Joni 8

Mukaintu wakajatwa mubumambe

¹ Lino Jesu wakainka kucilundu camisamu ya Oliva. ² Nkabela cifumo-fumo wakabweeda kuŋanda ya Leza, wakanjila. Wakakkala akwiisya bantu, nkaambo bantu banji-banji bakasika kulinguwe. ³ Mpoonya aawo bamayi ba Mulawo a Bafalisi bakamuletela mukaintu umwi wakajatwa mubumambe. Bakamwiimika akati. ⁴ Eelyo bakaambila Jesu kuti, “Omwiiyi, ooyu mukaintu wajatwa mubumambe. ⁵ Nkabela mu Mulawo Mozesi ulailila kuti bakaintu banga bajatwa mubumambe mbuli ooyu kabajaigwa cakuumwa mabwe. Ino yebo uti nzi mukaambo aaka?” ⁶ Mukumubuzya boobo bakali kumuteya kutegwa bamujanine mpawo kaambo.

Pele Jesu wakakotama akutalika kulemba ansi amunwe. ⁷ Lino nibakacili kumugubizya amubuzyo ooyu, wakakotamuka akubaambila kuti, “Muntu uutakwe cinyonyoono akati kanu aawa asaangune kufusa bbwe kumukaintu ooyu.” ⁸ Amane wakakotama alimwi akulemba ansi amunwe. ⁹ Nibakamvwa boobo, bakatalika kusomooka omwe-omwe kabainka, kutalikila kuli balupati mane limwi kwaakusyaala mukaintu ooyo alikke kaimvwi kumbele lya Jesu. ¹⁰ Jesu naakakotamuka, wakabuzya mukaintu ooyo kuti, “Mukaintu, ino balikuli basimulandunyoko? Sena taakwe wakupa mulandu?”

¹¹ Walo wakati, “Peepe, taakwe, O Mwami.” Mpawo Jesu wakamwaambila kuti, “Ambebo nsikupi mulandu pe. Koya, pele ono utakabisyi limbi!”

Bumboni bwakwe Jesu mbwabwini

¹² Alimwi Jesu wakaambila Bafalisi wakati, “Ndime mumuni uumunikila bantu bamunyika. Kufumbwa uunditobela takeendi mumudima pe, pele uyooba amumuni uupa buumi.”

¹³ Mukaambo aaka Bafalisi bakamubuzya bakati, “Oobu mbolilungulula omwini, bumboni bwako taakwe ncobwaamba.”

¹⁴ Jesu wakaingula kuti, “Nikuba kuti ndilalilungulula ndemwini, bumboni bwangu mbwabwini, nkaambo mebo ndizi nkondakazwida ankweya. Pele nywebo tamuzi nkondakazwida ankweya. ¹⁵ Nywebo mulabeteka aziyanza zyabuntunsi, pele mebo nsibeteki muntu naba omwe pe. ¹⁶ Nikuba kuti ndabeteka, kubeteka kwangu kuliluleme, nkaambo nsili endike pe, Taata ooyo wakandituma ngotubeteka aawe. ¹⁷ Tee kayi mumilawo yanu kulembedwe kuti bumboni bwabantu bobilo mbwakasimpe. ¹⁸ Iiyi mebo ndalilungulula ndemwini, pele awalo Taata wakandituma ulandilungulula.”

¹⁹ Balo bakamubuzya kuti, “Ino Uso ooyo uli kuli?” Jesu wakabaingula kuti, “Mbubonya mbomutandizi mebo awalo Taata tamukonzyi kumuziba pe. Kuti nimwali ndizi, nimwalimuzi Taata awalo.” ²⁰ Makani aaya Jesu wakaambila muŋanda ya Leza, mubusena bwakutambwida mulumbo. Pele taakwe muntu wakakonzya kumujata, nkaambo ciindi cakwe tiicaanasika.

Jesu mbwaakaamba zyakuunka kwakwe

²¹ Mpoonya aawo Jesu wakabaambila kuti, “Ndainka mebo. Nikuba kuti mukandiyandaule, muyoofwa buyo muzinyonyoono zyanu. Ooko nkweya tamukonzyi kusika pe.” ²² Bafalisi bakatalika kubuzya-buzya kuti, “Sena uyanda kulijaya ncaambila kuti, ‘Ooko nkweya tamukonzyi kusika pe.’” ²³ Pele Jesu wakati kulimbabo, “Nywebo muli baansi aano mebo ndi wakujulu. Nywebo muli banyika eeyi, mebo nsili wanyika eeyi pe. ²⁴ Ncindamwaambila kuti muyoofwa muzinyonyoono zyanu naa tamundisyomi kuti ndendime nguwe.” ²⁵ Bakati, “Ino nduweni?” Jesu wakaingula kuti, “Ndime nguwe ooyo ngondamwaambila kale kumatalikilo. ²⁶ Ndijisi makani manji-manji aakwaamba, alimwi aakumubeteka. Ooyo wakandituma ulasyomeka, nkabela oonse makani ngindakamvwa kulinguwe ngangawo ngelungulula munyika.”

²⁷ Balo tiibakaziba kuti Jesu wakalikwaamba Wisi. ²⁸ Nkaambo kaako wakabaambila kuti, “Mwaakumwaanzika Mwanaa Muntu nomutikazibe kuti ndime nguwe, akuti nsilicitili cintu ndemwini, pele ngamba makani mbuli mbwaakandiiisya Taata. ²⁹ Ooyo wakandituma ulaandime, tandisiyi endike pe, nkaambo lyoonse nncita zintu zimubotezya walo.” ³⁰ Naakali kwaamba makani aaya bantu banji bakamusyoma.

