Joni 17

Kukomba kwa Jesu masiku ngaakaabwa

¹ Naakamana kwaamba majwi aaya Jesu wakalungumana kujulu akuti, “Taata, ciindi casika lino, aboobo kolemya Mwanaako kutegwa awalo akulemye. ² Mbuli mbomupede bulelo bwabantu boonse bwakupa buumi butamani kuli baabo boonse mbookamupa. ³ Buumi butamani, nkuti bakuzibe yebo O Leza olikke buyo, a Jesu Kilisito ngookatuma. ⁴ Ndakakulemya ansi aano nindakalondola mulimo ooyo ngookandipa kuti ngucite. ⁵ Aboobo kondilemya ono Taata mbwindaboola kulinduwe, kondilemya abulemu oobo mbundakajisi nindakali ayebo nyika kiitanalengwa.

⁶ “Aabo mbookazandula kuzwa mubantu boonse akubapa kulindime, ndabaiisya kuti bakuzibe. Bakali bako, pele wakabapa ndime, eelyo bakaziba njiisyo zyako. ⁷ Lino balizi kuti zyoonse nzyondipede zizwa kulinduwe, ⁸ nkaambo ndabaiisya majwi aayo ngookandilailila. Bakaatambula, lino balizi cakasimpe kuti ndakazwa kulinduwe alimwi balasyoma kuti nduwe wakandituma. ⁹ Aaba mbambabo mbenkombela. Nsikombeli bamunyika pe. Nkombela aabo mbookandipa, nkaambo mbabako. ¹⁰ Boonse bangu mbabako, abako mbabangu, nkabela ndilalemezegwa mulimbabo. ¹¹ Lino ndilaza kulinduwe, nsikkalilili ansi aano, pele balo bacili ansi aano. Taata oosalala, kobakwabilila azina lyako aabo mbookandipa, kuti babe omwe, mbubonya aswebo mbotuli omwe. ¹² Mebo nindali ambabo, ndali kubalela muzina lyako aabo mbookandipa. Ndali kubakwabilila, aboobo taakwe naba omwe wabo wakasweeka, ccita buyo ooyo wakeelede kunyonyooka mbubwaamba Malembe. ¹³ Pele ono ndaza kulinduwe, nikuba boobo zintu eezi ndazikanana nkencili ansi kutegwa bakondwe kapati mbuli mbwekondedwe. ¹⁴ Ndabaiisya majwi aako nkabela bamunyika balibasulaikide nkaambo tabali bamwi babo, mbubonya ambebo mbwentali wabo pe. ¹⁵ Nsibakombeli kuti ubagwisye munyika, pele kuti ubakwabilile kuzwa kumubi. ¹⁶ Tabali banyika eeyi mbubonya ambebo mbwentali wanjiyo. ¹⁷ Basalazye amajwi aako, nkaambo majwi aako ngamasimpe. ¹⁸ Mbubonya mbookandituma muluundu, ambebo ndabatuma muluundu. ¹⁹ Nkaambo kabo ndalipa kulinduwe, kuti mbubonya abalo balipe kulinduwe mukasimpe.

²⁰ “Tandikombeli bali waano balikke aaba pe, ndakombela abaabo basyoma mulindime kwiindila mumajwi aabaaba. ²¹ Ndibakombela kuti boonse babe omwe, mbubonya yebo Taata mboli mulindime, ambebo ndili mulinduwe, abalo mbubonya babe mulindiswe kutegwa luundu loonse luzumine kuti nduwe wakandituma. ²² Mbubonya mbookandilemeka ambebo ndabalemeka kutegwa babe omwe mbubonya aswe mbotuli omwe. ²³ Mebo mulimbabo, ayebo mulindime, kuti abalo bakamantane ncobeni, kutegwa luundu luzibe kuti nduwe wakandituma alimwi akuti wakabayanda mbubonya mbookandiyanda ambebo. ²⁴ Taata, ndilayandisya kapati kuti aabo mbookandipa bakabe andime ooko nkweenjooba. Kuti bakabubone bulemu bwangu oobo mbookandipa mukundiyanda kwako ciindi nyika kiitanalengwa. ²⁵ Taata ooluleme, bamunyika tabakuzi pe, pele mebo ndilikuzi, abalo aaba balizi kuti nduwe wakandituma. ²⁶ Ndabaiisya kuti bakuzibe alimwi nsitileke pe, kutegwa luyando oolu ndookandiyanda lube mulimbabo, ambebo ndibe mulimbabo.”