Joni 5

Jesu mbwaakaponya muntu watali kukonzya kweenda

¹ Musule lyakooku, kwakali pobwe limwi lya Bajuda, nkaako Jesu wakainka ku Jelusalemu. ² Lino mu Jelusalemu, kumbali aamulyango wambelele, kwakali ziba lyakali kwiitwa kuti Betesaida Mucihibulu. Kuziba eeli kwakaliyakidwe zitungu zyosanwe. ³ Muzitungu oomo mwakali kulala balwazi banji-banji, mbuli boofu, balema, bantu bapuutide maboko amaulu, [bakali kulindila kuvundaulwa kwamaanzi aamuziba. ⁴ Nkaambo kwakali ziindi zimwi mungelo wa Leza naakali kuboola kunjila muziba akuvundaula maanzi. Nkabela kufumbwa mulwazi wakasaanguna kuliwaala muziba ciindi maanzi naakavundaulwa wakapona kubulwazi bwakwe nibuba buti.] ⁵ Lino mucitungu cimwi kwakali muntu umwi wakali kuciswa kwamyaka iili makumi otatwe amyaka iili lusele. ⁶ Jesu naakamubona wakaziba kuti wakali kuciswa kwaciindi cilamfu. Wakati kulinguwe, “Sena ulayanda kuponyezegwa?” ⁷ Mulwazi wakaingula kuti, “O Mwami, nsijisi uundigwasya kundiwaala muziba ciindi maanzi naacivundaukide. Inga ndatitinjile, ndajana umwi wandiindila kale.” ⁸ Mpoonya Jesu wakati kulinguwe, “Nyamuka, bweza macila aako weende.” ⁹ Mpoonya-mpoonya muntu ooyo wakapona, wakabweza macila aakwe wainka. Oobu bwakali Buzuba bwa kulyookezya butegwa Sabata. ¹⁰ Lino bapati ba Bajuda bakati kumuntu ooyo wakaponyezegwa, “Sunu Mbuzuba bwa Sabata. Toelede kunyamuna macila pe.” ¹¹ Walo wakaingula kuti, “Ooyo wandiponya wandaambila kuti, ‘Bweza macila aako, weende!’” ¹² Bakamubuzya kuti, “Ino nguni muntu ooyo wakwaambila kuti, ‘Bweza macila aako, weende?’” ¹³ Wakaponyezegwa taakazi kuti naa muntu ooyo nguni, nkaambo Jesu wakanjila mubantu, kwakali bantu banji mubusena oobo. ¹⁴ Kucimana buyo kaindi, Jesu wakamujana muntu ooyo muŋanda ya Leza, eelyo wakati kulinguwe, “Mbuli mboopona oobu, ncibotu utabisyi kutegwa kutakakusikili mapenzi aambi mabi aaindilila.” ¹⁵ Mpoonya muntu ooyo wakainka akuyooambila bapati ba Bajuda kuti ngu Jesu wakamuponya. ¹⁶ Nkaambo cakacitika mu Buzuba bwa Sabata, ncibakamupenzya Jesu Bajuda. ¹⁷ Walo wakabaambila kuti, “Taata ulabeleka ciindi coonse, aboobo ambebo ndileelede kubeleka mbubonya mbuli nguwe.” ¹⁸ Mpoonya Bajuda bakasola kujana nzila yakujaya Jesu. Bakati watyola mulawo wa Buzuba bwa Sabata, akulyaamba kuti Leza ngu Wisi. Caamba kuti ulibika muciimo comwe a Leza.

Jesu ngo Mwanaa Leza

¹⁹ Jesu wakati ku bapati ba Bajuda, “Ncobeni ndamwaambila kasimpe, Mwana takonzyi kulicitila cintu mwini alikke pe. Ukonzya buyo kucita milimo njabona kuli Wisi, nkaambo milimo yoonse iicita Wisi awalo Mwana ulacita njiyonya eeyo. ²⁰ Wisi ulayandisisya Mwana, ulamutondezya zintu zyoonse nzyacita walo mwini. Alimwi uciyoomutondezya aimbi milimo mipati kwiindilila, kutegwa mukagambwe. ²¹ Nkaambo mbubonya Wisi mbwabusya bafu akubapa buumi, mbubonya oobo Mwana awalo ulapa buumi kufumbwa kumuntu ngwayanda. ²² Wisi tabeteki muntu pe, wakabikka Mwana kuti abeteke boonse. ²³ Kutegwa bantu boonse balemeke Mwana mbubonya mbuli mbobalemeka Wisi. Muntu woonse uutalemeki Mwana talemeki naba Wisi wakamutuma.

