Joni 21

Jesu mbwaakalitondezya kuli basikwiiya bakwe bali ciloba kulwizi lwa Tibeliyasi

¹ Musule akooku Jesu wakalitondezya alimwi kuli basikwiiya bakwe kulwizi lwa Tibeliyasi. Mboobu mbwaakalitondezya. ² Saimoni Pita a Tomasi uutegwa wamayanga, a Natanayeli waku Kana wa Galilii, abana ba Zebedii abamwi basikwiiya bobilo, bakali antoomwe. ³ Saimoni Pita wakati kulimbabo “Ndainka kukuzuba.” Abalo bakati, “Tulainka ayebo.” Bakainka baakunjla mubwato. Pele taakwe nswi nzyobakajaya masiku aayo. ⁴ Kubucedo kwini, Jesu wakasika, wazooima ankomwe. Nikuba boobo basikwiiya bakwe tiibakamuziba. ⁵ Jesu wakabaambila kuti, “Mwati mwajaya buya?” Bakati, “Peepe.” ⁶ Jesu wakati kulimbabo, “Amuwaale kanyandi kulubazu lwalulyo lwabwato, mulajaya.” Bakawaala kanyandi kulubazu oolo. Lino tiibakali kukonzya kukakwela pe, akaambo kakuvula kwanswi. ⁷ Mpoonya ooyo sikwiiya ngwaakali kuyandisya Jesu wakati kuli Pita. “Mmwami!” Saimoni Pita naakamvwa kuti Mmwami, wakasama zisani zyakwe nkaambo wakali samunwide akaambo kakubeleka. Naakamana kusama, wakasotokela mumaanzi. ⁸ Bamwi basikwiiya bakasyaala mubwato, kabaya bukwela kanyandi kabo kazwide nswi. Bakali aafwiifwi ankomwe, bulamfu bwantaamo zili mwaanda.

⁹ Nibakazwa mumaanzi akulandukila atala, bakabona mulilo wamakala, answi kaziyokwa aawo, alimwi kwakali acinkwa ambali. ¹⁰ Jesu wakati, “Amweete zimwi nswi nzimwajaya.” ¹¹ Mpoonya Saimoni Pita wakanjila mubwato, wakwela kanyandi kunkomwe kakazwide, nswi mpati zyakali mwaanda amakumi osanwe azitatu. Nikuba boobo, kanyandi taakwe nikakaanduka. ¹² Jesu wakati kulimbabo, “Kamuza mulye.” Pele taakwe sikwiiya wakasola kumubuzya kuti, “Nduwe ni?” Bakalizi kuti ngu Mwami. ¹³ Jesu wakabweza cinkwa wabapa. Wakacita mbubonya answi. ¹⁴ Eeci ciindi ncaakalitondezya Jesu kuli basikwiiya bakwe kabukide kuzwa kubafu ncatatu.

Jesu mbwaakabuzya Pita kuti “Ulandiyanda na?”

¹⁵ Nibakamana kulya Jesu wakaambila Pita kuti, “Saimoni mwanaa Joni, sena ulandiyanda kwiinda baaba?” Walo wakamwiingula kuti “Iiyi, O Mwami, ulizi kuti ndilakuyanda.” Mpoonya Jesu wakati, “Kolisya mbelele zyangu.” ¹⁶ Alwabili wakati kulinguwe, “Saimoni, mwanaa Joni, sena ulandiyanda?” Pita wakati, “Iiyi, Mwami, ulizi kuti ndilakuyanda,” Jesu wakati kulinguwe, “Embela mbelele zyangu.” ¹⁷ Alimwi alwatatu Jesu wakati kulinguwe, “Saimoni, mwanaa Joni, sena ulandiyanda?” Lino Pita wakausa nkaambo wakamubuzya lwatatu kuti, “Sena ulandiyanda?” Mpoonya wakati kulinguwe “O Mwami ulizi zintu zyoonse. Ulizi kuti ndilakuyanda.” Jesu wakati kulinguwe, “Kolisya mbelele zyangu. ¹⁸ Ncobeni ndati kulinduwe, nookacili mwana wakali kulisamika omwini akweenda, kuunka kufumbwa nkookali kuyanda. Pele waakucembaala, unootandabika buyo maboko nkabela muntu umwi uyookwaanga akukutola ankotayandi kuunka koonse.” ¹⁹ Mukwaamba boobu Jesu wakali kutondezya lufu luyoofwa Pita mukulumbaizya Leza. Musule aakooko Jesu wakati kulinguwe, “Nditobela.”

²⁰ Naakaceba musule Pita, wakabona sikwiiya ooyo ngwaakali kuyandisya Jesu ulibaccilide. Ngonguwe ooyo wakayeeme ku Mwami ciindi nibakali kulya mulalilo wamamanino, akubuzya kuti, “Ino nguni ooyo uyookwaaba Mwami?” ²¹ Pita naakamubona sikwiiya ooyo, wakati kuli Jesu, “Ino ooyu kayi, O Mwami?” ²² Jesu wakati kulinguwe, “Ino kuti nkeyanda kuti akkalilile kusikila nkaboole ncinzi eeco kulinduwe? Konditobela buyo!” ²³ Akaambo kaako beenzinyina bakali kwaamba kuti ooyo sikwiiya takooyoofwa pe, pele teensi ncaakali kwaamba Jesu pe. Wakati buyo, “Ino kuti nkeyanda kuti akkalilile kusikila nkaboole, ncinzi eeco kulinduwe?”

²⁴ Sikwiiya ooyu ngonguwe wapa bumboni kuzintu eezi, alimwi ngonguwe wakazilemba, nkabela tulizi kuti bumboni oobu mbwakasimpe.

²⁵ Mpozili azimwi zintu nzyaakacita Jesu. Kuti naa zyoonse nizyakalembwa, ndisyoma kuti nyika niyabula mpoyaabikka mabbuku anoonga alembwa.