Joni 19

¹ Mpoonya Pilato wakalailila kuti Jesu akwabbaulwe. ² Abalo basilumamba bakaluka musini wamamvwa, akumusamika kumutwe, alimwi bakamusamika jansi lyabwami. ³ Bakaza kulinguwe akuti, “Wabonwa, O Mwami wa Bajuda!” Bakamuuma mbayi. ⁴ Pilato wakazwida anze alimwi akuyooti ku Bajuda, “Ndamuleta anze kuti muzibe kuti tajisi mulandu muntu ooyu!” ⁵ Aboobo Jesu bakamutola anze kasamine musini wamamvwa ajansi eelyo. Pilato wakati kulimbabo, “Ngooyu!”

⁶ Bapaizi basilutwe abasilumamba nibakabona Jesu bakapozomoka akuti, “Akankaminwe aciingano! Akankaminwe aciingano!” Pilato wakati, “Amumutole nobeni mukamukankamine, nkaambo mebo taakwe mulandu ngundamujanina.” ⁷ Bantu bakamwaambila kuti, “Tulijisi mulawo, nkabela kweendelana amulawo wesu muntu ooyu uleelede kufwa, nkaambo ulyaamba kuti Mwanaa Leza.”

⁸ Pilato naakamvwa majwi aaya, wakayoowa kapati. ⁹ Aboobo wakanjila alimwi mubbetekelo akubuzya Jesu kuti, “Ino uzwa kuli?” Pele Jesu taakwe naakamwiingula. ¹⁰ Eelyo Pilato wakaambila Jesu kuti, “Sena toyandi kwaamba kulindime? Tozi kuti ndijisi nguzu zyakukwaangununa naa zyakukukankamizya?” ¹¹ Jesu wakamwiingula kuti, “Kuti nootakapegwa nguzu kuzwa kwa Taata notajisi nguzu zyakubeteka pe. Nikuba boobo ooyo wakandipa mumaanza aako nguujisi cinyonyoono cipati.”

¹² Amvwe boobo Pilato wakatimwaangunune, pele Bajuda bakapozomoka akwaamba kuti, “Kuti naa umwaangunune muntu ooyu, nkokuti toli mweenzinyina a Muleli Mupati waku Loma. Kufumbwa muntu uulipa kami-kami nguusinkondonyina a Muleli Mupati waku Loma.” ¹³ Pilato naakamvwa majwi aaya wakeeta Jesu anze akukkala acuuno cacibetekelo abusena butegwa, “Ibbuwa lyamabwe” (mu Cihibulu bati, “Gabbata.”) ¹⁴ Bwakali buzuba bwakulibambila zya Pobwe lya Kwiindilila, aciindi casikati. Pilato wakaambila Bajuda kuti, “Ngooyu Mwami wanu!” ¹⁵ Balo bakoongolola bati, “Mugwisye, mugwisye! Akankaminwe aciingano!” Pilato wakati kulimbabo, “Sena inga ndakankamina Mwami wanu?” Bapaizi basilutwe bakati, “Tatujisi uumbi Mwami kunze lya Muleli Mupati waku Loma.” ¹⁶ Mpoonya aawo wakamupa mumaanza aabo kuti bakamukankamine lwabo beni.

Jesu mbwaakakankaminwa aciingano

¹⁷ Aboobo basilumamba bakatola Jesu. Wakazwa mumunzi kayumwide aciingano cakwe kuya kubusena butegwa, “Kapapa kamutwe.” (Mu Cihibulu bati, “Gologota.”) ¹⁸ Mpampawo aawa mpobakamukankamina antoomwe abamwi baalumi bobilo, umwi kulubazu lwalulyo umwi kulumwensi, Jesu, akati. ¹⁹ Pilato wakalemba cizibyo akucibikka aciingano ca Jesu. Cizibyo eeci cakalembedwe kuti, “Jesu waku Nazaleta, Mwami wa Bajuda.” ²⁰ Bajuda banji bakacibala cizibyo eeco nkaambo oobo busena nkwaakakankaminwa bwakali kumbali aamunzi. Cizibyo eeco cakalembedwe mumisyobo yotatwe, mu Cihibulu, mu Cilatini, amu Cigiliki. ²¹ Mpoonya bapaizi basilutwe bakaambila Pilato kuti, “Utalembi kuti, ‘Mwami wa Bajuda,’ kolemba kuti, ‘Ooyu muntu wakali kulyaamba kuti Mmwami wa Bajuda.’” ²² Pilato wakabaingula kuti, “Eeco ncindalemba ndalemba.”