Zyabulubusi naa buzike

³¹ Lino Jesu wakaambila Bajuda aabo bakamusyoma, wakati, “Kuti mwabamba majwi aangu, mulaba basikwiiya bangu ncobeni. ³² Eelyo muyooziba zyakasimpe, nkabela eezi, ziyoomulubula.” ³³ Bamwi bakaingula kuti, “Swebo tuli bana ba Abulahamu, taakwe nitwakali bazike bamuntu mbutwakabeda. Aboobo mbuti mbotwaambila kuti, muyoolubulwa?” ³⁴ Jesu wakati, “Ncobeni muntu woonse uucita cinyonyoono muzike waco. ³⁵ Nkabela muzike tali wamukwasyi ciindi coonse pe, ccita mwana wamuŋanda. ³⁶ Nkaako kuti mwana wamulubula, mwalubulwa ncobeni. ³⁷ Ndilizi kuti muli bana ba Abulahamu, nikuba boobo muyanda kundijaya nkaambo majwi aangu taakkalilili mumyoyo yanu. ³⁸ Ngamba zintu nzindakabona kuli Taata, nywebo mucita zintu nzyomwakamvwa kuli uso.”

³⁹ Balo bakaingula kuti, “Taata ngu Abulahamu.” Eelyo Jesu wakabaambila kuti, “Kuti nimwali bana ba Abulahamu nimwali kucita milimo njaakali kucita walo. ⁴⁰ Pele lino mukanza kundijaya mebo neemwaambila makani aakasimpe ngindakamvwa kuli Leza. Abulahamu taakali kucita zili boobo pe. ⁴¹ Nywebo mucita milimo ya uso.” Bakamwaambila kuti, “Tatuli bana bakazyalilwa mubumambe, tujisi taata omwe buyo, walo uuli ngu Leza.” ⁴² Jesu wakaingula kuti, “Kuti Leza naali Uso nimwali kundiyanda, nkaambo ndakazwa kuli Leza. Nsiindakaliboolela ndemwini pe, Leza nguwakandituma. ⁴³ Ino nkaambo nzi ncomutamvwi nzeamba? Tee nkaambo kakuti tamujisi nguzu zyakumvwa majwi aangu? ⁴⁴ Nywebo muli bana bauso Saatani, aboobo muyandisisya kucita ziyanda nguwe. Walo mujayi kuzwa kumatalikilo. Usulide bwini, nkaambo tajisi bwini mulinguwe. Naamba cakubeja ulilungulula mbwabede mwini, mmubeji, alimwi ngowisi wababeji boonse. ⁴⁵ Pele mebo nemwaambila zyabwini, tamundisyomi pe. ⁴⁶ Nguni akati kanu uukonzya kundijanina kaambo mebo? Pele kuti nkeamba zyabwini, nkaambo nzi ncomutandisyomi? ⁴⁷ Muntu oonse wa Leza ulamvwa majwi aa Leza. Pele nywebo ncomutaamvwi nkuti tamuli bantu ba Leza pe.”

Jesu mbwaakaamba zya Abulahamu

⁴⁸ Eelyo bakati, “Ani twaambide ciluzi nitwati, ‘Uli Musamaliya, unjidwe sikazwa?’” ⁴⁹ Jesu wakaingula kuti, “Nsinjidwe sikazwa pe. Ndemya Taata. Walo nywebo ngomutalemyi. ⁵⁰ Nsilidumaizyi lwangu ndemwini. Mpali uumbi uundidumaizya, ooyu nguuti kamubeteke. ⁵¹ Ncobeni, kuti muntu kabamba majwi aangu, takooyoofwa.” ⁵² Mpawo bantu aabo bakamwaambila kuti, “Lino twaziba kuti ulaasikazwa, nkaambo Abulahamu wakafwa, abalo basinsimi mbubonya buyo, lino yebo waamba kuti, ‘Kuti muntu kabamba majwi aangu takooyoofwa pe.’ ⁵³ Sena yebo uli mupati kwiinda taata Abulahamu wakafwa? Abasinsimi bakafwa? Ino yebo uyeeya kuti nduwe ni?”

⁵⁴ Jesu wakati, “Kuti nkelilemya, bulemu bwangu mbwabuyo. Pele nkwali uundilemya ngu Taata ooyo nywebo ngomuti Leza wanu. ⁵⁵ Ooyo nywebo ngomutana ziba pe, pele mebo ndimuzi. Kuti ndaamba kuti nsimuzi ndaba mubeji mbuli ndinywe. Mebo ndimuzi ncobeni alimwi majwi aakwe ndaabamba. ⁵⁶ Uso, Abulahamu wakatangala kuti uyoobona kuboola kwangu. Wakakubona, aboobo wakakondwa kapati.” ⁵⁷ Balo bakati kulinguwe, “Yebo ootana kuba amyaka iili makumi osanwe, wakamubonena kuli Abulahamu?” ⁵⁸ Jesu wakati kulimbabo, “Ncobeni, Abulahamu katanazyalwa, mebo ndakaliko kale.” ⁵⁹ Mpoonya bakabweza mabwe kuti bamufuse pele Jesu wakabazeluka akuzwa muŋanda ya Leza.