Joni 3

Kuzyalwa kupya

¹ Lino kwakali muntu wankamu ya Bafalisi uutegwa Nikodemasi mweendelezi wa Bajuda. ² Wakaza kuli Jesu masiku, akumwaambila kuti, “Mwiiyi, tulizi kuti yebo nduwe mwiiyi uuzwa kuli Leza, nkaambo taakwe muntu uunga wacita zitondezyo zyanguzu nzocita kuti Leza katali aanguwe.” ³ Jesu wakaingula kuti, “Ncobeni, ndakwaambila kasimpe, kuti muntu tazyalululwi, takonzyi kunjila mubwami bwa Leza pe.” ⁴ Nikodemasi wakaamba kuti, “Ino inga muntu wazyalululwa buti kali wacembaala kale? Sena ulakonzya kunjila mwida lyabanyina alimwi kuti azyalululwe?” ⁵ Jesu wakaingula kuti, “Masimpe, kuti muntu tazyalwi amaanzi, alimwi a Muuya Uusalala, takonzyi kunjila mubwami bwa Leza pe. ⁶ Uuzyalwa amuntu mmuntu, pele uuzyalwa a Muuya Uusalala ngwamuuya. ⁷ Utagambwi nkwindakwaambila kuti, ‘Uleelede kuzyalululwa.’ ⁸ Luuwo lulaungila kufumbwa nkoluyanda, nkabela umvwa buyo kuvuuma, pele tozi nkoluzwida ankoluya. Mbubonya oobo mbocibede akumuntu oonse uuzyalwa a Muuya Uusalala.” ⁹ Nikodemasi wakaamba kuti, “Ino inga cintu eeci cili boobo cilacitika buti?” ¹⁰ Jesu wakaingula kuti, “Tee yebo uli mwiiyi wa Baisilayeli, ani toamvwi buti makani aali boobu? ¹¹ Ncobeni, swebo twaamba nzyotuzi, akulungulula nzyotwakabona, pele nywebo tamwaatambuli majwi eesu pe. ¹² Kuti naa ndamwaambila zintu zyamunyika tamundisyomi, ino inga mulandisyoma buti ndamwaambila zyakujulu? ¹³ Taakwe muntu wakatantide kujulu, ccita yooyo wakazwa nkuko, Mwanaa Muntu. ¹⁴ Mbubonya mbuli Mozesi mbwaakaanzika nzoka yamukuba munkanda, mbubonya awalo Mwanaa Muntu mbweelede kuyooanzikwa, ¹⁵ kutegwa muntu uumusyoma abe abuumi butamani. ¹⁶ Nkaambo mbobuya Leza mbwaakabayandisisya bantu boonse bamunyika, wakatuma Mwanaakwe Simuzyalwa alikke, kuti kufumbwa uumusyoma atafwidilili, pele abe abuumi butamani. ¹⁷ Nkaambo Leza taakwe naakatuma Mwanaakwe kubantu kuti azoobabeteke, pele kuti bantu bakafutulwe anguwe. ¹⁸ Ooyo uumusyoma tapegwi mulandu, pele ooyo uutamusyomi ulipedwe kale mulandu, nkaambo taasyoma Mwanaa Leza, Simuzyalwa alikke. ¹⁹ Lino lubeta ndwakuti mumuni wakasika munyika, pele bantu bakayandisisya mudima kwiinda mumuni nkaambo kakuti milimo yabo mibi. ²⁰ Kufumbwa uucita cibi uluusulide mumuni. Zibi tazicitili antangalala kuyoowa kuti milimo yakwe ilalibonya. ²¹ Pele muntu uucita zyabwini nguuza kumumuni, kuti milimo yakwe iboneke kuti yacitwa mukuteelela Leza.”

Bumboni bwa Joni bwabili

²² Musule aakooku Jesu abasikwiiya bakwe bakaya kucisi ca Judiya. Ooko wakaakukkala ambabo kabbapatizya. ²³ Joni wakali kubbapatizya ku Enoni kumbali aku Salimu nkaambo nkukwakali maanzi manji. Bantu bakali kuboola kuti bazoobbapatizigwe. ²⁴ Ciindi eeci Joni taakanabikkwa muntolongo pe.

²⁵ Lino bakali basikwiiya ba Joni bakali kukazyanya a Mujuda umwi mumakani aazyakusalazya. ²⁶ Nkabela nibakasika kuli Joni bakamwaambila kuti, “Mwiiyi, uulya muntu ngumwakali limwi mutala lyamulonga wa Jolodani, uulya ngookatulungulwida, sunu nguyuulya ulabbapatizya, nkabela bantu banji-banji batijaanina kulinguwe.” ²⁷ Joni wakaingula kuti, “Taakwe muntu ncakonzya kujana mwini naa taapegwa a Leza. ²⁸ Nywebo muli bakamboni bangu, mulizi mbwendakaamba kuti, ‘Nsilindime Munanike. Ndakatumwa buyo kumusololela.’ ²⁹ Ooyo uujisi nabwiinga, ngosibwiinga. Nikuba boobo mweenzinyina sibwiinga, nguyooyo wiima ambali lyakwe akumuswiilila, ulabotelwa kwiindilila nkaambo kamajwi asibwiinga. Aboobo ambebo ndakondwa kapati ono. ³⁰ Walo uleelede kukomena, mebo njelede kuceya. ³¹ Ooyo uuzwa kujulu uli atala lyaboonse, pele uuzwa ansi ngwaansi, alimwi waamba buyo zyaansi. Pele ooyo uuzwa kujulu uli atala lyaboonse. ³² Nguulungulula zintu nzyaakabona akumvwa mwini, nikuba boobo taakwe muntu uubutambula bumboni bwakwe. ³³ Pele uusyoma majwi aakwe ulazibisisya kuti Leza ngwakasimpe. ³⁴ Ooyo wakatumwa a Leza ngonguwe waamba majwi aa Leza, nkaambo Leza wakamupa Muuya Uusalala cakulitakata. ³⁵ Leza Taata ulamuyandisya Mwanaakwe aboobo wakapa zintu zyoonse kulinguwe. ³⁶ Ooyo uusyoma Mwana ulaabuumi butamani, pele ooyo uutamusyomi takabi abuumi pe, cisubulo ca Leza cili aali nguwe.”