Joni 14
Jesu mbwaakabakazika myoyo basikwiiya bakwe
1 “Myoyo yanu itapengi. Amusyome muli Leza, alimwi musyome amulindime. 2 Muŋanda ya Taata muli makkalilo manji, nikwatali boobo nindatamwaambila. Ndainka kuti nkamubambile masena. 3 Ndaakumana kumubambila masena, ndiyooboola alimwi kuti ndizoomutole ooko nkwebede, kutegwa ooko nkwebede, anywebo mukabe nkuko. 4 Nkabela nzila iiya ooko nkondiya muliizi kale.” 5 Tomasi wakati kulinguwe, “O Mwami, tee tatuzi ankoya, ino inga nzila twiiziba buti?” 6 Mpoonya Jesu wakati kulinguwe, “Mebo ndime nzila, ndime bwini, alimwi ndime buumi. Taakwe muntu uukonzya kuya kuli Taata ccita kwiindila mulindime. 7 Kuti nimwali ndizi kabotu mebo, awalo Taata nimwalimuzi. Pele kuzwa ono mulimuzi alimwi mulimubwene.” 8 Filipo wakaamba kuti, “O Mwami, tutondezye Uso kutegwa tulamwe.” 9 Jesu wakati kulinguwe, “Calampa ciindi ncindakkala ayebo Filipo, nkokuti asunu tonandiziba? Ooyo wandibona, wamubona a Taata. Ino inga ulaamba buti kuti, ‘Tutondezye Uso?’ 10 Sena tozi kuti mebo ndili muli Taata awalo Taata uli mulindime? Majwi ngeamba kulindinywe taazwi munguzu zyangu ndemwini pe, pele Taata ooyo uukkede mulindime nguubeleka milimo yakwe kwiindila mulindime. 11 Amusyome kuti ndili muli Taata awalo uli mulindime. Naa takuli boobo, amusyome akaambo kamilimo njecita.
12 “Ncobeni, ooyo uundisyoma uyookonzya kucita milimo iili mbuli yeeyi njecita mebo. Nkabela milimo mipati kwiinda eeyi uyookonzya kwiicita, nkaambo ndiya kuli Taata. 13 Kufumbwa ncomuyookumbila muzina lyangu ndiyoomucitila kutegwa Taata akalemekezegwe mu Mwanaakwe. 14 Coonse ncomutikumbile muzina lyangu, ndiyoomucitila.
Jesu mbwakasyomezya Muuya Uusalala
15 “Naa kamundiyanda, mubambe milawo yangu. 16 Ndiyookomba kuli Taata kutegwa akamupe uumbi Mugwasyi uutikakkale andinywe lyoonse. 17 Ooyo ngo Muuya wiisya zyabwini. Bamunyika ngobatakonzyi kutambula nkaambo tabamuboni nikuba kumuziba pe. Nywebo mulimuzi nkaambo ukkede anywebo, alimwi uyookkala mulindinywe.
18 “Tandikooyoomusiya mubuumba mbuli bamucaala, pele ndiyooboola alimwi kuli ndinywe. 19 Kwakaindi kaniini bamunyika tabanoondiboni, pele nywebo munoondibona nkaambo ndilapona aboobo anywebo muyoopona. 20 Mubuzuba oobo muyooziba kuti ndili muli Taata, anywebo muli mulindime, mbubonya mbuli mbweli mulindinywe. 21 Ooyo uutambula milawo yangu akwiitobela nguundiyandisya. Nkabela ooyo uundiyandisya awalo uyooyandwa kuli Taata, ambebo ndiyoomuyandisya akulitondezya lwangu kulinguwe.”
22 Lino Judasi (uutali Isikaliyoti uulya pe) wakati kuli Jesu, “O Mwami, ino mbuti mboyoolitondezya buyo kulindiswe, kutali kuli bamunyika abalo?” 23 Jesu wakamwiingula kuti, “Kuti naa muntu ulandiyandisya, unootobela majwi aangu, nkabela Taata uyoomuyandisya, eelyo tuyooboola akuzookkalilila mulinguwe. 24 Ooyo uutandiyandi taatobeli majwi aangu. Majwi aaya ngomumvwa kulindime taali majwi aangu pe, ngaa Taata ooyo wakandituma.
25 “Zintu eezi ndamwaambilila limwi ono nkencili aandinywe. 26 Pele asika Mugwasyi, Muuya Uusalala, ooyo ngwatikatume Taata muzina lyangu, uyoomwiisya zintu zyoonse, akuzoomwiibalusya zintu zyoonse nzendakamwaambilide.
27 “Ndamusiila luumuno. Ndamupa luumuno lwangu. Taluli mbuli luumuno oolo bamunyika ndobapa pe. Aboobo myoyo yanu itapengi nikuba kuyoowa. 28 Mwandimvwa nindaamba kuti, ‘Ndainka, ndiyooboola alimwi kulindinywe.’ Kuti nimwali kundiyandisya nicamubotela kumvwa boobo, nkaambo ndiya kuli Taata, ooyo mupati kwiinda ndime. 29 Ndamwaambila ono zintu kazitanacitika, kutegwa zyaakucitika mukasyome. 30 Nsikooyoomwaambila limbi makani manji pe, nkaambo muleli waansi aano ulaboola. Tajisi nguzu zyakundizunda. 31 Pele ncita buyo mbuli mbwaakandilailila Taata, kutegwa bamunyika bazibe kuti Taata ndilamuyandisya.
“Amunyamuke ono tuzwe abusena buno.