawida bantu nyika. 2 Mbubonya mbuli Mwami Leza mbwaakalailila Mozesi. Zisi zyamisyobo iili fuka acisela zyakapegwa kwiindila mukuuma cisolo. 3 Mozesi wakapede kale zisi kumisyobo yobilo acisela kuti zibe lukono lwayo. Zisi eezi zyakali kujwe lyamulonga wa Jolodani. Pele Balevi taakabakonya. 4 Bana ba Josefa, ba Manase a Efulemu, bakali misyobo yobilo. Balevi taakwe nibakapegwa caabilo, ccita buyo minzi yakali amacelelo aaŋombe ambelele zyabo. 5 Mbubonya mbuli Mwami Leza mbwaakalailila Mozesi. Baisilayeli bakapambaulilana nyika eeyi.
Kalebi mbwaakapegwa munzi wa Hebuloni
6 Lino bantu ba Juda bamwi bakainka ku Giligali kuli Josyuwa. Ooko Kalebi mwanaa Jefune, Mukenizi wakamwaambila kuti, “Ulizi mbuli Mwami Leza mbwaakaamba kuli Mozesi mubelesi wakwe katucili mu Kadesyibaaneya kujatikizya zyanduwe andime. 7 Ciindi eeco Mozesi mubelesi wa Mwami Leza naakandituma kuyootwela nyika kuzwa ku Kadesyibaaneya ndakali amyaka iili makumi one. Nindakaakuzwa kooko ndakazoomwaambila makani oonse. 8 Pele Baisilayeli aabo mbindakainkide aabo bakaamba zyakubeja zyakuti bantu bayoowe. Mebo kundigama ndakatobela Mwami Leza wangu amoyo woonse. 9 Ncenciceeco mubuzuba oobo Mozesi ncaakandikonkezya kuti, ‘Nyika eeyo njoyoolyata iyooba lukono lwako abalunyungu bako kukabe kutamani. Nkaambo kakuti wakatobela Mwami Leza wangu amoyo woonse.’
10 “Ino ono bona, kwainda myaka iili makumi one aisanu kuzwa ciindi eeco Mwami Leza naakaambila Mozesi. Eeci cakali ciindi Baisilayeli nibakali kwiingaila munkanda. Langa, ono ndijisi myaka iili makumi aali lusele aisanu! 11 Ndicili muyumu mbubonya mbuli ciindi ciya Mozesi naakandituma. Ndicili muyumu cakuti ndakonzya kuya kunkondo mbubonya mbuli mbundakali kukonzya kaindi. 12 Ono ndikumbila kuti undipe nyika yatulundu-lundu iilya Mwami Leza njaakandisyomezya buzuba buya. Yebo lwako wakamvwa kuti Baanaki mbabakkala munyika iilya, akuti minzi yabo mipati alimwi ilikwabilidwe. Pele kwiindila munguzu zya Mwami Leza njoobatanda, mbubonya mbuli mbwaakaamba.”
13 Kumane Josyuwa wakaleleka Kalebi akumupa munzi wa Hebuloni kuti ube lukono lwakwe. 14 Ncenciceeco Hebuloni ncuuli munzi wa Kalebi mwanaa Jefune Mukenizi asunu. Wakaba wakwe akaambo kakuti wakatobela Mwami Leza, Leza wa Isilayeli, amoyo woonse. 15 Munzi wa Hebuloni kusaanguna wakali kwiitwa kuti Kiliyatiaaba. Muntu uutegwa Aaba wakali Muanaki uuzizilwe kapati akati ka Baanakinyina. Nkabela kwakaba luumuno munyika, kwakanyina nkondo pe.