Joni 15

Makani aacisiko amitabi yaco

¹ “Ndime musaansa nkabela Taata ngomukamwini muunda. ² Lino kufumbwa mutabi uutazyali micelo uluukwezula, pele mutabi uuzyala micelo uluukokweda kutegwa usalale uzyalisye micelo kwiindilila. ³ Nywebo mulisalazidwe kale amajwi ngindakamwaambila. ⁴ Amukkalilile mulindime, ambebo mulindinywe. Mbubonya mbuunga mutabi tuukonzyi kuzyala micelo wanooli ulikke, kuutajisilizi kucinyina, anywebo mbubonya, tamukonzyi kuzyala micelo ccita kamukkalilide mulindime. ⁵ Ndime musaansa, nywebo ndinywe mitabi. Ooyo uukkalilila mulindime ambebo mulinguwe, nguutikonzye kuzyala micelo minji-minji, nkaambo kuti kamwaandeene andime tamukwe ncimukonzya kucita pe. ⁶ Kuti naa muntu katakkalilili mulindime ulasoogwa mbubonya mbuli mutabi wagonkwa, eelyo ulayuma. Mitabi iili boobo bantu baliibungika akwiitenta mumulilo. ⁷ Aboobo kuti naa mwakkalilila mulindime, aalo majwi aangu akkalilila mulindinywe, mulakonzya kukumbila kufumbwa ncomuyanda, eelyo mulapegwa. ⁸ Kuti kamuzyalisya micelo, eeco inga cacita kuti Taata alemezegwe, nkabela anywebo nomuyoolizibya ncobeni kuti muli basikwiiya bangu.

⁹ “Mbuli mbwandiyandisya Taata, ambebo ndamuyandisya nywebo mbubonya buyo. Aboobo amuyandane mbuli mbwemuyanda. ¹⁰ Kuti mwalondola milawo yangu, muyooyandana mbuli mbwemuyanda, mbubonya ambebo mbwebamba milawo ya Taata akuyanda mbuli mbwandiyanda. ¹¹ Ndamwaambila zintu eezi kuti mutangale mbubonya mbuli mbwetangede, akwalo kutangala kwanu kwiindilile. ¹² Mulawo wangu ngooyu, ngwakuti muyandane mbubonya mbuli mbwemuyanda mebo. ¹³ Taakwe muntu uujisi luyando lupati lwiinda loolu lwakuti atuule buumi bwakwe akaambo kabeenzinyina. ¹⁴ Kuti naa kamucita nzendamwaambila akumulailila mulibeenzuma. ¹⁵ Nsicimwaambi limbi kuti muli batwanga pe, nkaambo mutwanga tazi zicita simalelo wakwe, pele ndimwiita kuti muli beenzuma nkaambo oonse makani ngindakamvwa kuli Taata ndakamuzibya. ¹⁶ Tamuli ndinywe mwakandisala, ndime ndakamusala. Ndakamusalila kuti muzyale micelo, eyi kamwiizyala lyoonse, eelyo Taata uyoomupa kufumbwa ncomuyoomukumbila muzina lyangu. ¹⁷ Nkaako ndamupa mulawo ooyu wakuti muyandane.

Bamunyika mbobayoosulaika Bakilisito

¹⁸ “Kuti naa bamunyika bakamusulaike, mukazibe kuti bakasaanguna kusulaika ndime kabatana kucita oobo kuli ndinywe. ¹⁹ Kuti nimwali mbuli bamunyika, nibali kumuyanda nkaambo nimwali bamwi babo. Lino akaambo kakuti tamuli banjiyo, nikuba kuti ndakamusala kuzwa kuli bamunyika, ncencico eeco ncobamusulaikila. ²⁰ Amuyeeye majwi ngindamwaambila aakuti ‘Mutwanga tali mupati kwiinda simalelo wakwe!’ Kuti naa bakandipenzya mebo, bayoomupenzya anywebo. Kuti naa bakaatambula majwi aangu bayooatambula aalo majwi aanu. ²¹ Pele ono bayoomupenzya boobu akaambo kangu nkaambo tabamuzi ooyo wakandituma. ²² Nindatakaboola akuzoobaiisya, nibatajisi mulandu wacinyonyoono, pele ono tabajisi cilitamizyo kuzinyonyoono zyabo pe. ²³ Ooyo uundisulaikide mebo ulimusulaikide a Taata. ²⁴ Nindatakacita milimo iitanacitidwe kale amuntu naba omwe, nibatajisi mulandu wacinyonyoono. Nikuba kuti bakaibona milimo yangu, pele bakandisulaika mebo a Taata. ²⁵ Eezi zyacitika mbubonya mbuli bulembedwe mu Milawo yabo kuti, ‘Bakandisulaika aatakwe kaambo!’ ²⁶ Pele Mugwasyi ooyo asika, walo ngwenjoomutumina kuzwa kuli Taata, ngonguwe Muuya wiisya zyabwini uuzwida kwa Taata. Nguuzoopa bumboni bundilungulula. ²⁷ Anywebo muli bakamboni bangu nkaambo mwakali aandime kuzwa kumatalikilo.