²⁴ “Ncobeni, ooyo uumvwa majwi aangu akusyoma yooyo wakandituma, ulijisi buumi butamani. Aboobo takooyoopegwa mulandu walufu, nkaambo wayokolwa mulufu, wanjizigwa mubuumi. ²⁵ Ndamwaambila kasimpe, ciindi cilasika, kwalo casika kale, bafwide nibayoomvwa majwi aa Mwanaa Leza, nkabela aabo bayoomvwa bayooba aabuumi. ²⁶ Nkaambo mbubonya mbuli Wisi mbwali aabuumi, awalo Mwana wakamucita kuti abe aabuumi. ²⁷ Wakamupa nguzu zyakubeteka, walo mbwali Mwanaa Muntu. ²⁸ Mutagambwi aceeci, nkaambo ciyoosika ciindi boonse bali muzyuumbwe nibayoomvwa majwi aakwe, ²⁹ eelyo bayoovukkuka kuzwa muli nzinzyo. Lino aabo bakacita kabotu bayoobukila buumi butamani, abalo bakacita zibi bayoobukila cisubulo.

Bumboni bulungulula Jesu

³⁰ “Taakwe ncenga ndakonzya kucita munguzu zyangu ndemwini, ndabeteka mbuli Taata mbwaakandaambila, nkaako lubeta lwangu luliluzi. Nsiyandauli kucita luyando lwangu ndemwini, pele eezyo ziyanda yooyo wakandituma.

³¹ “Kuti naa ndatalika kulilungulula lwangu ndemwini, bumboni bwangu tabuli bwakasimpe. ³² Mpali umwi uundilungulula, nkabela ndizi kuti bumboni mbwandilunguluzya mbwakasimpe. ³³ Mwakatuma batumwa kuli Joni, nkabela wakapa bumboni bwakusinizya. ³⁴ Nsyaambi kuti njanda bumboni buzwa kubantu pe, pele makani aaya ndaaamba kutegwa mufutulwe. ³⁵ Joni wakali mbuli lambe liyaka akumweka, eelyo nywebo mwakabotelwa kukkala mumumuni wakwe kwakaindi kaniini. ³⁶ Pele bumboni mbwejisi mbupati kwiinda boobo mbwaakandilunguluzya Joni. Amubone milimo eeyi njecita njiyeeyo njaakandipa Taata kuti ncite. Njenjiyo iindilungulula akupa bumboni bwakuti Taata nguwakandituma. ³⁷ Nkabela Taata wakandituma wakapa bumboni bwakundilungulula. Taakwe nimwakamvwa Ijwi lyakwe niciba ciindi comwe pe, acalo ciimo cakwe tamunacibwene. ³⁸ Aalo majwi aa Taata taakkalilide mulindinywe, kuti kamutasyomi yooyo ngwaakatuma. ³⁹ Mulabalisya Malembe nkaambo muyeeya kuti mulingawo momujisi buumi butamani. Tee kayi ngangawo aandilungulula. ⁴⁰ Mwamana mulakaka kuboola kulindime kutegwa mujane buumi butamani. ⁴¹ Mebo nsitambuli bulemu buzwa kubantu. ⁴² Pele ndilizi kuti nywebo tamumuyandi Leza pe. ⁴³ Mebo ndakasika muzina lya Taata, nikuba boobo tamunditambuli. Pele kuti umwi waboola muzina lyakwe mwini, mulamutambula. ⁴⁴ Mulatambula bulemu buzwa kubeenzinyoko, pele tamutambuli bulemu buzwa kuli Leza. Ani inga mwasyoma buti? ⁴⁵ Mutayeeyi kuti mebo ndime entikamupe mulandu kuli Taata. Mozesi wanu ooyo ngomusyoma nguutikamupe mulandu. ⁴⁶ Kuti nimwakamusyoma Mozesi ambebo nimwandisyoma, nkaambo Mozesi wakandilungulula mumalembe aakwe. ⁴⁷ Pele kuti kamutaazumini malembe aa Mozesi ino inga mwakonzya buti kuzumina majwi aangu?”