²³ Basilumamba nibakamana kukankamina Jesu aciingano, bakatola zisani zyakwe akuzizapula muzibeela zyone kutegwa aumwi wabo atole cibeela comwe. Bamane bakabweza acimwi cisani cakwe. Cisani eeco cakalilukidwe, cakali swaangene kuzwida ajulu mane do ansi. ²⁴ Aboobo bakaambilana kuti, “Tutacizapuli, atuume cisolo kutegwa tubone uuticitole.” Bakacita oobu kweendelana a Malembe aati,

“Bakaabana zisani zyangu,

nkabela cimwi bakacuumina cisolo.”

Nkaako basilumamba bakauma cisolo.

²⁵ Lino ciindi eeco munsi aaciingano ca Jesu kwakaliimvwi banyina Jesu amwanookwabo banyina Jesu Maliya muka Kilopasi alimwi a Maliya waku Magadala. ²⁶ Jesu naakabona banyina, akubona sikwiiya ooyo ngwaakali kuyandisisya kabaimvwi, wakati kuli banyina, “Mukaintu, kobona mwanaako!” ²⁷ Mpoonya wakati kuli sikwiiya ooyo, “Kobona banyoko!” Lino kuzwida ciindi eeco sikwiiya ooyo wakatola banyina Jesu kuŋanda yakwe.

Jesu mbwaakafwa

²⁸ Musule akooku Jesu mbwaakaziba kuti zintu zyoonse zyamaninina wakati, “Ndafwa nyota.” (Wakaamba boobo mukweendelana azyakalembwa mu Malembe.) ²⁹ Aawo kwakali nongo yakazwide waini wandulwe. Mpoonya bakanyika nsinsa mundulwe akwiibikka kukasamu akumusyonka kumulomo. ³⁰ Jesu naakasipa nsinsa wakati, “Kwamana.” Mpoonya wakakotamika mutwe wafwa.

Jesu mbwaakayaswa

³¹ Mbubwakali buzuba bwakulibambila Buzuba bwa Kulyookezya butegwa Sabata, bapati ba Bajuda bakakumbila Pilato kuti bantu bakankamidwe batyoloolwe maulu akwaangulwa aziingano kabutanasika buzuba bwa Sabata. Bakacita boobo nkaambo buzuba oobu bwakali bupati kulimbabo. ³² Aboobo basilumamba bakasika akutalika kutyola maulu aamwaalumi mutaanzi wabaabo bakabambwidwe alimwi akuli wabili. ³³ Pele nibakasika kuli Jesu, bakajana kuti wafwa kale, nkaako taakwe nibakamutyola maulu pe. ³⁴ Pele umwi silumamba wakamuyasa sumo kulubazu, mpoonya kwakazwa bulowa amaanzi. ³⁵ Lino muntu wakabona zintu eezi nguwapa bumboni, nkabela bumboni bwakwe mbwakasimpe. Ulizi kuti waamba zyabwini kutegwa anywebo musyome. ³⁶ Zintu eezi zyakacitika kweendelana a Malembe aati, “Taakwe akomwe kafuwa kayootyoka pe.” ³⁷ Alimwi aamwi Malembe alati, “Bayoomulanga ooyo ngubakayasa.”

Jesu mbwaakazikkwa

³⁸ Musule akooku Josefa waku Alimatiya wakali umwi wabaccili ba Jesu, cakulisisa-sisa mukuyoowa bapati ba Bajuda, wakaakukumbila mutumba wa Jesu kuti awaangule aciingano. Pilato wakamuzumizya. ³⁹ Awalo Nikodemasi uulya wakasikide kuli Jesu masiku, wakasika weetelezya atununkilizyo twiindene-indene mane cibbudu buya. ⁴⁰ Bakatola mutumba wa Jesu akuuputaila mumasani antoomwe atununkilizyo, mbubonya mbuli cilengwa ca Bajuda. ⁴¹ Lino kwakali muunda kubusena ooko kwakakankamidwe Jesu. Mumuunda oomo kwakali cuumbwe cipya mwakatana zikkidwe muntu pe. ⁴² Nkaambo kakuti cuumbwe eeco cakali aafwiifwi, akuti, bwakali buzuba bwakulibambila Buzuba bwa Kulyookezya butegwa Sabata bakatola mutumba wa Jesu akuuzikka oomo.