Joni 4

Mukaintu Musamaliya

¹ Lino Bafalisi bakamvwa kuti Jesu wakali kusandula akubbapatizya basikwiiya banji kwiinda Joni. ² (Nikuba kuti Jesu lwakwe mwini taakali kubbapatizya, mbaasikwiiya bakwe buyo.) ³ Eelyo Jesu naakaziba kuti Bafalisi bamvwa oobo, wakazwa mucisi ca Judiya akuunka kucisi ca Galilii. ⁴ Mulweendo oolo wakainda mucisi ca Samaliya. ⁵ Wakasika kumunzi umwi uutegwa Sikaa, uuli kumbali aamuunda ooyo Jakobo ngwaakapede mwanaakwe Josefa. ⁶ Kubusena oobo kwakali mukalo wa Jakobo. Lino Jesu mbwaakakatede kweenda, wakakkala ambali aamukalo. Cakali ciindi casikati.

⁷ Mpoonya kwakasika mukaintu umwi Musamaliya uza kukuteka maanzi. Jesu wakati kulinguwe, “Ndipa maanzi nnywe.” ⁸ Ciindi eeco basikwiiya bakainkide mumunzi kuyooula zyakulya. ⁹ Mukaintu wakati, “Ino inga yebo o Mujuda wandikumbila buti maanzi aakunywa nde Musamaliya?” (Nkaambo Bajuda tabalyatani a Basamaliya). ¹⁰ Jesu wakaingula kuti, “Kuti noolizi cipego ca Leza, akuziba yooyo uukukumbila maanzi aakunywa, yebo noomukumbila maanzi aabuumi, nkabela naakupa.” ¹¹ Mukaintu wakati, “Omwami, tee tojisi cakutesya, alimwi mukalo ooyu mulamfu, ino maanzi aayo aabuumi inga waateka buti? ¹² Sena uli mupati kwiinda taata Jakobo wakatupa mukalo ngwaakali kunywa walo mwini, bana bakwe aŋombe zyakwe?” ¹³ Jesu wakati kulinguwe, “Muntu woonse uunywa maanzi aaya ulafwa nyota alimwi. ¹⁴ Pele muntu uunywa maanzi ngemupa mebo, takonzyi kufwa limbi nyota pe. Maanzi aayo aayooba mbuli kasensa kamaanzi aabuumi mulinguwe, katuntumukila kubuumi butamani.” ¹⁵ Mukaintu wakati, “Omwami, ndipa maanzi aayo, kutegwa nkentacifwi limbi nyota, akuti nkentacinoobooli kuno kuteka alimwi.” ¹⁶ Jesu wakati kulinguwe, “Koya ukaite mulumaako, ukaboole anguwe.” ¹⁷ Mukaintu wakaingula kuti, “Nsijisi mulumi.” Mpoonya Jesu wakati, “Uliluzi noti nsijisi mulumi, ¹⁸ nkaambo wakali kwetwe baalumi bosanwe, nkabela ooyo uukukwete sunu tali mulumaako pe. Aboobo waamba kasimpe.” ¹⁹ Mukaintu wakaamba kuti, “Omwami, ndaziba ono kuti uli musinsimi. ²⁰ Bamataata bakali kukombela mudundu eeli, pele no Bajuda mwaamba kuti bantu beelede kukomba ku Jelusalemu.” ²¹ Jesu wakati kulinguwe, “Baama, masimpe ciindi cilasika nimutakoyookomba Taata mudundu eeli nikuba ku Jelusalemu. ²² Nywebo mukomba ncomutazi, pele swebo tukomba ncotuzi nkaambo lufutuko luzwa ku Bajuda. ²³ Pele ciindi cilasika, kwalo casika kale, aawo aabo bakomba cakasimpe bayookomba Taata mumuuya amubwini. Mbambabaabo Taata mbayanda, kuti kabamukomba. ²⁴ Leza Muuya, aboobo aabo bamukomba baleelede kumukomba mumuuya amubwini.” ²⁵ Mukaintu wakaamba kuti, “Ndilizi kuti Munanike wa Leza ulaboola, asika uzootutondezya zintu zyoonse.” ²⁶ Jesu wakati kulinguwe, “Mebo engambaula waano ndendime yooyo ngooamba.”

