Joni 12

Jesu mbwaakananikwa mafuta

¹ Nikwakasyaala mazuba aali cisambomwe kuti Pobwe lya Kwiindilila lisike, Jesu wakasika kumunzi waku Betani oomo mwakali kukkala Lazalo ooyo ngwaakabusya kuzwa kubafu. ² Mumunzi oomu bakamujikila cakulya, nkabela Maata nguwakali kubapa zyakulya. Lazalo wakali umwi wabaabo bakali kulya. ³ Mpawo Maliya mucizi wa Lazalo wakabweza kasazi kamafuta aatalidulili, alimwi aakabambwa ansende iini-ini iinunkilila kabotu, wakananika zituta zya Jesu akuzisyoba amasusu aakwe. Eelyo ŋanda eeyo mubakabede yakazula kununkilila kubotu kwamafuta aayo. ⁴ Mpoonya Judasi Isikaliyoti umwi wabasikwiiya ba Jesu (ooyo nguwenya wakali sikuyooomwaaba) wakaamba kuti, ⁵ “Nkaambo nzi mafuta aaya naatauzigwa mali aali myaanda yotatwe, nkabela mali aaya kaapegwa kubacete?” ⁶ Ncaakaamba boobu takali kaambo kamoyo wakugwasya bacete pe, pele nkaambo wakali mubbi, lino mbwaakali nguwakali kubamba ciyobwedo camali wakali kunga ulatola mali amwi akwaabba. ⁷ Jesu wakati kulinguwe, “Komuleka mukaintu ooyo. Aaya mafuta waabambilila kuzikkwa kwangu. ⁸ Bacete mulaabo lyoonse, pele mebo tamuli ambebo lyoonse pe.”

⁹ Lino bantu banji nibakaziba kuti Jesu nkwabede ooko, bakainka, kwalo tiibakainkilide kuyoobona Jesu buyo pe, pele akuyoobona Lazalo ooyo Jesu ngwaakabusya kuzwa kubafu. ¹⁰ Aboobo bapaizi basilutwe bakatalika kukanza kujaya Lazalo awalo, ¹¹ nkaambo kakuti bantu banji nibakali kubona Lazalo, bakatalika kukaka njiisyo zyabo akusyoma Jesu.

Jesu mbwaakanjila mbuli Mwami mu Jelusalemu

¹² Nibwakaca nkamu mpati yabantu bakazide ku Pobwe lya Kwiindilila yakamvwa kuti Jesu ulaboola ku Jelusalemu. ¹³ Bakatema malala akuunka kuyoomucinga. Bakali kuya bwiimba cakupozomoka kabati,

“Aalumbaizigwe Leza!

Ulilelekedwe ooyo uuboola muzina lya Mwami Leza,

nguwe Mwami wa Isilayeli!”

¹⁴ Lino Jesu wakalijanide mwanaa mbongolo akutanta, mbubonya mbuli mbokulembedwe kuti,

¹⁵ “Utayoowi omunzi wa Ziyoni,

kolanga Mwami wako ngooyo ulaboola,

katantide amwanaa mbongolo!”

¹⁶ Kusaanguna basikwiiya bakwe taakwe nibakaamvwisya makani aaya, kusikila Jesu naakabusigwa mubulemu. Ndendilyo nibakaibaluka kuti anu makani aaya akalembedwe akali kwaamba zyanguwe, alimwi zintu eezyo zyakali kucitilwa nguwe.

¹⁷ Bantu banji bakali aanguwe ciindi naakaita Lazalo mucuumbwe bakaba bakamboni bazintu eezyo. ¹⁸ Nkankakaako ncobakainkila kuyoomucinga, bakamvwa kuti nguwakacita citondezyo canguzu eeco. ¹⁹ Aboobo Bafalisi bakaambilana kuti, “Taakwe ancomucita! Amubone, cisi coonse caguumukila kulinguwe.”

Bagiliki mbobakayandaula Jesu

²⁰ Lino kwakali Bagiliki bamwi akati kabaabo bakainkide kuyookomba kupobwe eelyo. ²¹ Aaba bakaza kuli Filipo uuzwa kumunzi wa Betesaida mucisi ca Galilii akuzoomwaambila kuti, “Banene tuyanda kubona Jesu.” ²² Mpoonya Filipo wakaakwaambila Andulu makani aaya, eelyo Andulu wakainka a Filipo kuyooambila Jesu. ²³ Jesu wakati, “Ciindi casika cakuti Mwanaa Muntu alemekwe. ²⁴ Ncobeni, ndamwaambila masimpe kuti, naa nseke yamaila kiitalokeli muvu kutegwa ifwe, inga inookkede lyoonse kiili yomwe buyo. Pele kuti naa yafwa muvu, inga iyoozyala zimwi zinji. ²⁵ Ooyo uuyandisya buumi bwakwe uyoobusweekelwa, pele ooyo utayandisyi buumi bwakwe bwamunyika muno uyooba abuumi butamani. ²⁶ Naa muntu kayanda kundibelekela, uleelede kunditobela, nkabela ooko nkwebede awalo mubelesi wangu uyoobako. Naa muntu wandibelekela unoolemekwa kapati a Taata.

