Joni 20
Kubuka kwa Jesu kubafu
1 Mubuzuba butaanzi bwamvwiki, ansi kaacisiya-siya, Maliya waku Magadala wakasika kucuumbwe akubona kuti bbwe lyakali kunkulisidwe kuzwa acuumbwe. 2 Aboobo wakatijaana kuya kuli Pita akuli umwi sikwiiya, ngonguwe ooyo ngwaakali kuyandisya Jesu, wakabaambila kuti, “Bamugwisya Mwami mucuumbwe. Tatuzi nkobaakumulazika.” 3 Mpoonya Pita asikwiiyanyina ooyo, bakanyamuka akuunka kucuumbwe. 4 Boonse bobilo bakatijaana, pele sikwiiya umwi ooyo wakazuza kusiya Pita, waakusaanguna kusika kucuumbwe. 5 Naakaakusika, wakasondela mucuumbwe, wakabona buyo masani kaalundene, pele taakwe naakanjila mukati pe. 6 Musule awalo Pita wakasika, waindilila wanjila mukati. Wakabona masani kaalundene, 7 acisani cakavumbide mutwe wa Jesu, calo tiicakali antoomwe amasaninyina pe. Cakali vungidwe cilikke kumbali. 8 Mpoonya awalo sikwiiya umwi ooyo wakasaangunide kusika kucuumbwe, wakanjila mukati, eelyo wakabona akuzumina cakaamba Maliya. 9 Nkaambo ciindi eeci tiibakanasyoma Malembe aamba kuti Jesu uleelede kubuka kuzwa kubafu. 10 Kumane basikwiiya aaba bakabweeda.
Jesu mbwaakalibonya kuli Maliya waku Magadala
11 Pele Maliya wakaliimvwi anze lyacuumbwe ulalila. Naakali kulila, wakasondela mucuumbwe. 12 Wakabona bangelo bobilo kabasamide zisani zituba bu balikkede aawo aakalede mutumba wa Jesu. Umwi wakakkede nkwaakali kumitwe, umwi kumaulu. 13 Bakati kulinguwe, “Mutumbu, ulila nzi?” Walo wakaingula kuti, “Nkaambo bamutola Mwami wangu, nkabela nsizi nkubaakumulazika.” 14 Ucaamba boobu, acebe wakabona Jesu uliimvwi, pele taakwe naakamuziba. 15 Jesu wakati kulinguwe, “Baama, ulila nzi? Nguni ngolangaula?” Lino Maliya wakayeeya kuti ngusikubamba muunda, aboobo wakati kulinguwe. “Akaka taata, naa nduwe wamulonzezya kumbi, konditondezya kutegwa nkamupilusye.” 16 Jesu wakati kulinguwe, “Maliya!” Naakacebuka Maliya wakaamba kuti, “Rabboni!” (Nkokuti mu Cihibulu, “Mwiiyi.”) 17 Jesu wakati kulinguwe, “Utandijati, nkaambo nsinaya kuli Taata. Pele koya kuli basikwiiya bangu ukati, ‘Ndaya kuli Taata, uuli ngo Uso anywebo. Ndaya kuli Leza wangu, Leza wanu anywebo.’” 18 Maliya waku Magadala wakainka akuyooamba kuli basikwiiya kuti, “Ndamubona mebo Mwami. Ngonguwe wandaambila zintu eezi.”
Jesu mbwaakabonwa abasikwiiya bali kkumi aumwi
19 Kumangolezya, buzuba butaanzi bwamvwiki mbubonya oobo basikwiiya bakali antoomwe. Zitendele zyaŋanda mubakabede zyakali pingidwe nkaambo bakali kuyoowa bapati ba Bajuda. Lino Jesu wakasika, waima akati kabo wati kulimbabo, “Amube aaluumuno.” 20 Naakamana kwaamba boobo, wakabatondezya maanza aakwe alubazu lwakwe. Mpoonya basikwiiya bakabotelwa nibakabona Mwami. 21 Alimwi Jesu wakati kulimbabo, “Amube aaluumuno. Mbubonya Taata mbwaakandituma ansi aano, ndamutuma anywebo mbubonya buyo.” 22 Naakamana kwaamba boobu, wakabafulidila muuya, akwaamba kuti, “Amutambule Muuya Uusalala. 23 Kufumbwa muntu ngomulekelela zinyonyoono, ulalekelelwa ncobeni. Alimwi ooyo ngomutakalekeleli, takooyoolekelelwa pe!”
Jesu a Tomasi
24 Pele Tomasi ooyo wakali kutegwa ngwamayanga, taakaliwo ciindi Jesu naakasika kuli basikwiiya bamwi. Basikwiiyanyina bakamwaambila kuti, 25 “Twamubona Mwami.” Walo wakati, “Nsikoozumina pe, ccita mane ndibone zilonda zyazipikili mumaanza aakwe, akudyunga munwe oomo muzilonda, akunjizya janza mulubazu lwakwe.”
26 Nikwakamana mazuba aali lusele, basikwiiya ba Jesu bakali mumonya muŋanda oomo alimwi, awalo Tomasi wakaliwo ciindi eeci. Zitendele zyakali pingidwe, eelyo Jesu wakasika akuzooima akati kabo wati, “Amube aaluumuno.” 27 Amane wakati kuli Tomasi, “Gumika munwe wako aawa, uzibe kuti ndime. Tandabika janza lyako kulubazu lwangu, kutegwa uleke kudonaika, pele usyome!” 28 Tomasi wakamwiingula kuti, “O Mwami wangu, O Leza wangu!” 29 Jesu wakati kulinguwe, “Ono wazumina nkaambo wandibona. Balilelekedwe aabo bazumina kabatanabona.”
30 Nzinji azimwi zitondezyo zyanguzu Jesu nzyaakacita kababona aabasikwiiya bakwe zitalembedwe mubbuku eeli. 31 Pele eezi zyakalembwa kutegwa musyome kuti Jesu ngo Munanike, uulya Mwanaa Leza, akuti mwamusyoma mube abuumi butamani.