²⁷ Mpoonya abalo basikwiiya bakwe bakasika. Cakabagambya kujana kuti Jesu ulaambaula amukaintu. Nikuba boobo taakwe naba omwe wakabuzya mukaintu ooyo kuti, “Ino uyanda nzi?” Nikuba kubuzya Jesu kuti, “Ino waambaula nzi ayooyu?” ²⁸ Lino mukaintu ooyo wakasiya nongo yakwe wainka mumunzi kuyooambila bantu kuti, ²⁹ “Kamuboola, mukabone muntu wandaambila zintu zyoonse nzendakacita. Ambweni ngo Munanike wa Leza?” ³⁰ Bantu bakasiya munzi akuunka kuli Jesu.

³¹ Ciindi eeco basikwiiya bakatalika kukombelezya Jesu kuti alye. ³² Walo wakabaambila kuti, “Mebo ndilijisi cakulya ncomutazi.” ³³ Nkaako basikwiiya bakatalika kulyaambauzya muli cabo kuti, “Sena kuli muntu wamuletelede cakulya?” ³⁴ Pele Jesu wakati kulimbabo, “Cakulya cangu nkucita ziyanda yooyo wakandituma, akumanizya mulimo wakwe. ³⁵ Tee mwaamba kuti, ‘Kwasyaala myezi yone buyo kuti tutebule.’ Ndamwaambila kuti amubone myuunda, mulange maila mbwaayuma kale, alindila buyo kutebulwa. ³⁶ Sikutebula ulavola mumulimo wakwe, ulabungika micelo iitola kubuumi butamani kutegwa ooyo wakasyanga ayooyo uutebula batangale antoomwe. ³⁷ Kasimpi aaka kaamba bwini kati, ‘Umwi musyangi, umwi mutebuzi.’ ³⁸ Anywebo ndamutuma kuti mutebule nzimwatakalima. Bakalima mbambi, nywebo mwaabonena buyo mumilimo yabo.”

³⁹ Basamaliya banji bazwa mumunzi bakasyoma muli Jesu akaambo kamajwi aakaamba mukaintu kuti, “Wandaambila zyoonse nzindakacita mubuumi bwangu.” ⁴⁰ Nibakasika kuli Jesu, bakamukumbila kuti akkale ambabo mumunzi. Wakakkala ambabo kwamazuba obilo. ⁴¹ Nkabela banji-banji bakasyoma akaambo kamajwi ngaakabaiisya. ⁴² Bakaambila mukaintu ooyo kuti, “Twasyoma kutali buyo makani aako, pele nkaambo twalimvwida tobeni, aboobo twaziba kuti ncobeni ooyu ngo Mufutuli wanyika.”

Jesu mbwaakaponya mwana wa walupati-pati

⁴³ Naakamana mazuba obilo, Jesu wakazwa mumunzi akuya kucisi ca Galilii. ⁴⁴ Jesu mwini wakaambide kuti, “Taakwe musinsimi uulemekwa kwabo.” ⁴⁵ Naakasika mu Galilii, bantu bacisi eeci bakamutambula kabotu, nkaambo bakaliko ku Pobwe lya Kwiindilila akubona zintu zyoonse nzyaakacita mu Jelusalemu ciindi capobwe.

⁴⁶ Wakasika alimwi kumunzi wa Kana, ooko nkwaakasandula maanzi kuba waini. Kwakali umwi muntu walupati-pati wakali aamwana wakali kuciswa ku Kapenaumu. ⁴⁷ Naakamvwa kuti Jesu wazwa kucisi ca Judiya akuboola ku Galilii, wakaza kulinguwe akumukumbila kuti akamuponyezezye mwana, nkaambo wakali aafwiifwi akufwa. ⁴⁸ Jesu wakamwaambila kuti, “Mwatabona zitondezyo zyanguzu azigambya zimwi tamusyomi.” ⁴⁹ Muntu walupati-pati wakaambila Jesu kuti, “Omwami, koboola natanafwa mwanaangu.” ⁵⁰ Mpoonya Jesu wakati kulinguwe, “Koya buyo, mwanaako wapona.” Eelyo muntu ooyo wakasyoma majwi aakaamba Jesu, wakabweeda kumunzi wakwe. ⁵¹ Naakacili munzila, bazike bakwe bakamucingauzya akumwaambila kuti, “Mwanaako wapona.” ⁵² Wakababuzya naa nciindi nzi mwana naakatalika kulimvwa kabotu. Bakati, “Jilo ciindi casikati naakatalika kulimvwa kabotu.” ⁵³ Mpoonya wisi wakaziba kuti ncicakali ciindi Jesu naakamwaambila kuti “Mwanaako wapona.” Lino walo abaŋanda yakwe boonse bakasyoma. ⁵⁴ Eeci ncecitondezyo cabili Jesu ncaakacita naakazwa mucisi ca Judiya kuya mucisi ca Galilii.