Joni 16
Bakilisito bayoopenzegwa
1 “Ndamwaambila makani aaya kutegwa mutalebwi. 2 Bayoomutanda muzikombelo. Ncobeni ciindi ciyoosika cakuti bantu bayoomujaya, bayooyeeya kuti bacitila Leza milimo mibotu. 3 Bayoocita boobo nkaambo tabamuzi Taata, ambebo tabandizi. 4 Pele ndamwaambila makani aazintu eezi kutegwa ciindi niziyoocitika mukayeeye kuti ndakamwaambilide kale.
Zya milimo ya Muuya Uusalala
“Taakwe nindakamwaambila zintu eezi mpoonya-mpoonya kumatalikilo nkaambo ndacili aandinywe. 5 Pele ono ndainka kuli yooyo wakandituma, nikuba boobo tamundibuzyi kuti ‘Uya kuli?’ 6 Lino akaambo kakuti ndamwaambila makani aaya, myoyo yanu yausa. 7 Ndiyanda kumwaambila masimpe kuti, ncibotu kulindinywe kuti ngunke. Nkaambo kuti nsiciti boobo Mugwasyi takoosika kulindinywe pe. Pele naa ndainka ndiyoomutuma kulindinywe. 8 Lino asika uzoobazula bamunyika kuti balilubizizye mumulandu wacinyonyoono, awabululami awalubeta. 9 Mulandu wacinyonyoono nkaambo tabandisyomi mebo. 10 Mulandu wabululami nkaambo ndibweeda kuli Taata, nkabela tabacindiboni limbi pe. 11 Mulandu walubeta nkaambo muleli wanyika eeyi wabetekwa.
12 “Ndicijisi makani manji aakumwaambila, pele tamukonzyi kwaamvwisya ono. 13 Lino azoosika Muuya wiisya zyabwini, uzoomusololela mumakani aabwini oonse. Nkaambo tazooambi zyakwe mwini pe, pele uzoolungulula eezyo zyoonse nzyaakamvwa kuli Taata, nkabela uzoomwaambila zintu ziciboola. 14 Uzoondilemya nkaambo uzootola nzyeamba akumulungulwida. 15 Zyoonse zya Taata nzizyangu ambebo, aaka nkakaambo ncindamwaambila kuti uzootola nzyeamba akumulungulwida.
Mause ayooba lutangalo
16 “Kwakaindi kaniini tamucinoondiboni pe, pele kamana kaindi kaniini muyoondibona.” 17 Lino bamwi babasikwiiya bakwe bakatalika kubuzyanya-buzyanya mulicabo kuti, “Ino makani nzi aaya ngaamba kuti, ‘Kwakaindi kaniini tamucinoondiboni, pele alimwi kwaakuba kaindi kaniini muyoondibona,’ akuti, ‘Nkaambo ndiya kuli Taata?’” 18 Bakati, “Ino waamba nzi nati, ‘Kaindi kaniini?’ Tatuzi ncaamba.” 19 Jesu wakalizi kuti bakali kuyanda kumubuzya, aboobo wakati kulimbabo, “Sena mulabuzyanya-buzyanya mulicanu ncocaamba eeci ncendati, ‘Kwaba kaindi kaniini tamucinoondiboni, alimwi akuti kwaakuba kaindi kaniini muyoondibona?’ 20 Ncobeni, nywebo muyoolila akuusa kapati, pele bamunyika bayoosekelela. Muyoousa cakuba aabuumba, pele kuusa kwanu kuyooba lutangalo. 21 Ciindi mukaintu namyongwa ulapenga kapati mumoyo akuusa nkaambo ciindi camapenzi camusikila. Pele azyala ulaluba kupenga akucisa nkwaamvwide, akaambo kamwana watumbukwa. 22 Mbubonya oobo nikuba kuti ono muluuside, pele ndazooboola kulindinywe alimwi, myoyo yanu izootangala, nkabela taakwe uuyoogwisya lutangalo lwanu pe. 23 Mubuzuba oobo taakwe ncemuyoondikumbila. Ncobeni, kufumbwa ncemuyookumbila kuli Taata muzina lyangu uyoomupa. 24 Kusikila ono tamunakumbila cintu muzina lyangu. Amukumbile, mulatambula kutegwa mutangale kapati.
Jesu mbwaakazunda bubi bwaansi ano
25 “Ndamwaambila zintu eezi mumasendelela. Ciindi ciyoosika aawo nintaciyoomwaambili limbi mumasendelela, pele ndiyoomulungulwida antangalala zyoonse zya Taata. 26 Mubuzuba oobo muyookumbila muzina lyangu, nkabela nsyaambi kuti ndiyoomukumbilila kwa Taata pe, 27 nkaambo lwakwe Taata ulamuyandisya. Ulamayanda akaambo kakuti mwakandiyanda mebo akuzumina kuti ndakazwa kulinguwe. 28 Ndakazwa kuli Taata akuboola ansi aano, alimwi lino ndabweeda kuli Taata.”
29 Basikwiiya bakwe bakati, “Iiyi, ncobeni ono waamba caantangala, kutali mumasendelela! 30 Lino twaziba kuti ulizi zintu zyoonse, aboobo taakwe uutikubuzye cintu, akaambo kaceeci twasyoma kuti wakazwida kuli Leza.”
31 Jesu wakabaingula kuti, “Sena mwasyoma ono? 32 Ciindi cilasika, mane casika kale, cakuti mumwaikizyanye mwenu-mwenu, nkabela muyoondisiya mebo endikke buyo. Nikuba boobo nsinooli endikke, nkaambo Taata uli aandime ciindi coonse. 33 Ndamwaambila makani aaya kutegwa mube aluumuno mukusyoma ndime. Ansi aano nywebo muli mumapenzi mapati. Nikuba boobo amubotelwe, ndabuzunda bubi bwaansi aano.”