Jesu mbwaakaamba zyalufu lwakwe

²⁷ “Akaka moyo wangu wapenga kapati. Ino ndaambe buti? Sena ndaambe kuti, ‘Taata, kondivuna kumapenzi aaciindi cino?’ Peepe, nkaambo kupenga ooku nkundakazida. ²⁸ Taata, ‘Tondezya bulemu bwako.’” Mpoonya kwakamvwigwa jwi kujulu lyaamba kuti, “Ndabutondezya kale, nkabela nciyoobutondezya alimwi.”

²⁹ Bantu banji bakaimvwi aawo bakalimvwa jwi eelyo, bakati, “Kwazuma.” Pele bamwi bakati, “Mungelo nguwakanana kulinguwe.” ³⁰ Jesu wakati, “Eeli jwi lyamvwigwa akaambo kanu, takali kaambo kangu pe. ³¹ Ono lwasika lubeta lwanyika, ono muleli waansi aano watandwa. ³² Pele mebo ndakwaanzikwa ndiyookwela bantu boonse kulindime.” ³³ Jesu wakaamba boobu kutondezya lufu ndwatikafwe mbolubede. ³⁴ Bantu bakamwiingula kuti, “Tee mu Mulawo wa Mozesi kulilembedwe kuti Munanike wa Leza unoopona lyoonse alyoonse. Ino yebo waamba nzi noti ‘Mwanaa Muntu uleelede kwaanzikwa?’ Nguni Mwanaa Muntu ooyo ngoamba?” ³⁵ Jesu wakati kulimbabo, “Mumuni ucili aandinywe kwakaindi kali mbokabede. Amweendele mumumuni nimucili aanguwo kutegwa mudima utamweenzyi, nkaambo muntu weendela mumudima taboni nkwaya. ³⁶ Ono nimucili aamumuni, amusyome mumumuni kutegwa mube bantu bamumuni.”

Jesu naakamana kwaamba makani aaya, wakainka waakulisisa.

Bamwi mbobatakamusyoma Jesu

³⁷ Nikuba kuti Jesu wakacita zitondezyo zyanguzu zinji kabalangilizya, taakwe nibakamusyoma pe. ³⁸ Eeci cakaba boobu mukweendelana abwakalemba musinsimi Izaya kuti,

“O Mwami, ino mbaani bakuusyoma mulumbe wesu,

alimwi nguzu zya Mwami Leza zyakayubununwa kuli bani?”

³⁹ Aboobo tiibakasyoma. Nkankakaako Izaya ncaakati,

⁴⁰ “Leza wakaboofwaazya akuyumya mitwe yabo,

cakuti tabakonzyi kubona ameso aabo,

nikuba kukonzya kuzibisya mumyoyo yabo,

nikuba kukonzya kusandukila kuli ndime kutegwa ndibaponye.”

⁴¹ Izaya wakaamba boobu nkaambo wakabona bulemu bwa Jesu, akubulungulula.

⁴² Pele bunji bwabapati ba Bajuda bakasyoma Jesu. Nikuba boobo tiibakaamba lusyomo lwabo antangalala akaambo kakuyoowa Bafalisi kuti inga balabatanda mucikombelo. Bapati aaba, ⁴³ bakali kuyandisya kulumbaizigwa abantu kwiinda kuzuminwa a Leza.

⁴⁴ Mpoonya Jesu wakoompolola akuti, “Ooyo uundisyoma tasyomi ndime buyo pe, pele ulasyoma amuliyooyo wakandituma. ⁴⁵ Alimwi kufumbwa muntu uundibona wamubona ayooyo wakandituma. ⁴⁶ Ndakasika munyika akuba mumuni wayo, kutegwa kufumbwa uundisyoma ateendi mumudima. ⁴⁷ Kufumbwa uumvwa majwi aangu wamana kataabambi, nsimuzuli pe, nkaambo tiindakazida kuzoobeteka bantu, ndakazida kuzoobafutula. ⁴⁸ Ooyo uundikaka uutatambuli majwi aangu, ulijisi uumubeteka. Majwi ngindakaambilizya ngaati kamuzule mubuzuba bwamamanino. ⁴⁹ Nkaambo taakwe nindalungulula majwi aangu munguzu zyangu ndemwini pe. Taata wakandituma nguwakandipa malailile aanzyeelede kwaamba. ⁵⁰ Nkabela ndizi kuti malailile aakwe apa buumi butamani. Aboobo zyoonse nzendaamba ndilazyaamba mbuli mbundakalaililwa a Taata.”